Karayilanî hîşyar kerd: Şerê zereyî de her çi do destê ma ra şoro!

Endamê Komîteya Rayberdişî ya PKKyî Murat Karayilanî venga kurdan pêroyînan da: ''Ma eşkenê meseleyanê xo zereyê xo de çareser bikerê. Eke mabênê ma de şer vejîyo hînî her çi do destê ma ra şoro.''

Endamê Komîteya Rayberdişî ya PKKyî Murat Karayilanî Stêrk TVyî reyde qisey kerd û rojdem ercna.

Qiseykerdişê Karayilanî ra beşêk wina ya:

''Rayber Apo 22 serran ra nata binê tecrîdê giranî û îşkenceyî de yo. Tewr peyên CPT tecrîd tesbît kerd û nika zî Parlamentoya Konseya Ewropa raporê xo de no ard ziwan. Tecrîd bêhuqûqî û bêmerdimîye yo. Heta nika nê dezgehan berpirsîyarîya xo nêardbi ca. Erey mendî la reyna zî eşkerakerdişê tecrîdî baş o. Rayber Apoyî sînorê Kurdîstan, Tirkîya derbaz kerd. Sey Mandela Rayber Apo zî hetê dinya ra şinasîyeno. Konseya Ewropa zî no dî û rewşe kerde rojdem. Hêzanê mîyanneteweyîyan o tepişt û teslîmê Tirkîya kerd. Ganî Rayber Apon bêro azadkerdene û seba naye têkoşîn bêro kerdene. Tecrîdê vera Rayber Apoyî Tirkîya, Kurdîstan û Rojhelatê Mîyanênî eleqedar keno. Demokrasî û azadîye yenê tecrîdkerdene.

Nê dewrê tarîxîyî de ganî ma sey kurdan meseleyanê xo mîyanê xo de çareser bikerê. Eke ma wina nêkerê dewaya kurdan do biba kayê neyaran. Eke ma meseleyanê xo bi dîyalogan çaresert nêkerê û şer bikerê dişmen do ser bikewo. 6 serran ra nata dewleta tirke vera Kurdîstanî qirkerdişêkê pîlî kena, îqtîdarê Tirkîya xo rê panturkîzm esas girewto. Wextê referandumê xoserîye yê Başûrî de Tirkîya Îran û Iraqî reyde qisey kerd ke Başûrê Kurdîstanî wa xoser nêbo. Eke PKKyî ra nêbo dewleta tirke verê xo dayêne Hewlêrî. PKK nika zî her ca paweno la ê vanê kurd çin ê. Dewleta tirke cara wazena kurdan qir bikera. Têkilîyê PDKyî yê bi Tirkîya xizmetê kurdan nêkenê. Dewleta tirke ra dost nêbena. Tirkîya ma rê vana ma şorê û Tirkîya de çekan war verdê, parçeyanê bînan de şer bikerê La dima do se bibo? Ganî ma çarçewa netewe de bifikirê. Ma eşnawit ke tay selahîyetdarê Başûrî vanê ke PKK xo sey parçeyê hukmatê Herême vîneno. No raşt nîyo.

Têkoşînê ma bi serran, şehîdê ma estê ma çira xo sey parçeyêk bivînê? Eke Başûr de waqayêke biba cade vanê PKKyî kerdo. Midurê Serzêrê kişîya înan vat PKK kerdo. Ma pê şaş mendî. Sere de ez do vaja qet yew bira ma çin a ke ma vera partî yan zî selahîyetdaranê Başûrî şer bikera. Ez bi fermî vana. Mavat belkî yewînêka ma şaşî ra çîyo winasên kerdo. Ma cigêrayîş kerd, zanayîş erşawit. La çîyêko winasên nêqewimîyayo. Provakasyon o.

Dişmen wazeno ma bikewê yewbînan şer bikerê. Heta nika kurdan şeranê zereyî ra yew fayde zî nêdî. Nika ma seserra 21. de yê. Ganî ma hînî çarenusê kurdan dinya de eşkera bikerê. Eke ma dewirê winasênî de şerê zereyî yê kurdan dest pêbikero kurdî bi hawayêkê stratejîkî do bin bikewê. Ma seba dewaya kurda her roje bedelê giranî danê. La eke şerê zereyî dest pêbikero her çi do destê ma ra şoro. Başûr, Vakur, Rojawan û Rojhelat de pêro kedê ma pûç benê.

Nika ma vînenê ke hêzê Başûrî vera ma amadekarîya şerî kenê. Wazenê noqtayanê ma de pêşmergeyanê xo ca bikerê. Çend rojî verê cû Zebarî de înan wina kerd la ma mudaxele kerd û serebût nêvejîya. Nika zî hêzê Başûrî mabênê Garê-Metîna de ca benê. No tahrîk o. Ma eşnawit ke nîyetê înan ê winasênî zaf ê. Eke wna bibo xora mabênê ma de şer zî dest pêbikero. Ez bi xo nêwazena gerîlayan rê vaja ke kurdan bikerê hedef. Têgêrayîşê ma zî naye nêwazeno. Ma her roje cara vera dişmenî şer kenê û ma şerî ra nêtersenê. La ma nêwazenê mabênê kurdan de şer dest pêbikero.

Ez venga Kek Mesûdî dana ke xebera ci pê nê serebûtan esta yan nê? Ma wazenê fikrê ey bigerê. Wa cewab bido çira rayîrê embazanê ma gêrîyenê? No yeno çi mana? Ma amade yê ke pê dîyalogan mesele çareser bikerê la eke dormeyê hêzanê ma bêro girewtene ma do vera înan şer bikerê. Ez bi hawayêkê zelalî vaa ke wa verê ney bêro girewtene. Na mesele têna PKK û PDK nê pêro kurdan eleqedar kena. Ma wazenê Kurdîstan aram û haştîyane bo.

Ma Şingal de Fermandar Egîd Civyanî de wezîfeyê xo kerd û serra 2018î de Şingalî ra vejîyê. Ma ciwananê êzidîyan rê hetkarî kerde, raşt a. La no nêna a mana ke şingalijî terefgîrê Apoyî yê. Dewleta tirke nêwazena êzidîyî bibê wayîrê statu. La xo rê PKK bahane kena û hêrişê Şingalî kena.

Ganî kurdan meseleya Şingalî mîyanê xo de çareser bikerdêne. Hêzanê Şingalî bedelê giranî dayî, 6 serran uca pawit. Nika înan rê yeno vatene ke wa Şingalî rê vejîyê. No skandal o. Verê fermanêkê neweyî abeno. Meclîsê Şarê Şingalî, YBŞ û Meclîsê Xoserîye rê çewî çîyêk nêpersayo. Ê Nê vanê peymane qebul nêkenê. Nê hêzî bi zorî Şingalî ra do bêrê vetene yan? Nika zî şima do êzidîyan bikişê?

Yew ameyoxê na peymane çin o. Şar û hêzê Şingalî peymane qebul nêkenê. Eke tay hêzî biwazê peymane bi zorî bîyarê ca o çac pêkewtiş vejîyeno. Ganî meseleya Şingalî de şarê Şingalî sey muxatab bêro girewtene. Ez venga kurdan danê ke meseleyan mîyanê xo de çareser bikerê. Ganî ma îdîaya 'kurdî netewe nîyê, heqê înan çin ê' bişiknê. Nê dewirî de -ez nêwazena vaja la- eke kurdî şerê zereyî bikerê her çi do destî ra şino! Coka nê vengdayîşê mi girîng o. Ma wazenê cewabê nê vengdayîşî bêro dayene û krîz bêro safîkerdene.

Erdogan seba ke Rojawan hedef bikero PKK bahane keno. Erdogan nêwazeno kurdî bibê wayîrê statuyêkî. AKP-MHP nika mîyanê krîzêkê xorinî de yo. Nika qet yew dewlete paştî nêdana dewleta tirke. Erdogan Lîbya, Azerbaycan û Dengizê Sipî de şovenîzm keno û bi nê hawayî wazeno mîyanê tirkan de neteperwerî vila bikero. Nika zî Erdogan ûb Bahçelî qala weçînayîşan kenê. Nê krîzî pêro netîceya meseleya kurdan de vejîyayî werte. Îqtîdar HDPyî ra terseno, her roje HDPyîjan tepişneo, rehîn û esîr keno. Vera kurdan qirkerdişo sîyasî yo pîl esto. Bi heman hawayî vera gerîlayan zî hêrişî estê. La xoverdayîşê Heftanînî her roje derbe dan artêşa tirke ro. Metropolanê Tirkîya de zî xoverdayîşê YPS û HBDHyî esto.

Dewleta TCyî ya îşxalkere plan kerdêne ke Başûrê Kurdîstanî îşxal bikera la gerîlkayan Heftanîn de a xeniqnaye. La planê dewleta tirke yê seba Başûrî nêqedîyayî. Erdogan Rojawanî rê gef waneno û vano 'Ez do heta peyênî tîya de vera kurdan şer bikera.' La peynîya Erdoganî ha asena. Ma do têkoşînê xo dewam bikerê. Ma do bi pêro îmkananê xo çarçewa Hemleya 'Wext Wextê Azadîye yo' ya KCKyî de do têkoşînê xo berz bikerê û ser bikewê.''