Fermandarê Qerargehê Merkezê Pawitişê Şarî (MPŞ) Murat Karayilanî cîhazê bêtêlî ra venga gerîlayanê cepheyanê şerî da. 

https://gerilatv.com/uploads/videos/hpg_jibo_gerilayen_qada_ser_murat_karayilan.mp4

Karayilanî verî 11 şehîdê mewzîyanê Şehîd Xursîyî yê ke pê çeka kîmyewîyî ameybî qetilkerdene û pêro şehîdê têkoşînê azadîye bi rêzdarî yad kerdî. Karayilanî wina venga gerîlayan da: 

''2022 tarîxê têkoşînê azadîye de bi serra xoverdayîşî. Dişmenî wina hesab kerd ke 2022 de do ser bikewo coka tecrîdê vera Rayber Apoyî kerd giranêr, vera şarê kurdî û sîyasetê kurdan tedayî giranêr kerdî û bi giranî hêrişê herêmanê Zap, Avaşîn û Metîna kerd. Dişmenî vatêne qey mengêke de Herêmanê Pawitişî yê Medya îşxal bikero. La rixmê îmkananê xo yê teknîk û teknolojîkan, çekanê kîmyewîyan û destekê PDKyî zî bin kewt. Înan nameyê operasyonê xo kerdbi 'Pençe-Kilit' la Zap de ê bi xo kilîdkerde mendî. Hêrişanê înan ê îşxalî 9 mengî xo pey de verdayî la hema zî ê nêeşkayî planê xo yê îşxalî bîyarê ca.

Ma dî ke 11-12ê kanûne de dişmenî xeylêk waran ra, Girê Hekarî û Girê FMyî ra ber pêro rojhelat û rojawanê Zapî ra, xo apey ant. A raşte nika Zap de hêzê dişmenî çin ê. Teyna Girê Rêwanî de û yewbîneyk zî Girê Şoreşî de hêzê dişmenî est ê. 

Seba ke dişmen Zap de ser nêkewt verê xo da Avaşînî. La seba ney ganî dişmen hêverî xoverdayîşê ma yê Çemço û Sîda bişikno. Coka diişmen 4-5 mengî yo bi pêro hêzanê xo veera mewzîyanê Şehîd Botan, Şehîd Felat û Şehîd Doganî û Kelaya Çemçoyî hêrişan keno. Kelaya Çemçoyî bîya xençerêkî û seke ginaya qelbê dişmenî ro. Hetê bînî ra dişmen her roje Şehîd Botan de çeka kîmyewîye şuxilneno û keno ke Zapî ra dima reyna rezil nêbo. Coka dişmen bi hawayêkê giranî hêriş keno.

No xoverdayîşê 9 mengan tarîxê şarê ma de mîlad o. No xoverdayîş hetê sîyasî û komelkî ra şarê ma rê zî zaf girîng o. Nê xoverdayîşê ma kerd ke îqtîdarê AKP-MHPyî sîyasetê xo yê qirkerdişî aver nêro. Eke dişmen nê hêrişanê îşxalî de ser bikewtêne dima do Başûr û Rojawanî zî îşxal bikerdêne. Xoverdayîşê ma yê 2021 û 2022yî bîyî bingeyê serkewtişê ma yê 2023yî. 

Coka ma bi rehetî eşkenê vajê ke serra 2023yî do biba serra azadîya Rayber Apoyî û şarê kurdî, serra rijîyayîşê nê îqtîdarê faşîstî. Bêguman xoverdayîşê Îmraliyî, xoverdayîşê zîndanan, xoverdayîşê 'jin, jiyan, azadî' yê Rojhelatê Kurdîstanî û xoverdayîşê Vakur û Rojawanî girîng ê. La xoverdayîşê Zap, Avaşîn û Metîna merkez o. Ewro Zapî ra heta Dêrsimî warê gerîlayanê azadîye yê Kurdîstanî merkezê xoverdayîşî yê.

Gerîlayê cinî û camêrdî 9 mengî yo vera çekanê kîmyewîyan xoverdayîşêkê bêhempayî kenê. Seke Fermandarê xoverdayîşê Şehîd Şahînî, embaz Bager Geverî vatbi 'Ma nê xoverdayîşî reyde xo hîna zaf nêzdîyê Rayberîye vînenê.' Ma kenê ke bibê embazê Rayberîye yê bêkêmî. Embazê xoverdayîşî zî serkêşîya ney kenê. Ê ewro tarîxî nusenê, govenda xoverdayîşî gênê.

Ganî embazê gerîlayî bizanê ke rolêkê senînî anê ca. Çimê şarê ma hê gerîlayan de yê. Wa gerîlayî bala xo bidê serkewtişî. Ma pê bawer ê ke tecrubeyanê 9 mengan ra dima embazê ma nê hêrişanê peyênan zî do pûç bikerê. Dişmen zaneno ke eke şertê hewayî bivurîyê do nêeşko dormeyê mewzîyanê xoverdayîşî de vindero coka ecele keno, mîyanê teşxele û tersî de yo. Eke îmkanê înan est bê wa tîmê ma yê erazîyan hîna zaf mesuldarîye bigêrê xo milî. Prosesê binkewtişê dişmenî dest pêkerdo. Ma zî ganî nê prosesî heta netîce berê û binvistişê dişmenî garantî bikerê.''