Endamê Komîteya Rayberdişî ya PKKyî Murat Karayilan tewrê ''Bernameyê Teybetî'' yê Stêrk TVyî bi û cewab da persanê rojnameger Arjîne Firat. Qiseykerdişê  Murat Karayilanî ra tayî cayî wina yê:

"Tecrîd netîceyê sîyasetê qirkerdişî yê Tirkîya yo. Mîyanê sîstemê tecrîdî û îşkenceyî de nêcaardişê qala exlaqî, huqûqî û heqanê merdiman bêrê kerdene. Grevê vêşanîye 6 mengan dewam kerd û 9 merdimanê ercayeyan nê prosesî de xo feda kerd. Wezîrê Edaletî yê Tirkîya nameyê dewlete ser o vejîya û vat 'Qedexeyê Ocalanî ameyî wedarieyene'. Înan reyna sozê xo nêard ca. Ê namerd ê. Seba înan rûmetê merdimîye çin o. Zulmo ke şexsê Ocalanî de kenî pêro Kurdîstanî de yeno kerdene. Wexto ke tecrîdê Îmraliyî biqêdîyo hînî îqtîdar zî do biqêdîyo. No sîyasetê qirkerdişî yo.

Dewrê AKPyî de qanûnê metîngerîye Kurdîstan de ameyî caardene, çîyêkê bi nameyê qanûnî, sîstemî û exlaqî nêmendî. Her vatişê Erdoganî sey qanûnêkî yeno caardene. Dewleta tirke tersena ke kurdî gamêke bierzê. A hînî nêwazena sînoranê xo yê fermîyan de bimana. Coka xeyalê înan ê Lubnan, Sûrîye, Misir, Iraq ser o estê. Tirkîya wazena ke Dewleta Osmanijan newe ra awan bika. Armancê înan bi nê hawayî yo. Bazarîya Sûrîya Kurdîstan se ro yena kerdene. Çunke seba Tirkîya mesela esase Kurdîstan a. Stratejîya esase ya Tirkîya îşxalkerdişê pêro Rojawanî ya. 9ê teşrîna verêne de bi nê armancî hêriş kerd. La ser nêkewte.

Armancê dewleta tirke tasfîyekerdişê Têkoşînê Azadîye yê Kurdîstanî û serdestkerdişê herême yo. Erdogan seba ke zaf qels bi wazeno wextê îqtîdarê xo derg biko. Çarenusê îqtîdarê AKP-MHPyî girêdayeyê ney o. Heta ke şer dewam biko ê nêeşkê payra vinderê. Eke şer nêkero yan zî firsendêko cîya yê çareserîye awan biko hînî do îqtîdar ra bikewo. No rîyê Erdoganî zaf birîsk o. Nê esasî ser o mîyanê xîretanê neweyan de yê. Seba îqtîdarî eşkeno her çi biko. Seba ney zî heta ke ci ra yeno xîret keno ke wezano netîce bigêro.

Ne xoverdayîşê Efrînî, ne ê Serêkanîyê û Girê Sipî vindert. 76 rojan ra nata dewam keno û do dewam biko. Coka çew nêeşkeno vajo Tirkîya ser kewte. Ma heqdar ê û têkoşînêkê raştî pawenê. Ma do teqez ser bikewê. Ganî ma pê xo bawer bikê. Eke wina bo ma do ser bikewê. Seba serra 2020î bingeyê têkoşînê şarê ma hînî xurtêr bi. Eke Hêzê Pawitişî yê Kurdîstanî pêro; pêşmergeyî, şerwanî zî tede nê formatê HPGyî ca bîyarê do ser bikewê. Eke xo newe bikê, teknîkê modernî bixebitnê, şer bikê, taktîk û teknîkê bi nê hawayî biercnê teqez şarê ma do ser bikewê. Ma pê naye bawer ê. Seba ney zî ma seba serra newîye hêvîdar ê."