Endamê Komîteya Rayberdişî ya PKKyî Murat Karayilanî ANFyî rê qisey kerd û ercnayîşê girîngî kerdî.

Beşê diyînî yê roportajê Karayilanî ra tay noqtayê girîngî wina yê:

''9 serrî yo Kurdîstan de şerêko giran qewimîyeno. Bi taybetî nê hîrê serrê peyênî zehmet bîyî. Herêmanê Pawitişî yê Medya ra ver Vakur de zî Dêrsimî ra heta Geverî, Merdînî; Serhedî ra heta Botanî pêkewtişê giranî qewimîyenê. Başûr de dormeyê Zap, Avaşîn, Metîna de xetêka xoverdayîşî ya xurte est a.

Emser gerîlayan operasyonê girîngî kerdî. Hêverî 1ê teşrîna verêne de Anqara de embazanê ma Rojhat û Erdalî çalakîya fedayîye kerde. Dima teşrîna peyêne de, çele de, sibate de operasyonê şorişgêrî ameyî kerdene. Nê operasyonan de tena hîrê şehîdê ma bîyî. La xeylêk dişmenî ameyî cezakerdene û dest nîya malzemeyanê înan ser. Bi taybetî operasyonanê şorişgêran ê çele û sibate derbê giranî dayî dişmenî ro û performanê gerîlayan mojna ra. Gerîlayan mojna ke eke ê biwazê eşkenê werteyê paytextê înan Anqara de zî çalakîyan bikerê. Gerîlayî wayîrê ruhê Apogîrî yê û fedayî yê. Gerîlayanê azadîye dewrê neweyî de îsbat kerd ke çew nêeşkeno înan bin bivisno. Vera hêrişanê dewleta tirke gerîlayan mojna ke çend xurt ê.

Hînî doktrînê ma yê şerî zelal bîyo. Vera teknolojî ma do îradeyê însanan vejenê vernî. Gerîlayê azadîye resayî astêka winayêne ke teknîkê dişmenî pûç kenê. Dişmenî emser bi her hawayî hêrişê gerîlayan kerd û vera vat ke 'Tay mendo ke ma PKKyî biqedînê.' Seba nê armancê xo dewleta tirke xeylêk teref û hêzan de îtîfaqî zî kerdî. La peynî de Zap de teng mende. Hema zî dewleta tirke kena ke şerê xo rê destek bivîna. Coka her roje selahîyetdaranê xo şawena Hewlêr û Bexdadî.

Mabênê dewleta tirke û PDKyî de tim pêvînayîşî yenê kerdene. PDK derheqê nînan de eşkerayîyêke nêdana la Tirkîya dana. Hetê bînî ra goreyê agahîyanê ke ma vistê destî PDK beşdarbîyayîşê nê şerî red nêkeno. Dewleta tirke wazena ke YNK zî tewrê şerî bikera. La YNK qebul nêkeno. Tafil Talabanîyî tewirêko neteweyî mojna û vat ke ê do vera partîyêka kurdan şer nêkerê. PDK derheqê gerîlayan de îstîxbarat dano dewleta tirke, dormeyê gerîlayan gêno û ambargo ano ca. Çîyo ke PDK keno şerm o. Ma nêwazenê ke vera partîyêka kurdan şer bikerê. Dewleta tirke wazena ke PKK û PDK bikewê pê.  Seba ke rewşe hîna giran nêba ganî PDK mesuldarîyanê xo bîyarê ca û bibo wayîrê tewirêkê neteweyî. Nika verê ma de Newroze est a. Ganî ma bi ruhê neteweyî yê Newroze vera dişmenî pîya yewca de şer bikerê.

NATO serî ra heta  binî paştî dano dewleta tirke. Dewletê sey Kanada, Almanya, Îngilîstan û Amerîka çekan danê dewleta tirke. Nê pêro dewletî û NATO hol zanenê ke ma vera nînan qetî çîyêk nêkerd, zerar nêda înan. Ganî nê şerê xo yê vera kurdan vindarnê. Ê nêeşkenê PKKyî biqedînê. Înan Rayber Apo bi Komployê Mîyanneteweyî tepişt. La se bi? Ewro pêro dimnya seba azadîya Rayber Apoyî payan ser de ya. Ganî vera kurdan polîtîkayê qirkerdişî hinî bêrê warverdene.''