Endamê Komîteya Rayberdişî ya PKKyî Murat Karayilanî qismê dîyinî yê roportajê ANFyî de tehdîtê hêrişî yê dewleta tirke yê vera Rojawanî, xoverdayîşê gerîlayan ê Herêmanê Pawitişî yê Meyda û dewaya ke vera qedexeyê PKKyî ameye akerdene ercnayî.

Dewleta tirke ya îşxalkere hêrişanê xo yê vera Kerkuk, Mexmûr, Herêmanê Pawitişî yê Medya û Rojawanî domnena. Nê hêrişan de xeylêk sîvîlî şehîd bîyî. Tewr peynî de Bamernê de di domanî şehîd bîyî. Nê hêrişî yenê çi mana?

Dewleta tirke vera şarê ma terorê dewlete kena. Kerkûkî ra heta Efrîn Şehba, wextê peyênî de Çemçemal, Mexmûr û Bamernê de kadroyê ma yê rayberî kişîyayî. Ez keyeyanê Mihemed Zekî Çelebî, Mixtar Aram Hecî û domananê Bamernê ra serweşîye wazena. Dejê înan dejê ma yo. Ma wazenê gonîya nê embazan erdî de meverdê. Hetêkî ra Amerîka, Rûsya û Ewropa destûr nêdayêne Tirkîya nêeşkayêne hêriş bikera. Hetê bînî ra tay ajanê kurdî est ê. Dewleta tirke xo verdena mîyanê sînoranê Iraqî û embazanê ma şehîd kena. Ê wazenê şarê kurdî wa têgêrayîşî rê bibo serdin, yan zî mabênê kurdan de şer bivejê. Ganî her kes vera nê terorîzmê Tirkîya wayîrê tewirêkî bibo. Ma venga şarê xo, bi taybetî başûrijan danê ke vera kerdişanê dewleta tirke bêveng nêmanê, vera hêrişanê dişmenî zêdê têbigêrê, tedbîranê xo hîna zaf bigêrê.

Fînlandîya û Swêd cehd kenê ke bibê endamê NATOyî la Tirkîya nê waştişê înan veto kerd. Şima na rewşe senî ercnenî?

Dewleta tirke seba ke warê şuxilnayîşê çekanê kîmyewîyan de vera ci yew nêrazîbîyayîş nêro kerdene, tedaya Fînlandîya û Swêdî kena. Dewlete Zap, Metîna û Avaşîn de sûcê şerî kena. Armanco diyîn ê dewlete zî no yo ke wazena ambargoyê serê ci bêro wedaritene. Amerîka û NATO vanê 'Ma do hesasîyetê Tirkîya ser de vinderê.' Hesasîyetê Tirkîya çita yo? Qirkerdişê kurdan o. Dewlete Rojawan û Sûrîye de 5 mîlyon merdimî erdê xo ra kerdî, nika wazena herinda înan de merdimanê bînan cabikera. Ma vera Amerîka yan zî NATOyî nê, vera neheqîya Tirkîya şer kenê. Ma têna wazenê wa nê hêzî paştî medê Tirkîya. Ma dewayêka heqdare kenê la Tirkîya dewaya qirkerdişê kurdan û îşxalê Kurdîstanî kena. 

Almanya de seba ke PKK lîsteya terorî bêro vetene avûkatan muracatê Mehkemeya Federale kerd. Vervatoxê Wezîrê Karanê Zereyî yê Almanya verê qerarê mehkeme vat rojdemê înan de wina yew mewzû çîn o. Şima nê senî ercnenê?

PKK vera jenosîd û terorê dewlete xoverdayîşêkê meşrûyî keno. PKK teorîst nîyo. Aya ke terorîzmî kena dewleta tirke ya. La dewletanê kapîtalan seba menfaatanê xo PKK kerd lîsteya terorî. No çi rayîr dano qirkerdişanê dewleta tirke. Ma şer nêwazenê la dewleta tirke wazena pê şerî meseleya kurdan çareser bikera. Eke meseleya kurdan de çareserîya demokratîke yena waştene ganî PKK lîsteya terorî ra bêro vetene. Dewletê ke nêwazenê hemkarê qirkerdişanê dewleta tirke bibê ganî PKK na lîste ra vejê. Nê dewletan ra qet yewe zî nêeşkena tam îzeh bikera ke çira PKK na lîste de ya. Eke huqûqêko raştikên est bo dewaya ma ya vera qedexeyê PKKyî do ser bikewa. 

Dewleta tirke eşkera Rojawan û Vakur-Rojhilatê Sûrîye tehdît kerd. Şima derheqê nê tehdît û hêrişan de çi vanê?

Dewleta tirke wazena pêro Rojawanî îşxal bikera. Na dewlete çim verdayo zengînîya erdê Rojawanî. Vera Rojawanî hêrişê muxtemelî pawîyenê. Ganî şarê Rojawanî nê hêrişan de tecrubeyanê gerîlayan ra îstîfade bikero û metodê gerîlayan bişuxilno. Eke şarê Rojawanî Şerê Şarî yê Şorişgêrî bikero eşkeno dewleta tirke bin bikero. Çîyo girîng o bîn zî no yo ke ganî şarê ma koç nêkero, erdê xo de bimano. Xora tecrubeyê şarê Rojawanî zî zaf o. Ganî şerwanî zî şarî ra hêz bigêrê, paştdayîş bigêrê. Ganî şarê ma pê hêzê xo bawer bikero. Hêzo tewr xurt hêzê şarî yo. Şarê Rojawanî tim mîyanê çalakîyan de yo, nê çalakîyan de alaya partîya ma berz keno, seba partîya ma sloganan vano. Seba ke ma paştî dabi Rojawanî Rojawan zî nika wazeno paştî bido gerîlayan. No çîyêko ercîyaye û baş o la ganî her kes pê rengê xo şoro, pê têgêrayîş û alaya xo şoro. Eke şarê Rojawanî Şerê Şarî yê Şorişgêro bikero cara dewleta tirke do bin bivisna.

Persê ma yo peyên derheqê qoricîyan de yo. Rojanê peyênan de çapemenî de xeylêk rey bîyî rojdem. Nê şerî de rolê goricîyan çîyo?

Tradîsyonê dewlete de tim no est bi ke pê kurdan vera kurdan şer kerdêne. Reyna dewlete vana 'Ma vera DAÎŞî têkoşîn kenê.' La no zûr a. Dewleta tirke paştî dana DAÎŞ û cerganê sey El Nûsra û pê destê înan kurdan qir kena. Dewlete pê destê qoricîyan zî kurdan qetil kena. Dewleta tirke nika koyanê Kurdîstanî de teng bîya coka metodanê gemarinan ana ca. Mîsal kamera kena sereyê kutika  û erşawena ma hetî. Yew zî kutikê dilingî est ê ke nê zî bi raybetî kurd ê. Kurdan de yew qelsîya est a; wexto ke dişmen yanî tirkêk tira vaj 'eferem' hînî xo şaş kenê. Xora bîlasebeb nîyo ke hende serrî yo kurdî nê hal de yê. Ez venga pêro qoricîyan dana ke ma zanenê ê teda ra û feqîrîye ra nê karî kenê. La pereyê nê karî herem o. Wa qoricîyî pê pereyan gonîya kurdan merijnê. Nika dewlete pêro qoricîyê Vakurî berdê Zapî. Wa qoricîyî tewrê operasyonan mebê. Embazê ma nêdanê înan ro la kincê leşkerî dîyenê qoricîyan. Wa kincê leşkeran nêdê xo rê. Nika tay serqoricîyî est ê ke ma nînan pêroyînan şinasnenê. Rojêke nê kesî zî do werte de bimanê û nînan ra hesab do bêro persayene. Wa qoricîyî pê kayanê dişmenî mexapîyê. Bi nê hawayî ma do pîya kayanê dişmenî bixeripnê û amayoxêkê azadî awan bikerê. 

Sey qala peyêne şima wazenê çîyêk vajê?

Nika vera ma serkêşîya AKP-MHPyî de şerêk est o. No îqtîdar wazeno pê dişmenîya vera kurdan atmosferêkê rejîmê faşîzanî awan bikero. Şerê Zap, Avaşîn û Metîna seba îqtîdarê AKP-MHPyî yo zî. Îqtîdar eke ser bikewo do şoro weçînayîşî la eke bin bikewo o çax do binî ra bin bikewo. No şer heman wextî de şerê demokrasî û azadîya Tirkîya yo zî. Ganî her kes bizano ke AKP-MHP wina hesab keno ke rejîmê faşîzanî awan bikero, weçînayîşan de ser bikewo. Ganî her kes goreyê na raştîye têbigêro. 

Nê prosesî de şarê ma hewceyê tewirêkê neteweyî yo. Ma seba ney veng da. Ma seba menfatanê neteweyîyan, seba pawitişê neteweya Kurdîstanî, seba pawitişê erjanê demokrasî yê şaranê herême destê ma ra çi bêro do bikerê. Na babete de ganî ma fedakarîyêka hewce bikerê. Ma verî zî vat; xoverdayîşê Zap, Avaşîn û Metîna heman wextî de seba her kesî vengdayîş o. Ganî her kes goreyê ney têbigêro. Eke têgêrayîşêko winasên bêro kerdene, vera pêlê faşîzmê Îtîhat-Terakkî yê AKP-MHPyî îradebîyayîşê şarê ma, îradebîyayîşê şaran do ser bikewo. Nê esasî ser o ma serra 19. ya Hemleya 1ê Hezîrane de her kesî rê serkewtiş wazenê.