Endamê Komîteya Rayberdişî ya PKKyî Murat Karayilanî beşê 2. yê bernameyê Stêrk TVyî de derheqê Kurdîstan de polîtîkaya şîdetî ya AKP-MHPyî de qisey kerd.

Qiseykerdişê Karayilanî ra beşêk wina yo: 

''Vera şarê ma, têgêrayîş û îradeyê ma dewlete polîtîkaya ajankerdişî ana ca. Dewlete milîsan teqîb kena, înan rê şantaj kena û ajanîye ferz kena. Dewlete wazena Kurdîstan de ajanîye bi hawayêkê hîrayî vila bikerê. Ez venga pêro partî û dezgehanê Kurdîstanî dana ke vera ajanîye tewirêk bigêrê.

Dewlete bi taybetî keyeyanê şehîdan û welatperweran kena hedef. Dewlete nê keyeyan de kam de qelsîye yan zî zaefêke estê tesbît kena û hînî ajanîye ferz kena. Wa keyeyê welatperwerî xo, domananê xo, ferdanê endamanê xo bipawê. Dewlete seba fealîyetanê ajanîye zaf xîret kena û kede dana. Seba ney kurdan zî xebitnena.

Mayê Haştîye û Mayê Şemeyî estbî. Nê dadîyan têkoşînêko hende xurt kerd ke dewlete waşt verê înan bigêra. Coka Amed de tay keyeyî verê berê HDPyî de nişnayî ro. Bi nê hawayî dewlete armanc kena ke îradeyê mayan ê welatperweran bişikna.  No şero taybet o û hetê Erdogan û Soyluyî ra ameyo serûberkerdene.

Ê vanê 'PKK domanê ma xapînayê.' La dewlete nê keyeyî xapînayî. Nê keyeyî rûmetê xo vînî kerd. Ê 10 serrî zî uca de ronişê do ser nêkewê. Mi tay embazan de zî qisey kerd ê zî nê keyeyan red kenê. Çunke gerîlatîye rûmet o. 

Ma seba ke dejê dadîyanê Kurdîstanî biqedînê koyan de yê. La nê keyeyî verê HDPyî de vera domananê xo şer kenê. No kayêkê Erdoganî yo û tede rûmetêk çin o! Keyeyê rûmetênî wa cade uca biteriknê. Dewleta tirke do nêeşka pê nê şerê taybetî netîce bigêra.

Kurdîstan de êyê ke zîndan de yê wayîrê rûmetî yê. Ma ganî nê tepiştişê dewlete ra nêtersê. Ganî welatperwerî wayîrê keye û domananê tepişteyan vejîyê. Wa çew ê bînan têna meverdo. Destê kamî de çita esto wa keyeyanê şehîdan reyde pare bikero. Parekerdiş pêro dînan de fîraz o û wezîfeyo yewîn ê welatperweran o.

Îqtîdar seba ke HDP binê awbendî de se ra 10 de war verdo hesaban keno yan zî hesabê qefilnayîşî keno. Îqtîdar keno ke ma û HDP bikerê yew la ê cîya yê ma cîya yê. HDP partîyêka sîyasî ya û vera şîdetî vindeno. Yew eleqeyê înan pê ma çin o. HDP çareserîya demokratîke ya meseleya kurdan ser o ronîya. 

W HDP vera nê îdîayanê îqtîdarî bi hawayêkê berzî qisey bikerê, cewabê înan bidê. Ê zaf nêeşkenê xo bipawê. Eke HDP raştîyan bi xurtî bîyaro ziwan şarê Tirkîya zî do înan qebul bikero. Tirkîya de rayîrê demokrasî û aramîye çareserîya meseleyan o, rayîrê şîdetî yê AKP-MHPyî nîyo. Pê şîdetî ê nêeşkenê şarêk biqedînê. Kurdî şîdetî rê teslîm nêbenê û dewaya kurdan wina nêqedîyena.

Keyeyê Şenyaşarî rê neheqîyêka pîle ameye kerdene. Keyeyî ra 3 kesî kişîyayî la reyna heman keyeyî ra kesêk tepişîya. Binê îqtîdarê AKPyî de neheqîyê winasênî qewimîyenê. Nika a dadîye bi sereyê xo vera mehekemeya tirkan xo ver dana. Çira a têna uca de ya? Merdim û dostê nê keyeyî çin ê?

No hêriş vera welatperwerîya kurdan ame kerdene. Wa her kes seke no hêriş vera înan ame kerdene têbigêro. Wa şarê ma wayîrê nê keyeyî vejîyo û vera bêedaletîye têbigêro. Pirsûs de têna no keye nê pêro derûdore ganî biba wayîrê tewirêkî. 

Ma herême de seba demokrasî û haştîye nameyê kurdan û pêro şaranê Tirkîya ser o şer kenê. Tay provakatorî vanê 'PKK û Amerîka pîya wazenê Tirkîya birijnê.' Çîyêko winasên çin o. Înan wextê Şêx Seîd û Seyîd Rizayî de zî vatêne ke têkoşînê înan hetê hêzanê teberî ra yeno îdarekerdene. Ê zî zûr bîyî nê zî zûr ê.

A raşte ê pê hêzê Amerîka vera ma şer kenê. Eke Amerîka destûr nêdayêne ê nêeşkayêne Garê de hêrişê ma bikerê. Amerîka ma kerdê lîsteya terorî. Ma sey PKK partîyêka azad û şorişgêr ê. La ê vanê 'Şima Amerîka reyde têgêrenê.' O çax kamî serekê ma da şima, destûrê îşxalê Serêkanîyê, Girê Sipî û Efrînî da?

Nê provakasyonî dewamê 15ê Sibate yê. Wa Amerîka polîtîkayêka raştikêne bikera, dewaya kurdan bivîna û faşîzmê tirkan rê hetkarîye nêkera. Hewceyê ma pê hêzê qet yew dewlete çin o. 

Amerîka seba têkoşînê vera DAÎŞî hetkarîya QSDyî kena. Tay kesî zî vanê qey Amerîka pêro kurdan û PKKyî rê hetkarîye kena. Çîyêko winasên çin o. Erdogan pê hetkarîya Amerîka resayo nê rojan nika zî seba ke Biden tira telefon bikero vera vano o do reforman bikero. Tirkîya pê hetkarîya NATO û Amerîka hêrişê PKKyî kena. Hulusîyê înan hem vano 'PKK qedîyayo' hem zî kombîyayîşê NATOyî yê Brukselî de teyna PKK keno rojdem. 

Dewleta tirke armanc kena ke pêro dinya vera kurdan şer bikera. Çew nêeşkeno sey dewleta tirke zûran bikero. MA vat ke Garê de nê esîrî pê bombardumanê înan merdî. La ê fotografan mojnenê û vanê bedenê înan parçe nêbîyî. Nê esîrî pê gazê şima merdî. Vanê 'Bombarduman de nêmerdê, bedenê înan parçe nêbîyê. PKK zûran keno.' Ê wina rayaumûmîye xapînenê.

Wa şarê ma û hêzê demokrasî vera nê kerdişan baldar bibê. Gerîlayî ewro pê têkoşînê xo xizmetê demokrasîyê Tirkîya û kurdan kenê. Eke no rejîm vera gerîlayann ser bikewo hînî îqtîdarê xo do bikero mende. La eke bin bikewê rejîmê înan zî do birijîyo. Coka têkoşînê gerîlayan têkoşînê estbîyayîş û azadîye yo.

Wa her kes na raştîye bivîno. Wa şarê ma û hêzê demokrasî vera şerê taybetî têkoşîn bikerê. Wa şarê ma nê têkoşînî de ca bigêro, hêzê xo eşkera bikero, peynîya îqtîdarî bîyaro.''