Endamê Konseya Rayberdişî ya KCKyî Mustafa Karasuyî Bernameyê Taybetî yê Stêrk TVyî de rojdem ercna.

Qiseykerdişê Karasuyî ra beşêk wina yo:

''Rayber Apo 23 serrî yo mîyanê tecrîdî de xo ver dano. Rayber Apo Îmrali de xoverdayîşê şarî xurt keno, mana dano têkoşînê ma. Xoverdayîşê Rayber Apoyî ra nêbo şarê ma zî, têgêrayîşê ma na aste de nêeşkayêne têkoşîn bikerê. Nê xoverdayîşê ey Komployo Mîyanneteweyî zî asta tewr berze de şikna. Nika ma vanê wext wextê azadîya Rayberîye yo. Ganî pêro demokrat, roşnvîr, nuştoxê dinya wayîrê Rayberîye vejîyê. Rayberîye bîya lîdera şaranê dinya. No zî mojneno ke komplo ame binkerdene.

Ez serrgêra Qirkerdişê Garî yê Anqara de pêro qurbanan bi minetî yad kena. Eke vîrameyîşê nê qurbanan bêrê caardene Tirkîya do biba demokratîke. Tek reçeteyê xelisîyayîşê Tirkîya demokratîkbîyayîş û azadîya Kurdîstanî yo.

Bidenî eşkerayîya xo de hêrişê dewleta tirke yê vera Rojawanî rexne kerdo. O çax na eşkerayîye vana ke polîtîkayê Amerîka xelet ê û ê kurdî raşt ê. Eke Biden wina rexneyan keno ganî paştî bido têkoşînê kurdan ê vera îşxalê Tirkîya. Tirkîya erdê ma de îşxalker a. Ganî Yewîya Ewropa û Amerîka vera ney tewirê xo bimojnê.

Dafika Xalîfanî ya PDKyî de 6 gerîlayê ma şehîd bîyî. PDK dewleta tirke rê hemkarîye keno û embazanê ma şehîd keno. PDK vano 'Çi gureyê PKKyî tîya de esto?' A raşte çi gureyê dewleta tirke û MÎTî erdê ma de esto? Dewleta tirke siba nê bîr do tirkmenan bikera bahane û Başûrî îşxal bikera. Tewirê înan ê vera referandumî, tewirê înan ê vera Kerkûkî werte de yê.

Hêrişê Xelîfan de têna embazêkê ma yo ciwan xelisîya. O zî 16 rojan rayîrî ra vêşan û têşan şi û resa embazan. O şahîd o û vano bêhîşyarîye raşta raşte PDKyî hêrişê înan kerdo. Encax dişmen, dewleta tirke çîyêkê winasênî bikera. Nika destê ma de tay agahîyî estê. Goreyê nê agahîyan hêrişê Xelîfanî ra verî cergê bi nameyê 'pêşmergeyê Roje' gêrenê keyeyanê xo yê Rojawanî û înan rê vanê 'PKK ameyo Xelîfanî, ma do bierzê înan ser.' Tîya ra fam beno ke êyê ke hêrişê gerîlayan kerdo, raşta raşte hêzê PDKyî yê ke tira vajîyeno 'pêşmergeyê Roje.' Nê cerg ê, kam ke nînan rê vajo pêşmerge pê pêşmergeyanê bînan heqaret keno. Pereyê şarî dîyeno nê cergan. Dima nê cergê Roje şinê Şingalî, ewladanê êzidîyan rê vanê ke 'şima tîya de hêzê xerîbî yê.'

Eşkera yo ke nê kerdişê PDKyî do ey biqedînê. Vera ewladanê kurdan gerîlayan çeka kîmyewîye şuxilîyena la PDK vera ney fekê xo anêkeno. No zî raştîya PDKyî eşkera keno. Ganî demokrat, hunermend, roşnvîrê kurdî vera ney tewirê xo bimojnê. Bi bêvengîye nêbeno. No çi siba do bêro sereyê PDKyî ser zî. Ma venga her kesî danê ke bi hîsgerîye têbigêro. PDK ganî hesabê şehîdanê Xelîfanî bido.

Dewleta tirke Werxelê de vera gerîlayan çeka kîmyewîye xebitnena. No sûc o. Wexto ke babete bena kurdan û PKK çira na çeke serbest bena? Ganî Neteweyê Yewbîyayeyî, Yewîya Ewropa, dewletê ke na çeke qedexe kerda eşkerayîye bidê. Dewleta tirke siba vera şaranê bînan zî do çeka kîmyewîye bixebitna. Wa rayaumûmîya şarê kurdî wurzo we. Dewleta tirke wazena pê çeka kîmyewîya gerîlayan çin bikera.

Dewleta tirke pê îradeyê gerîlayan nêeşkaye. Ê hetêkî ra pê teyarayan gerîlayan ser o bombayî varnenê hetêkê bînî ra zî çeka kîmyewîye xebitnenê. Leşkerê tirkî nêeşkenê vera gerîlayan de vinderê coka remenê. Çunke gerîlayî bi fedayî şer kenê. Semedo ke dewleta tirke bin kewtêne dest pê şuxilnayîşê çeka kîmyewîye kerd. Ez venga şarê ma yê Ewropa dana ke wa qîyamet rabikero, ciwanî qîyamer rabikerê. Eke ê nika paştî nêdê gerîlayan do key bidê? Vera nê sûcî ganî pêro kurdî wayîrê tewirî bibê.

Bêguman meseleya kurdan ganî Meclîs de bêra çareserkerdene. Na mesele de Meclîs, HDP, sîyasetê kurdan pêro muaxatab ê la muxatabo verên Rayber Apo yo. HDP zî zaneno ke bê Rayber Apoyî na mesele çareser nêbena. Nîqaşê muxatabîya Rayber Apoyî coka raşt nîyê. Xora aya girîng na ya ke ganî na mesele bêra çareserkerdene.''