Kongreya Komelê Demokratîkî (KCD), Têgêrayîşê Cinîyan ê Azadan (TJA), Partîya Herêman ê Demokratîkan (DBP) û Partîya Demokratîke ya Şaran (HDP) derheqê tecrîdê vera Rayberê Şarê Kurdî Abdullah Ocalanî de Buroyê DBPyî de kombîyayîşê çapemenîye kerd.

Hemsereka Pêroyîye ya DBPyî Salîha Aydenîz bale ante cezayanê dîsîplînî yê ke dîyayî Abdullah Ocalanî û vat: ''Tirkîya hînî pê demokrasî îdare nêbena. Tecrîd de israrkerdiş verê demokrasî gêno. Muxalefet û hêzê demokrasî ganî vera tecrîdî têkoşîn bikerê. Vera tecrîdî, komelo mîyanneteweyî û CPT wayîrê mesuldarîye yo û ganî mesuldarîyê xo bîyarê ca.''

Aydenîze da zanayene ke tecrîd sûcê merdimîye yo û vat: ''Bêvengîya vera nê sûcî hemkarîya ci ya. Cezayê dîsîplînî yê vera Ocalanî goreyê huqûqî nîyê. Tecrîdkerdişê Ocalanî nameyê dişmenîya vera kurdan o. Ganî cade polîtîkaya tecrîdî ra fek bêro veradayene. Birêz Ocalan rayberê bi mîlyonan merdiman o, îradeyê ma yo. Seba demokrasîya Tirkîya ganî tecrîd cade bêro wedaritene.''