Hemserekîya Konseya Rayberdişî ya KCKyî bi wesîleya serrgêra Qirkerdişê Roboskî eşkerayîyêka nuştekîye daye. Eşkerayîye wina ya:

''Ma reyna Qirkerdişê Roboskî yê 28ê Kanûna 2011î yo ke hetê dewleta tirke ya qirkere û kolonyalîste ra amebi kerdene şermezar kenê. Nê qirkerdişî de 34 kurdî ameyî qetilkerdene. Ma kesê ke nê qirkerdişî de dinyaya xo bedilnaye bi rêzdarî selam kenê.

Qirkerdişê Roboskî bi desan qirkerdişanê vera kurdan ra yew o ke serê esasê dişmenîya vera kurdan de ameyo kerdene. No qirkerdiş dişmenîya dewleta tirke ya vera kurdan bi hawayêkê zelalî eşkera kerde. Roboskî de 24 kurdê sivîlî bi hawayêkê barbar û zalimî ameyî qetilkerdene. No qirkerdişo ke sûcêko pîl o, ganî bêro muhakemekerdene û hesabê ci bêro persayene. La qetî tehqîqatê ci nêame kerdene. Eqsê ci dewlete û hukmatî xîret kerd ke qirkerdişî meşrû bikerê û Erdoganî no hêrişê vera 34 sivîlan raşt dî. Gelo na seserra 21. de pêro dinya de senî qirkerdişo winayên yeno pawitene û hesabê ci nêno perskerdene? Dewleta tirke wayîra feraset û karakterêkê vera kurdan a. Netîceya nê qirkerdişî de qirkerdiş û qetilkerdişê vera kurdan seke raşt û hewce yê ameyî dîyene. Kurdî têna wexto ke kurdayetîya xo ra fek vera bidê eşkenê mîyanê na dewlete de biciwîyê. Wexto ke kurdî biwazê bi ziwan, nasname, kultur û îradeyê xo bi azadî biciwîyê yenê qetilkerdene. Oyo ke Roboskî de qewimîya zî no yo. Dewleta tirke 34 kesê ke wayîra na ferasetê azadîye bîyê qetil kerdî.

Tirkîya de rayîrê îqtîdarî û îqtîdarbîyayîşî qirkerdişê kurdan o, dewamkerdişê qirkerdişî yo. Qirkerdişê Roboskî wayîrê taybetmendîyêka winayên a ke na raşîye eşkera keno. AKPyî û serkêşê ci yê faşîstî Erdoganî muracatê pêro rayîran da û qirkerdişê kurdan tim pîlêr kerd, bi nê hawayî zî xîret kerd ke îqtîdarê xo rê dewam bikerê.

Dişmenîya vera kurdan û qirkerdiş nika hetê îqtîdarê AKP-MHPyî ra yenê caardene. Bi awanbîyayîşê îtîfaqê AKP-MHPyî polîtîkaya qirkerdişê kurdan serê esasê planê Mîsak-i Mîllî de bi hêrişanê tewr hîrayan ê îşxalî yena caardene. Çar parçeyanê Kurdîstanî û her cayo ke kurdî tede ciwîyenê ke hêriş û qirkerdişî yenê kerdene. Vakurî ra heta Başûr, Şingal, Mexmûr, Rojawan û Ewropa na polîtîkaya yena caardene. Mîsalê ney o tewr peyên zî Qirkerdişê Parisî yo Diyîn o. Qirkerdişê Parisî yo Diyîn dewamê Qirkerdişê Parisî yê 9ê Çeleyê 2013î û Qirkerdişê Roboskî yo. 

Êyê ke nê çaxî de kurdan rê qirkerdiş ferz kenê îqtîdarê AKP-MHPyî yo faşîst o. Coka bi rijnayîşê nê îqtîdarî verê qirkerdişê kurdan do bêro girewtene, hesabê qirkerdişan do bêro persayene. Têkoşînê ney ganî bêro xurtkerdene. Roşnîkerdişê qirkerdişan, aadîya şarê kurdî û demokratîkbîyayîşê Tirkîya teyna bi rijnayîşê îqtîdarê AKP-MHPyî yê faşîstî beno. Ma reyna îfade kenê ke hesabê sûcanê qirkerdişî yê dewleta tirke ya faşîste bi taybetî ê Erdogan û Bahçelîyî do bêrê persayene. Şarê Kurdîstanî yo welatperwer û dostê înan do têkoşînê demokrasî, edalet û azadîye ser bivisnê, hesabê tewr pîlî kolonyalîstan ra bipersê. Nê esasî ser o ma venga şarê xo, hêzanê demokratîkan ê dinya danê ke têkoşînê demokrasî, edalet û azadîye hîna berz bikerê.''