Hemserekîya Konseya Rayberdişî ya KCKyî bi wesîleya serrgêra Şorişê Rojawanî yê 19ê Temmuze eşkerayîyêke daye.

Eşkerayîye wina ya:

''19ê temmuza 2012î de Rojawan de hemleyêka tarîxîye ameye eştene û Şorişê Rojawanî qewimîya. No şoriş 11 serrî yo beno hêvîya şaranê Sûrîye, Kurdîstan, Rojhelatê Mîyanênî û dinya. Ma nê şorişî fîraz kenê ke 11 serrî yo vera her tewirê hêrişî xo ver dano. Ma şexsê şehîdanê Rojawanî de pêro şehîdanê xo bi minet û rêzî yad kenê. 

Şorişê Rojawanî netîceya têkoşînê azadîye yê kurdan de qewimîya. No şoriş destpêk de bi sayê xebat û keda Rayber Apoyî ame kerdene. Rayber Apoyî bi xebatanê xo bingeyê Şorişê Rojawanî eşt. Seba averşîyayîş û pawitişê Şorişê Rojawanî hemkarî û paştdayîşêko enternasyonel ame kerdene. Pêro dinya ra şorişgêrî bi hîsê enternasyonelî ameyî Rojawan û şehîd bîyî. Ma nînan zî bi rêzî yad kenê. No fedakarî û têkoşîn ewro zî dewam keno. 

Şorişê Rojawanî bingeyê xo têkoşînê têdûştî, azadî, edalet û demokrasî ra gêno. Rayber Apoyî nê şorişî de paradîgmaya newîye viste dewre. Çîyo ke Şorişê Rojawanî kerdo cîya ferasetê sosyalîzmî yê Rayber Apoyî yo. Şorişê Rojawanî sey şorişê cinîyan zanîyeno zî. Şorişê Rojawanî azadîgîrîya cinîyan ra paştî gêno. Na taybetmendîye zî Şorişê Rojawanî şorişanê bînan ra cîya keno. Xora Şorişê Rojawanî de rolê cinîyan û serkêşîya înan dîyarker bi. Coka Şorişê Rojawanî bala pêro cinîyanê dinya anceno. 

Şorişê Rojawanî ferasetê xoserîya demokratîke û neteweya demokratîke ra zî paştî gêno. Kurdîstan mîyanê netewe-dewletan de ame kerdene çar parçeyî û şarê kurdî mîyanê çemberê înkar, îmha û qirkerdişî de mend. Şorişê Rojawanî vera Peymana Lozanî ya ke kewena serra 100. bîyo tewiro tewr raşt û mana. Ê merdimê ke vera Peymana Lozanî vejîyê û yewîya neteweyîye bîyarê ca do Şorişê Rojawanî zî bipawê. Nê esasî ser o ganî pêro hêzê welatperwerî bi mesuldarî têbigêrê, dormeyê Şorişê Rojawanî de kom bibê û yewîya neteweyîye bîyarê ca.

Şarê Rojawanî û hêzanê şorişgêran DAÎŞ bin vist û pêro dinya tehlukeyêkê pîlî ra xelisnaye. La hêzê dinya vera hêrişanê dewleta tirke yê serê Rojawanî vengê xo nêkenê û nê hêrişan rê destek danê. Kombîyayîşê NATOyî yê Lîtvanya de peyman û birê ke vera kurdan û Rojawanî gêrîyayê, polîtîkayê mnfaetperestî eşkera kerdî. Nê peyman û birî yenê manaya qirkerdişê kurdan. No nêzdîbîyayîş qetî nêno qebulkerdene. Şorişê Rojawanî vera DAÎŞî pêro merdimatîye pawite û bi hezaran şehîdî dayî. Ganî tewirê vera kurdan û Rojawanî ra, destekê bi dewleta tirke û AKP-MHPyî ra fek vera bêro dayene. Ganî qet yew dezgeh û hêz dişmenîya vera kurdan ser o Tirkîya de têkikîyêke nêkerê.

Ganî dewletî bi taybetî hêzê NATOyî nê tewirê şaşî raşt bikerê û destek nêdê polîtîkayanê dişmenîya vera şarê kurdî.

Dewleta tirke û îqtîdarê AKP-MHPyî dişmenîya kurdan kenê. Dewleta tirke kena ke Sûrîye û Rojawanî îşxal bikera û tede qirkerdişan bikera. Dewleta tirke nika cayanê îşxalkerdeyan de demografî vurnena, kurdan dana koçkerdene. Şarê ma ganî nê karakterê dewleta tirke û îqtîdarê AKP-MHPyî bizano. Dinya de çew çin o ke na raştîye nêzaneno. La tay kesê xayînê ke xo rê vanê kurdî, hetê dewleta tirke û AKP-MHPyî de têgêrenê û nînan de têkilîye kenê, benê hemkarê hêrişanê îşxalî û qirkerdişê şarê ma.  Bi nîqaş û texrîbatan yeno xîretkerdene ke na rewşe bêra nimnayene. Seba Şorişê Rojawanî û pêro Kurdîstanî girîng o ke na rewşe bêra teşhîrkerdene û vera ci têkoşîn bêro kerdene. Bi taybetî zî ganî sîyasetmedar, roşnvîr û welatperwerê kurdî ney bivînê, vera ney bibê wayîrê tewirî û şarê ma zî hayîdar bikerê. No erkêkê welatperwerîye yo girîng o

Şorişê Rojawanî û Îdareyê Xoserî ser o planê dewleta tirke û AKP-MHPyî zanîyenê. Vera nê hêrişan, qirkerdiş û îşxalî ganî sere de şarê Rojawanî pêro hêzê şorişgêrî û şarê ma pîya têkoşîn bikerê. Ganî amadekarîyê şerî yê hîrayî bêrê kerdene. Ganî şarê Kurdîstanî her ca de seba Rojawanî mîyanê têkoşîn û destekêkê aktîfî de bibo. Ganî cinî, şar, pêro beşê şorişgêr, sosyalîst, dostê ma paştî bidê Rojawanî. Eke xoverdayîş û têkoşîno winayên bêro kerdene hêrişê vera Rojawanî do bişikîyê û tehluke do biqedoo. Ma venga pêro kesan danê ke nê esasî ser o wayîrê erk û mesuldarîyanê xo vejîyê. Ma serrgêra 11. ya Şorişê Rojawanî de anê ziwan ke zerrîya ma şarê Rojawanî reyde ya. Ma şima selam kenê.''