Endamê Komîteya Rayberdişî ya PKKyî Murat Karayilano ke programê taybetî yê Stêrk TVyî ke siba do bêro weşanayene de rê qisey kerd, têgêrayîşê PDKyî yê vera Heftanînî Metîna, Garê û Behdînan ercna.

Karayilanî vat: ''Nika Tirkîya de AKP nê MHP îqtîdar o û nêwazenê ke bê tirkan ê bînî wayîrê çîyêk bê. Wayîrê fikrê tuj û nîjadperestî yê. Wina hêrişê Kurdîstanî kenê. Ganî vera naye hîşyar ma bê. Tîyatroyo ke heme dinya de ameyo kaykerdene, Îstanbul de hunermandan waşt ke kurdkî kay bikerê; cade kerd qedexe. Kitbabêkê dersî de qala kurdan bîya, cade kitab dewre vet. Semedê kurdan tiway nêwazenê. Nê wazenê kurdan qirkerdişî ravêrnê. Mesele têna PKK nîyo.

Badê esîrgirewtişê Rayberîye, ma 5 serrî şer da vindernayene. Dewleta tirke zî têkilîya xo ya Başûrê Kurdîstanî daye vindernaye. Badê xoverdayîşê Zapî yê 2008î înan reyna têkilîya xo rona la tewirê înano raşt referandum de vejîya meydan. Ma, PKK eke çînêbo tirkî hêrişê Hewlêrî kenê û destur nêdanê ke qet destkewteyê kurdan bibê. Seba ke nika PKK her perrî paweno, hedefê înan de yo. Ma wazenê reyna îzeh bikerê: Têkilî, îstîxbarat û hemkarîye yê PDKyî yê Tirkîya xizmetê kurdan nêkenê. Eslê xo de do PDKyî rê zî xizmet mekere. Belka nika sey dewrkî sey xizmetî eseno la no heme kurdan erzeno tehluke. Ê heme kurdan hedef genê la tay kurdî înan rê dostîye kenê. Ma semedê şarê kurdî vera nê zorbayan têkoşîn rayra benê, şima çîyêk nêkenê, qenî verê ma megerê, paştî bidê ma.

Yewna mesela zî tay selahîyetdarê hukmetê herême. Vanê; 'PKK xo vera hukmatê herme sey alternatîf vîneno' wina çîyêk çîn o. No çara veto ma zî fehm nêkerd. Wezîrê Karanê Teberî yê Tirkîya Çavuşogluyî rayêke vat: 'PKK wazeno Hewlêrî bigero' Hukmatê herême destkewteyê şarê kurdî yo ke bi keda pîle ame destfînayene. Ma qey ganî xo sey alternatîfê hukmatî vînê! No raşt nîyo, bingeyê ci çîn o. Xora ça de  se beno vanê 'PKKyî kerd' Midurê Asayîşî yê Serzerê kişîya. Cade vat: 'PKKyî kerd' wina yew qerarê ma çîno ke Başûr de çalakî û hêriş bêro kerdene. Ma va eceb bê qerarê ma  bîyo û herême ra persayî nê embezanê ma çîyo winayên nêkerdo. Eke yew kanitê înan esto, wa ramojnê. Dişmen wazeno ma biverdo yewbînan. Provoksyon esto.

Heta ewro qet kurdêk şerê zereyî ra serkewtiş dest nêfînayo. Ma ewro yew dewr de yê ke qederê kurdan do bêro bewlîkerdene. Eke ewro kurdî xo mîyan de bikewê têmîyan vînî kenê. No zaf muhîm o. Ma naye ser fikiryenê. Ma her roje semedê na dewa bedelan danê. Eke ewro kurdî vînî bikerê heme keda veng şina. Keda Başûr, Vakur, Rojhilat û Rojawanî veng şina. Çoka na babete bi giranîye genê dest. PDK amadekarîya şerî keno. Eke tay çimdarî û zanayîşê ma yê pêt çînbîyêne, ma zî naye ra bawerî nêkerdêne. La ma nika ewnîyenê; raşta zî amadekarîye esta. Mesela ça de nuqtayê ma estê wazenê ûca hêzanê xo ca bikerê. Eke mabênê di hêzanê ma de rayîrêk esto wazenê tîya qereqol virazê. Nîyetê nê çiyo?

Mesela herêma Zebarî de çîyêk bi, tay mend serbûte biqewimîyo. Ma vindarna. Wa her hes bizano ke çîyê winayênî tehrîq kenê. Dişmenê ma estê; xora mîyanê hêzan de ciwanê biheyacan estî. Beno ke heme kontrol mebê. Coka hende hêzan têmîyankerdiş, ya zî mabênê di hêzan de cakerdiş tehluke yo. Senî ke ma eşnawit tay cayê bînî zî estê, wazenê wina bikerê.  Eke wina şiro şer îxtîmalo dûrî nîyo. Ez şexsen nêwazenê talîmatê hedefkerdişê kurdan bidê fedaîyan. Ne ez ne zî têgêrayîşê ma wazeno. Ma wazenê ke êyê ke vera ma de yê wa naye fehm bikerê.

Ma tim vera dişmenî şer kenê û şerî ra nêtersenê. Keremê xo ra!  La a nêwazenê vera kurdan şer bikerê. Ez nêzana xebera îdareyê PDKyî nê qewimîyayîşanê pêrune ra esta, çîn a. Bitaybetî tîya ra ez veng dana Kek Mesûtî û wazeno fikrê ey bizanî. Nê qewimîyayîşî qey benê? Qey dormeyê embazan genê? Ma wezenê ke wa dest bierzo na babete. Ma wazenê ke problemanê xo bi rayîrê dîyalogî çareser bikerê. La eke ti  dormeyê hêzê leşkerî bigerî, mero waştene zî pêkewtiş vejîyeno. Ma naye ra qerqilîyenê. Coka ez eşkera veng dana; wazenê wa verê ci bigero. Wina nêbenê. Bi nê tewirî beno ke helêke qeza vejîyo.

Wa çew mevajo qey ma semedê girewtişê tay cayan amadekarîye kenê. Çîyo winayên çîn o. Beno ke tayî fîtne bikerê û zanayîşo xelet bidê. La ma çarçewa neteweyîye de israr kenê. Rayber Apoyî 22 serran de têna rayêke 20 deqa telefon de qisey kerd nê qiseykerdişî ra 15 deqeyî semedê yewîya neteweyîye bî. Ganî her kes hîsgêr bo. Hem şarê ma, rêxistinê sîyasîyî yê Kurdîstanî û hem zî PKK û PDK ma ganî hîsgêr bê. Meseleya mabênê PKK û PDKyî têna meseleya di partîyan nîya. Na meseleyêka neteweyîye ya ke heme kurdan eleqedar kena. Coka ganî her kes eleqedar bo. Ma amade yê, binê çidarîya refakatkaran de ma her çî muneqeşe kenê. Bi qala kilme ma wazenê verê qewimîyayîşanê xiraban bigerê. Ma Kurdîstan de îstîkrar û huzur wazenê. Coka ma wezenê ke na mesela bêro çareserkerdene.''