Komîteya Bawerî û Şaran a KCKyî bi wesîleya aşma Remezanî eşkerayîye daye. KCKyî aşma bimbareke pîroz kerde, vat wa bibo wesîleya haştîye û nê pare kerdî:

''Hukmatê Erdoganî hêrişê vera kurdan û ercanê ci domeneno. Îslamî şuxulneno, bi polîtîkayanê înkarkerdişê raştîya şarî seba ke kurdan tarîxî ra biestero çîyo ke destê ci ra yeno keno û şerî xorî keno. Reyna bi polîtîkaya xo ya hêrişkare şaranê Tirkîya û Rojhilatê Mîyanênî zî fîneno tengayî. Şaran verdeno yewbînan. Xora hêrişê 2022 yê vera kurdan nêzdîbîyayîşê dewleta tirke yê şarê Kurdîstanî fîneno çîman ver.

Rejîmê AKP-MHPyî zano ke eke ê vîn bikerê do bêrê muhakemkerdene. Coka seba ke îqtîdarî ra merê war her çî kenê. Dewleta tirke bi zêdnayîşê hêrişanê xo kena ke ser bikewo. Aye ro PDKyî reyde tekîlîye nana ro û bi paştdayîşê Amerîka hêrişê Herêmanê Pawitişî yê Medya û Rojawanî kena. Ma zanê ke dewleta tirke tewr zaf seyda û kurdê muslumanê ke kurdkî îbadet kenê înan rê dişmenîye kena. Duaya kurdkî rê zî dişmenîye kenê. Vera nê zext û zulmî ganî têkoşîno kolektîf bêro xurtkerdene.  Şarê kurdî roja ke îslam naskerde ra nata tim wayûbiratîya umetî esas geno. Tim dostîya bawerî û şaranê bînan keno. Şarê kurdî çewras serrî yo bi têgêrayîşê azadîye nê kulturî dano domnayene.

Afernayoxê pîlî vato raştîye ra şaş mebê. Îslam edaletî sey bingeyê dînî hesibneno.  Qûran vano zaliman ra pîlêr dişmen, zulmî ra pîlêr xirabîye çîn a. Peygamberê ma semedê temamkerdişê ehleqê holî ameyo. Têna nê çar vîrardişan ra ganî bêro famkerdene êyê ke vanê ez bawer kena ganî senî têbigêrê. Ganî heme muslumanî emser aşma Remezanî de nê babetan ser o bifikirîyê. Ma veng danê şima, welatperwerê erjayeyî, şima ke goreyê şertanê bingeyênan ê îslamî îman kerdo bi hişmendîya islamê demokratîkî têkoşîn bikerê. Vera hêrişanê ke pê şuxulnayîşê bimbarekîya dînî yenê kerdene ganî heme şarî û bawerî bêrê têhet têkoşînê xo pîlêr bikerê. Ganî vera Erdogan û êyê ke sey ci yê, êyê ke Fîravûn û Nemrutê roja ma yê, tewir bêro girewtene.

Xoverdayîşê vera zulmê îqtîdarî  zî îbadet o. Muslumano ke binê hêrişê înkar û îmha de yo semedê ci xeyro tewr pîl têkoşîn o. Ganî seydayê kurdan na aşma bimbareke de wayîrê ercanê xo yê ehleqîyan vejîye û vera îqtîdarî têkoşîn bikerê. Fitir û zekato ke şima danê dezgehanê dewleta tirke û hemkaranê ci xeyrê înan çîn o. Çunke nê fitir û zekatî sey gule, gaz, çuye, qirkerdiş û bombayan şima rê peyser agêrenê. Wa şarê ma nêşiro camîyanê dîyanetê tirkan. Nê cayan de semedê qirkerdişê kurdan yeno vengdayene. Waîzan têna kurdan înkar kenê û ci rê nengan çînenê. Wa aşma Remezanî bibo wesîleya xeyran.''