Konseya Hemserekîye ya KCKyî bi wesîleya serrgêra 39. ya Hemleya 15ê Tebaxe eşkerayîyêke weşanaye. Eşkerayîye wina ya:

''Ma hê dekewenê serrgêra 39. ya Hemleya 15ê Tebaxe ke na hemle tarîxê ma yê têkoşînî de dewrêko girîng bi û seba şarê Kurdîstanî mîladêk bi. Ma sere de afernayoxê na hemle Rayber Apoyî rê û fermandarê ci yê pîlî embaz Egîdî rê, pêro şarê Kurdîstanî, hemrayan, xoverdayoxanê zîndanan, şaranê Rojhelatê Mîyanênî, bindestan, cinîyan û têkoşeran rê Hemleya 15ê Tebaxe fîraz kenê. Ma pêro kedkaranê Hemleya 15ê Tebaxe selam kenê û hûrmetê xo pêşkêşê înan kenê.

Hemleya 15ê Tebaxe seba gerîlayan wayîra manayêka girînge û cayêkê cîyayî ya. Hemleya 15ê Tebaxe sey stratejîyêka gerîlatîye dîyabî destpêkerdene. Gerîlayan bi serkêşîya qewimîyayîşêkê tarîxî yê winayênî mesuldarîyêka tarîxîye girewte xo milî û ê bîyî mîmarê cuya newîye ya Kurdîstanî. Bêguman Hemleya 15ê Tebaxe bi fedakarî, qehremanî û bedelanê pîlan qewimîyaye. Coka ma bi taybetî gerîlayan rê Hemleya 15ê Tebaxe fîraz kenê, xoverdayîşê înan selam kenê. Ma şexsê Fermandarê Pîlî embaz Egîdî de pêro şehîdan bi rêz û minetî yad kenê, verê înan de rîyê xo anê war. Ma reyna soz danê şehîdan ke do ser bikewê.

Hemleya 15ê Tebaxe berhemêkê ercnayîşêkê xorinî, îrade û hişmendî yo. Hemleya 15ê Tebaxe vera tarîxî mudaxeleyêko şorişgêr o. Bi nê mudaxeleyî qewimîyayîşê tarîxî vurîya û Kurdîstan de verê qewimîyayîşanê neweyan abi. Şarê kurdî newe ra ruhêk vist destî. Wexto ke kolonyalîstan kurdan rê çinbîyayîş ferz kerdêne, Hemleya 15ê Tebaxe şarê kurdî newe ra gandar kerd. Hemleya 15ê Tebaxe ganî bi hawayêkê holî bêra famkerdene. Hemleya 15ê Tebaxe seba kurdan ewro wayîra heman girîngîye ya.

Seke zanîyeno ke Şerê Dinya yê 1. ra dima Kurdîstan mîyanê dewletanê neteweperestan de ame parçekerdene, kurdî tarîx, netewe û komelê xo ra ameyî dûrvistene û prosesê qirkerdişî înan rê ame ferzkerdene. Dewleta tirke estbîyayîşê xo çinkerdişê kurdan ser o nayo ro û seba ney zî her çi kerd. Tarîxê ci yê qirkerdiş û qatlîaman zî no îsbat kerd. Reyna seke zanîyeno ke faşîst û dişmenanê kurdan ê sey Îngilîstan û Fransa Peymana Lozanî amade kerde û bi nê hawayî înan paştî daye qirkerdişê kurdan û parçekerdişê Kurdîstanî. Hêzanê modernîteya kapîtalîste bi hawayêkê bêmabênî paştî daye polîtîkayanê qirkerdişê kurdan ê dewleta tirke. Dewleta tirke sere de Amerîka, NATO û Ewropa pê paştdayîşê nînan qirkerdişê kurdan rê dewam kerd. Vurnayîşê nê qewimîyayîşan yeno manaya vurnayîşê tarîxî. Coka Hemleya 15ê Tebaxe hende girîng a.

Dima ke PKK vejîya sehneyê tarîxî seba şikîyayîşê polîtîkaya qirkerdişê kurdan gamêka pîle erzîyaye. Rayber Apoyî bi ercnayîşanê xorinan no proseso tarîxî da destpêkerdene. Dewleta tirke kerd ke bi Darbeya 12ê Êlula 1980î nê prosesî vindarna. La têgêrayîşê kurdan bi di kerdişan têkoşîn û xoverdayîş rena û herikîyayîşê tarîxî vurna. Hêverî zîndanan de xoverdayîşê 14ê Temmuze resa lewe û bi nê hawayî zincîrê xayînî û teslîmîyetî şikîyayî û polîtîkaya tasfîyekerdişî ameye pûçkerdene. Oyo diyîn zî Hemleya 15ê Tebaxe ya. Gerîlayan bi caardişê Hemleya 15ê Tebaxe xoverdayîşê 14ê Temmuze aver berd û prosesê têkoşînê bêmabênî da destpêkerdene. Kurdîstan de dima çi qewimîyayo netîceya nê prosesî de bîyo.

Roja verêne ra nata Hemleya 15ê Tebaxe yena ercnayene û netîceyê ci yenê famkerdene. Netîceyêka Hemleya 15ê Tebaxe na ya ke Kurdîstan de xeta welatperwerîye vejîyaye werte coka xeta xayînîye ameye teşhîrkerdene. Dişmenanê kurdan bi destekê tay xayînan qirkerdişê kurdan ardêne ca. Coka Hemleya 15ê Tebaxe xîret kerd ke verê na xeta xayînîye bigêra. Ewro zî tay xayîn û hemkarî destek danê konseptê qirkerdiş û tasfîyekerdişî. Girîng o ke ewro zî ma rîyê nê xayînan ê raştikênî vejê werte.

Ganî ma di taybetmendîyanê nê prosesî bi raşt û holî fam bikerê. Oyo yewin no yo ke Hemleya 15ê Tebaxe hema zî dewam kena. Heta ke tehlukeyê qirkerdişî nêqedo Hemleya 15ê Tebaxe ganî bêra averberdene ke kurdî estbîyayîşê xo bipawê. Oyo diyîn no yo ke Kurdîstan de pêro qewimîyayîşî netîceyê Hemleya 15ê Tebaxe yê. Çunke seba kurdan Hemleya 15ê Tebaxe yena manaya têkoşînî. Hemleya 15ê Tebaxe teyna çalakîyêka leşkerîye nîya. Hemleya 15ê Tebaxe îfadeyê  têkoşînê azadîye û estbîyayîşî yo. Coka sey vizêrî ewro zî Kurdîstan de heta ke têkoşîn nêbo çîyêk nêqewimîyeno. Nê esasî ser o ganî hemra, têkoşer, welatperwerî, dost û roşnvîrî hîna zaf bi hişmend bibê û vera polîtîkayanê AKP-MHPyî komelî bi hawayêkê raştî hişmend bikerê.

Ma Hemleya 15ê Tebaxe reyna fîraz kenê û selam kenê. Gerîlayanê azadîye yê Kurdîstanî her ca de vera hêrişan û qirkerdişî bêmabênî xo ver da û mojna ke ê do serra 40. ya hemle de netîceyanê pîlan bivisnê destî. Gerîlayê ke benê Egîdî, sere de Herêmanê Pawitişî yê Medya her ca de çalakîyanê bitesîran kenê û nê çalakîyê înan na raştîye îsbat kenê. Bi na wesîle ma çalakîyanê Herêma Şehîd Delîlî ya Rojawanê Zapî fîraz kenê, şexsê fermandar û şerwananê nê çalakîyanê serkewteyan de pêro hemrayan selam kenê.''