Endamê Komîteya Rayberdişî ya PKKyî Murat Karayilanî beşê diyînî yê roportajê xo de tewirê NATOyî yê vera kurdan, Şorişê Rojawanî û gefê vera Rojawanî ercnayî.

Karayilanî bale ante kombîyayîşê Madridî yê NATOyî ser û vat: ''Kombîyayîşê Madridî seke Lozano diyîn o. Dewletanê Ewropa reyna polîtîkaya qirkerdişê kurdan a dewleta tirke Madrid de tesdîq kerde. Xora dewleta tirke bi destek, çekan û çekanê qedexekerdeyan ê NATOyî vera kurdan qirkerdişî kena. Nê kombîyayîşî de dewleta tirke kerd ke Swêd û Fînlandîya vera hêrişanê ci yê kîmyewîyan bêveng bimanê û ambargoyê çekan ê vera Tirkîya bêro wedaritene. Swêdî herinda ke seba sûcdarîya cînayetê Olof Palmeyî kurdan ra uzrê xo biwazo şerê dewleta tirke tesdîq kerd. Kurdan vera DAÎŞî hende şer kerd la înan kurdan rê nankorîye kerde. NATO vano 'seba asayîşê Tirkîya qesawetê ma est o.' La no zûr a. Ma seba asayîşê Tirkîya yew tehluke nîyê, dewleta tirke seba asayîşê kurdan tehluke ya. Dewletanê NATOyî senî wextê Terteleyê Dêrsimî de hetkarîye şawitbî dewleta tirke nika zî hetkarîya dewleta tirke kenê. Dewleta tirke herinda ke pê dîyalogan meseleya kurdan çareser bikera kurdan qetil kena û NATO zî beno şirîkê ney. Ma venga welatanê Ewropa, Amerîka û NATOyî danê ke hînî destek medê qirkerdişê dewleta tirke. Ma sey kurdan şima ra çîyêk nêpawenê, têna wazenê ke erdê xo de bi azadî biciwîyê. Ma hêvî kenê ke NATO şirîkê dewleta tirke nêbo.''

Karayilanî vist vîrî ke ewro Tehran de Erdogan, Reîsî û Putin do pêvînayîşêk bikerê û vat: ''Erdogan nê kombîyayîşî de seba îşxalê Rojawanî û zêdînayîşê hêrişanê vera Başûrî do destûr biwazo. Xora dewleta tirke NATOyî ra destekê xo girewto, nika zî dore ameya destûrê Îran û Rûsya. Nika dewleta tirke wazena Iraq û Sûrîye çarçewa Mîsak-i Mîllî de îlaweyê erdê xo bikera. Ma vana qey Îran do destûr nêdo ney. Dewleta tirke wazena nika zî Til Rifet û Minbicî îşxal bikera. Beno ke Rûsya ney tesdîq bikera. Ganî ma sey kurdan xo ra ber pê hêzêkê bînî bawer mekerê. Yanî ma vanê qet dewleta tirke nê kombîyayîşî de netîceya ke wazena, do nêvisna destî.''

Karayilanî îfade kerd ke pêro hêzê mîyanneteweyî û herêmî zanenê ke mabênê DAÎŞ û Tirkîya de têkilîyêka xurte est a la çew ney ra vengê xo nêkeno. Karayilanî vat: ''Tesadûfî nîyo ke 3 payeberzê DAÎŞî herêmanê îşxalkerdeyan de kişîyayê. DAÎŞ herêmanê îşxalkerdeyan ê Rojawanî de binê çimdarîya MÎTî de têgêreno. Hêzê Koalîsyonî zî zanenê ke nê herêman de qerargehê DAÎŞî est ê. Dewleta tirke peyê fermandaranê ke DAÎŞ qedînabi, de ya. Kamî DAÎŞ çin kerdo hedefê dewleta tirke de yo. DAÎŞ binê kontrolê Tirkîya de newe ra xo rêxistin keno.''

Karayilanî bi wesîleya serrgêra 10. ya Şorişê Rojawanî yê 19ê Temmuze û derheqê gefanê vera Rojawanî de nê çîyî vatî: ''Şorişê Rojawanî nika binê gefan de yo la se beno wa bibo do heta peynî mende bibo. Çunke Şorişê Rojawanî destkewte û serkewtişê pîlî vistî destî; DAÎŞ vist bin, Neteweya Demokratîke afernaye, şorişê cinîyan ard ca. Dewleta tirke ha şorişî rê gefan wanena. Îdareyê Xoserî zî seferberîye îlan kerda. Na bire mojnena ke Îdareyo Xoser ho çarçewa Şerê Şarî yê Şorişgêrî de amadekarîyanê xo keno. Eke şarê Rojawanî goreyê na çarçewe têbigêrê do ser bikewê. Yanî şarî û şerwanê Rojawanî ganî pîya têbigêrê. Dewleta tirke beşo girîng ê hêzanê xo Herêmanê Pawitişî yê Medya de xerc kerd. Coka wa şarê Rojawanî pê xo bawer bibê. Ma pê bawer ê ke şarê Rojawanî do cewabo ke hewce keno bidê dewleta tirke. Ez pêro şaranê Rojawanî rê nê esasî ser o serkewtişî wazenê.''

Karayilanî îdîaya 'Karayilanî pê kasetî talîmat şawito Pervîne Buldan' a Soyluyî ser o wina vat: ''Îqtîdarê AKP-MHPyî armanc keno ke têgêrayîşê azadîye yê kurdan û têgêrayîşanê çepgîran-demokratan-sosyalîstan ê Tirkîya tasfîye bikero û bi nê hawayî rejîmê xo mende bikero. Ê coka HDPyî ra, têkoşînê HDPyî ra tersenê. Dewleta tirke îdîa kena ke mabênê PKK û HDPyî de yew eleqe est o. Nê pêro zûr ê. Na îdîaya Suleyman Soyluyî zî sey nînan zûr a. Eke Soylu zûrker û şarlatan nîyo wa nê kaseto ke qala ci keno vejo werte. Eke zûrker nîyo wa Soylu verê kamerayan de nê kasetî eşkera bikero.''

Karayilanî pare kerd ke dewleta tirke 2016 ra nata vera kurdan, têgêrayîşê kurdan û sîyasetê kurdan konseptê şerî ana ca û na çarçewe de hêrişê Rojawan û Başûrê Kurdîstanî kena. Karayilanî da zanayene ke çarçewa nê konseptî de bi taybetî Îmrali de pêro zîndanan de zulm yeno kerdene. Karayilanî vat: ''Soyluyî îdîa kerdbi ke 'heta 2017î PKK do nêmano.' La ê ser nêkewtî, şarê ma ser kewt. Xeta Rayber Apoyî hema zî dewre de ya. Xora xoverdayîşê Zap, Metîna û Avaşînî cewab da plananê tasfîye. Xora tay kêmasîyê ma est ê. Ganî têkoşînê ciwanan, cinîyan û komelî pîl û bihêzêr bibo. Xooverdayîşê Zap, Metîna û Avaşînî seba her kesî, bi taybetî seba ciwanan yew vengdayîş o. Ganî ciwanî nê vengdayîşî ser o tewrê gerîlayan bibê, cayê xo de têkoşînê azadîye pîl bikerê. Ganî ma her wextî ra zêdeyêr dormeyê Rayber Apoyî de xo rêxistin bikerê û yew bibê. Seba ke ma ser bikewê ganî her kes mesuldarîya xo bîyaro ca. Eke wina bibo serkewtiş do ê şarê Kurdîstanî bibo.''