Fermandarê Qerargehê Merkezê Pawitişê Şarî Mûrat Karayilanî Stêrk TV’yî rê qisey kerd.

Kurdistan de Rîpelo ke Newe Ame Akerdene

Karayilanî sere de Roşanê Qurbanî û Roşanê Ganîbîyayîşî yê 15’ê Tebexe pîroz kerdî û vat: ‘’Ma naye ra vanê Şorişê Ganîbîyayîşî. Çimkî cimat doşegê mergî de bi. Mudaxaleyê 15’ê Tebaxe şar newe ra kerd ganî, gan û rûh da ci. 15’ê Tebaxe de sîlehî teqayî  la no tena serewedartişo bisîleh nêbê. Na hamle hetê îdeolojîk, sîyasî, kulturkî û cimatkî zî rolêko gird kay kerd. Cimat newe ra aferna. Demê şorişî organîze kerd û fikîrkî şorişêk aferna. Bingeyê azadîye û seypêyîye de şorişê cinîye organîze kerd. O deme de zî embazê cinîyî tewrê têgêrayîşî bîyî Sara (Sakîne Cansiz) zîndan de xoverda dayêne. Hanim Yaverkaya, Sûltan Yavûze, Saadere, Sercane, Çîçek û Berîvane (Binevş Agal) zî koyanê Kurdistanî de mucadele kerdêne. Bi naye mucadele bi bingeyê şorişê cimatkî û şorişê demokratîkerdişî. Kurdistan de rîpelêko newe ame akerdene. Kudistan de hete mezheb û lehçeyan ra parçekerdişo cimatkî estbi. Kurdistan tena 4 parçe nê 44 parçeyî bî. Bi hemleya 15’ê Tebaxe na parçeyîye werte ra ameye wedarnayene û zanayîşê neteweyîye ame afernayene. Ruhê neteweyî û vatişê ya ma Kurdî û Kurdistanijî vejîya vernîye. 15 ‘ê Tebaxe Kurdistan de demêko newe da destpêkerdene û tarîxê Kurdistanî de rîpelêko newe abi.’’

Ma Sey Têgêrayîş û Gerîlayî Peyê Paştîya Rayber Apoyî de yê

Karayilan da zanayene ke înan eşnawito ke keso ke sereyê îstîxbaratî de yo pêvînayîşê tayî hetan de vato ‘ma PKK’yî zehîf kenê û dima ra qedenenê’ û va: ‘’PKK zeîf nêbeno, şima do zeîf bê. PKK demanê tewr zor û giranan de bi xo newekerdişî gird bi. Gama ke ti vanê mi zorî da ci, PKK hemleya newe kena. PKK heqîqet, îdeolojî û şarî temsîl keno, coka PKK bi şîdetî çîn nêbeno. Eke ê keda Serekî veng vejê, ê bi xo vînî kenê. Ma sey têgêrayîş û gerîlayî peyê paştîya Rayber Apoyî de yê. Ma ferman û talîmatanê Rayber Apoyî esas gênê. Rayber Apo temsîlkarê ma yo.  Ma şar ê û heqê xo yê bingeyênî wazenê. Erdogan zî zano ke o nêeşkeno ma zeîf bikero û o do tewr peynî de vera xoverdayîşê ma de vîn bikero.’’

Wa Şarê Ma Bizano ke Gerîla Do Ser Bikewo

Karayilanî bale ante xoverdayîşê gerîlayî yo tarîxî ser û vat: ‘’Nika xakurkê de xoverdayîşêko gird esto. Dişmenî nika Xakurkê de Lelîkan tepişto. Şefîk cayêko stratejîk o ûca zî tepişto. Dola Ermûşî û Evdilkovî zî tepiştê. Nika Xakurkê destê kamî de ya, na meseleya munaqeşe ya. Gerîla çalakîyanê tewr bitesîrî Ermûş û Mîsokê de virazeno.  Pêroyê  xeta Xakurkê de gerîla çalakîyan virazeno. Gerîlatîya demî naya. Dişmen qet cayêk de nêeşkeno serdest bo.  Verî eke dişmen bikewtêne Xakurkê hêzê  ma ûca ra vejîyayêne. Nika wina nêyo.  Her wext mesafeyê suîqetî de yo. Dola Ermûşî de çalakîyê sûîqestî yenê viraştene. A herême de xeylî tîm û grûbê gerîlayî bi hawayêkê hemwextî çalakîyan virazenê. Dişmen nêeşkeno Xakurkê bifîno dest, coka ma gerîlayê Xakurkê pîroz kerdî. Xakurkê de gerîla serdest o, wa çew zûranê dişmenî ra bawerîye mekero. Tena Xakurkê de ne heme wareyan de gerîla xoverdayîşêko gird dano. Xora goreyê Suleyman Soylû û çapemenîya AKP’yî ma rewna çîn bîyî.''

Qoricîyan rê Vengdayîş û Hîşyarî

Fermandarê Qerargehê Merkezê Pawitişê Şarî Mûrat Karayilanî  vat: ''Ma tîya ra veng danê heme qoricîyan zî wa kesêk xeta mekero. Ma belka her ca de nêesene la ma her ca de yê. Kayanê leyminan ê dişmenî rê alet mebê. Ganî kesêk dişmenî rê ajantîye mekero û Vakur û Başûr de binê tesîrê pere û tehdîtan memano. Ma demêko tarîxî ravêrenê. Bingeyê nê şorişî de bi mîlyonan merdimî estî. Hêzê kamî eşkeno naye çîn bikero? Îmkanê ma hende înan çîn ê. Tewr tay 400 televîzyonê înan estê. Bi propagan da vanê dewlete ser kewena, goş nê zûran medê.  Erdogan zaf hol zano ke o do vîn bikero. Bi îstîxbarat û teyareyanê şerî wazenê peynî bigerê, ganî Kurdî vera naye hîşyar bê û plananê înan pûç vejê.’’