Fermandarê Qerargehê Merkezê Pawitişê Şarî (MPŞ) Murat Karayilan tewrê bernameyê taybetî yê Stêrk TVyî û hêrişê îşxalî yê vera Herêmanê Pawitişî yê Medya û xoverdayîşê gerîlayan ercnayî.

Karayilanî sere de Roşanê Remezanî û 15ê Gulane Roşanê Ziwanê Kurdkî bimbarek kerdî û vat : ''Ez hêvî kena roşan bibo wesîleya yewîye û serkewtişî û şarê ma dahîna zafêr wayîrê ziwanê xo do bivejîyo.''

Karayilanî ke bi yadkerdişê şehîdanê menga gulane dest pê qiseykerdişê xo kerd û vat: ''Ma pê caardişanê sozanê ke ma dayî embazanê xo yê şehîdan ciwîyenê. No sozê serkewtişî yo. Pê serkewtişî ma eşkenê deynê xo yê şehîdan bidê.''

Karayilanî derheqê hêrişê îşxalî û xoverdayîşê gerîlayan de nê vatî: ''Konseptêkê îşxalî yê dewleta tirke esto ke 5 serrî yo bêmabên dewam keno. Çarçewa planê çokdayîşî de hêrişê têgêrayîşê ma kenê. 2021 de şer kewt merheleya tewr berze. Dewleta tirke her çiqas xo mîyan de vera kurdan xo rêxistin bikero zî heta nika ser nêkewte. Raşt o ma zî derbe girewte, şehedatî ciwîyayî la ma mewzîyê xo pawitî. Vera têgêrayîşê ma reyna hêrişêko hîra dîya destpêkerdene. Qey? Çunku eke no rejîm vera ma ser nêkewo do çîn bibo.  Reyna eke vera ma şer nêkewo îtîfaqê înan do birijîyo. Çunke no îtîfaq xo mîyan de pêsere nêkeno la vera kurdan pê keno.Têna waştişê înan oyo ke destkewteyanê kurdan çîn bikerê û sîyasetê qirkerdişî bidê rayraberdene.Nê konseptî ser o hêrişan dest pêkerd.

Ma bi têrorê dewlete rî bi rî yê

Nê hêrişî têna vera Avaşîn, Zap û Metîna nîyê. Ewro her warê Vakûrî de şer, hêriş û xoverdayîş esto. Reyna Îmrali de hêrişo pîl esto. Derheqê Îmraliyî de hende vengdayîşî benê ke,  zîndanan, Mexmûr û Laviro de grevê vêşanîye yê vera semedê wedaritişê tecrîdî dewam kenê. Bi na  wesîle ez xoverdayoxanê grevê vêşanîye selam kena. Hêrişê dişmenî Îmrali de benê xorî. Reyna vera cinîyan û ciwanan hêrişî zêdîyenê. Ma bi têrorê dewlete rî bi rî yê. 1995 de planê Şark Islahatî ama kerdene. No planê qirkerdişê vera kurdan o.  Dewlete a roje ra nata Kurdîstan de heq û huqûq reyra nebena. Têna metodanê terorî şuxulnena. Ma rê vanê terorîs la raştîye de vera şarê ma ê hêrişê terorî kenê.

Xoverdayîşê gerîlayan ra tersenê

Operasyonî na çarçewe de ameyî destpêkerdene. Wazenê PKKyî bikerê zehîf, werte ra waderê û dima ra destkewteyanê kurdan çîn bikerê. semedê dewleta tirke pêro kurdî eynî yê. Coka destkewteyan heme leteyan hedefê konseptî de yê. Hêrişan na çarçewe de dest pêkerd. Bêşik nê hêrişan de engişta tay hêzanê hegemonîk û cayîyan zî esta. Waştişê înan sîyasetê qirkerdişî yo. Nika nê hêrişî sey teknîkî yenê rayraberdene. Dewleta tirke pê şuxulnayîşê heme çeken û her tewir wesayîtanê şerî yê teknolojîkî Metîna, Zap û Avaşîn de şer kena. Hêrişêko zaf hîra yeno kerdene. Her deqa teyarayê keşîfî gêrênê. Bêmabên hewa û erdî ra bombarduman yeno kerdene. Cesaretê înan çîno vejîyê vera gerîlayan. Rayapêroyîye xapînenê. Vizêr ez raştê eşkerayîyêka înan ameya. Vanê gerîlayî nêeşkenê vejê verê înan la raştîye de ê gerîlayan ra tersenê. Gama ke grûbêka gerîlayan vînenê ta nînê biremê, cade koordînat danê teyarayî hewayî ra herême bombarduman kenê.

Dewleta tirke heme hêzê xo nê şerî rê xerc kerd

Çeteyanê xo yê El Kaîde, DAÎŞ û El Nusra anê tîya danê şerkerdene. Heme hêzê xo nê şerî rê xerc kerd. Rejîmê AKP-MHPyî zano ke eke nê serran de ser nêkewto do çîn bibo. Coka no xoverdayîş têna ê PKKyî nê yê heme kurdan o. Heta xoverdayîşê demokrasîyê Tirkîya û herême yo. Eke no konseptê înan ser bikewo semedê şaranê ereban zî tehluke yo. Wazenê hêrişê Iraq, Surîye û xeylêk welatanê Rojhelatê Mîyanênî bikerê. Wina planê înan esto û xoverdayîşê vera nê planî yo ke yeno dayene xoverdayîşêko bimbarek o. Embazê ma bi na bawerîye û qerardarîye vera dişmenî xover danê. Xoverdayîş kewno roja 20. dişmen roja verêne ya hêrişî ra yew di cayan de çend gamî eştî, tay cayan de nêeşkeno cayê xo ra bileqo. Wina yew şer esto. Destpêkerdişê şerî de warê Zendûra, Mareşo, Mervanos û Qela Bêdewê ameyêne bombardumankerdene. Hema zî wina yo. Dişmen rixmê heme teknîkî û çeteyanê xo nêeşkeno aver şiro, cayo ke zor dîyeno ci çeka kîmyewîye şuxulneno.

Vera qirkerdişê kurdan her kes bêveng  maneno

Kurdîstan de dewleta tirke zî Sadam zî huqûqê mîyanneteweyî binpay kerd û çeka kîmyewîye şuxulnaye la hesabê nayî nêame persayene. Dewleta tirke serranê 90an ra nata vera ma çeka kîmyewîye şuxulnena. Sey Helebçe heme herême de nêşuxulnena, kontrolkerde şuxulnena. Mesela yew herême de şuxulnena wextêk a herême ra dûrî vindena. Dewleta tirke Kurdîstan de hêrişanê terorî kena la bi hewayêkê westakî kena, niminena. Îhsan Sabrî Çalayangil îtîraf kerd ke  înan Qirkerdişê Dêrsimî de magarayan de axûyê mereyan şuxulna û şar qetil kerd. Nika zî eynî çîyî kenê la çi heyf ke rayrapêroyîye bêveng o. Vera qirkerdişê kurdan her kes bêveng  maneno.

Gerîlayî xoverdayîşê destankî danê

Mamreşo de embazê ma 10 rojî bêmabên vera dişmenî şer kerd û destûr nêda ê cayê xo ra gamêke bierze. Serkeşîya fermandar Serhat Giravî de xoverdayîşo destankî ame dayene û hemrayê ma Serhat Girav pîya 7 hemrayanê ma tewrê kerwanê şehîdanê menga gulane bîyî. Dişmenî vera nê hemrayanê ma çeka kîmyewîye şuxulnaye. Cenazayanê înan de rêçê guleyî çînêbî. Cenazayê înan dişmenî girewtî. Kam ke wazeno derheqê nayî de cigêrayîş bikero eşkeno cenazayanê hemrayanê ma ser o cipêrsayîş bikero.

Embazanê ma Serhat Giravî (Kamuran Alpsar), Rukene Zagros (Sehere Bingol), Sarya Diyar (Bişenge Hezer), Canfeda Hesekê (Şehbaz İzzettin Seydo), Xebat Aso (Ubeyt Mevludi), Zafer Tolhildan (Muhammed Abdulkadir Huseyin) û Kamuran Amed (Mustafa Şimşek) Mamreşo de xoverdayîşo tarîxî da.

Gerîla nika vera dişmenî xoverdayîşêko zaf pîlî dano. Ma nêeşkenê fadayîtîya ke ciwanê Kurdîstanî kenê bîyarê ziwan. Mesela fermandarîya vana ê embazan ra vano eke zor dîyeno şima uca caverdê peyser biancê la embazê ma vanê 'nê ma peyserantişî raşt nêvînenê, ma do vera dişmenî xover bidê'. Nê qehremanî destan nusenê. Heme zî zaf ciwan ê, ma semedê înan vajê se kêm maneno. Tarîxê merdimîye de nimûneyê winayênî zaf tay ê.

Heta nika 18 şerwanî şehîd bîyî

Dişmen xeyrê xoverdayîşê gerîlayan 19 rojî cayê ke plan kerdî nêeşkeno bikewo de. Gerîlayî vera dişmenî destan nusenê. Rixmê çekanê teknîkîyan dişmen nêeşkeno gamêke aver şiro.  Artêşa tirke bi mantikê ez şirê ça ez do ucayî bigîrê têgêrena la Herêmanê Pawitişî yê Medya de neşkena aver şiro.  Xoverdayîşê gerîlayan dewam keno û bi metodanê cîya cîyayan xeylêk çalakîyî zî yenê kerdene. Ma pê bawer ê gerîla do ser bikewo. Dişmen eşkeno xo pê propagandaya sîyaye serkewte ramojno la raştîyeyî nînê nimitene. Ma qet çîyêkî mîyan nêkenê.

Bilançoya 19 rojan

Bilançoya 19 rojan destê ma de ya. Wa şarê ma û heme dinya bizanê  ke ma nê şerî de senî bedel danê. Heta nika 18 şehîdê ma estê. 6 embazan ra zî xebere nîna girewtene. Goreyê tesbîtanê embezan 187 leşkerî ameyî kitşene  û 20 zî birîndar bîyî. Planê dişmenî oyo ke hemleya verêne de herêma tampone rono û hemleya dîyine zî îşxalkerdişê heme Kurdîstanî yo. Ma zî vera nê planî xover danê û şer kenê. No şer bi têkoşînî hemparî yê şar û gerîlayan eşkeno ser bikewo. No şerê estbîyayîş, azadîye û demokrasîyî yo. Ma wazenê herême roşn bikerê. Dişmen wazenê statuyê Başûr û Rojawanî û destkewteyanê Vakur û Rojhelatî çîn bikero. Ma do vera nayî xover bidê.

Ciwanî wa tewrê sefanê gerîlayan bibê

Kurdîstan û Ewropa de kêm bo zî şarê ma paştî dano xoverdayîş gerîlayan. Şarê ma ganî vîno ke roje roja anor, namûsî ya. Eke ma ewro rolê xo kay mekerê ma do key kay bikerê. Şarê ma ganî fedakarîye bikero û ciwanî ganî tewrê sefanê gerîlayan bibê. Ciwanî ganî bi tewrbîyayîşê xo cewabê Suleyman Soysuzî bidê. Ez pêşmergeyanê Derinî zî selam kena.  Înan zî semedê tewrbîyayîşê gerîlan veng dabi. Ez zî veng dana. Gerîla hêzê pawitişî yo, ganî no hêz bêro pîlkerdene. Ciwanî, Amed, Serhat, Dêrsim, Botan her cade eşkenê xo biresnê gerîlayan. Verî embazanê eyaletan şerwanê neweyî nêgirewtêne la nika genê, ganî bigîrê. Bitaybetî Vakur de ciwanî na wa nê metodî esas bigîrê. Wa her taxe, dewe, kuçe  her kes xo falîyetanê MÎTî ra, ajanîye ra bipawo. Vera îşxalê tirkî kanî komel îradeyê xo ramojno. Wina ma eşkenê ser bikewê.''