14 şaredarîyê Wanî sere de Şaredarîya Şaristanê Pîlî ya Wanî, Şaredarîya Qelqelî, Rêya Armûşê, Erdîş, Bêgir, Ebex, Tûşba, Artemêtan, Saray û Elbakî bi miktarêkê pîlî yê rayan kewtîbî destê HDPyî û 4 şaredarîyî zî kewtibî destê AKPyî. AKPyî sey serra 2016î, weçînayîşê 31ê adare ra dima zî dest na pêroyê şaredarîyanê HDPyî yê ser. 

Hemserekê HDPyî yê Wanî Okkeş Kavayî ard ziwan ke AKPyî îradeyê şarî nas nêkeno û kesê ke raya xo daye AKPyî zî vera qeyûman nêrazîbîyayîşê xo mojnenê.Kavayî vat: "Hêz bi zorî destsernayîşê şaredarîyan nîyo.  Hêza bingeyîne îradeyê şarî yo. AKP weçînayîş de bin kewt, çin bi. Seba ke destê AKPyî de çîyêk nêmend bi qeyûman dest nano şaredarîyanê ma ser. Sere de Wan de ma pêro şaredarîyanê xo de weçînayîşanê neweyan de reyna do ser bikewê. Têna weçînitoxê HDPyî ney, ê AKPyî zî nêrazîbîyayîşê pîlî mojnenî AKP û qeyûman. Weçînitoxê AKPyî yê Wanî vanê ke AKP îradeyê şarî nas nêkeno, bi rayîrê qeyûman dest nano îradeyî ser û weçînayîşê newe de ma do raya xo nêdê AKP. Her kes AKPyî ra ecîz o.