Komîteya Tekîlîya Teberî ya KCK’yî derheqê îşxalê dewleta Tirkî ya vera Başûrê Kurdistanî de eşkerayîyêk daye.

Eşkerayîye ra tayî cayî wina yê:  ‘’Dewleta Tirkî vera herêma Bradostî yê Başûrê Kurdistanî dest bi hêrişê îşxalî yo neweyî kerd. Nê hêrişî roja weçînayîşê Başûrê Kurdistanî û zîyaretkerdişê Serokkomarê Iraqî yê Tirkîya dest pêkerd. Bi naye mesajêk dîya Başûrê Kurdistan û Iraqî. La ne hukmatê Iraqî ra ne zî îdareyê Başûrî ra vera îşxalî tewirêk nêame girewtene û heta nika eşkerayîyêk zî nêameye dayene. Sey operasyonê wetê sinorî yê vera PKK’yî genê dest û nêvînayîş ra yenê. Nizdîbîyayîşo winayên berpirsîyarîye ra remayîş o. Wa na raştîye bêro zanayene ke îqtîdarê AKP-MHP’yî şexsê gerîla û PKK’yî de hêrişê heme Kurdistan keno. Çîye ke bi destê DAÎŞ’î nêeşkayî bikerê ewro wazenê ke  bi destûrê hêzanê herêmkî û mîyanneteweyî bikerê.

Ganî Hêzê Kurdistanî û Dormeyê Demokratîkî Vera Îşxalî Bivejîyê

Hetêk ra herêma Bradostî bi teyareyanê şerî, Kobra û helîkopteranê Atakî yena bombardûmankerdene hetêk ra zî herêmanê Mexmûr, Kerkûk û Mûsûlî de  bi hezaranê donimê hêgayê xeleyî yenê vêşnayene. Nê metodê cîya yê hêrişê heman sîyasetî yê. Waştişê înan oyo ke cayê ke sey, sînorê ‘Mîsaki Mîllî’ name kerdî û bi pêkewtişê Mûsûlî yê 1926’î  caverdayî, newe ra bigerê. Beşîka ra heta Bradostî Başûrê Kurdistanî binê hêrişê îşxalî de yo. Vera naye bêvengmendiş  goreyê Kurdîye û ruhê yewîya neteweyîye nîyo. Qet çîyêk azadîya welatî û yewîya neteweyîye ra zafêr muhîm nîyo. Yewîya neteweyîye nê dewranê çetinan de gama ke qerarê zehmetî yenê girewtene vejîyena werte. Ma veng danê heme hêzanê 4 leteyanê Kurdistanî  û dormeyanê demokratîkan ke wa vera îşxalî bivejîyê û tewirê xo ramojnê. Hêzê mîyanneteweyî yê ke vera DAÎŞ’î vejîyayêne ganî vera sponsoranê ci AKP- MHP’yî zî bivejîyê. Ganî heme Kurdî û şarê Kurdistanî vera  nê hêrişê neweyî yo ke vernîya qirkerdişanê neweyan akeno, bi ruhê Serhildanê Şeladizê tewir ramojnê.’’