KCK: Ganî şarê kurdî û hêzê demokrasîyî serewedariti bikerê xurt û bikerê ke Rayber Apoyî reyde pêvînayîş bêro kerdene. Heta ke derheqê Rayber Apoyî de zanayîşê bawerdarî nêameyî girewtene ganî xoverdayîş dewam bikero.
Hemserekîya Konseya Rayberdişî ya KCKyî derheqê şewatê Îmraliyî de eşkerayîyêka nuştekîye weşanaye.
Eşkerayîya KCKyî de nê çîyî ameyî parekerdene:
''Wezîrê Karê Zereyî yê faşîstî yê AKP-MHPyî pare kerd ke Îmarli de şewat vejîya. Na eşkerayîye mîyanê qiseykerdişî de ameye kerdene û armancêkê ci esto. Nê zimistanî de eke adir keweno Îmrali no nîşan dano ke vera Rayberê Şarê Kurdî û embazanê ci komployêk esto. Şarê kurdî vera naye vejîya meydanan û tewirê xo mojna. Şarê kurdî û dostê ci pabeyê xebera weşîya Rayber Apoyî yê.
La dewleta tirke vendayîşê şarê kurdî ser o gamêke nêeşte. Rayberê ma avûkatanê xo reyde pêvînayîş nêkerd. Rayber Apo binê tecrîdêkê giranî de yo. Ganî şarê kurdî û hêzê demokrasîyî serewedaritişê xo bikerê xurtêr û bikerê ke Rayber Apo avûkatanê xo reyde pêvînayîş bikero. Heta ke derheqê weşîya Rayber Apoyî de xeberêke nêra ganî xoverdayîş dewam bikero.
Eke Îmrali de rewşa xirabe bêra meydan mesuldarê ney Erdogan û AKP yê. Warê weşîye û asayîşê Rayber Apoyî de zî dewleta tirke û dezgehê mîyanneteweyî mesuldar ê. Warê tepiştişê Rayber Apoyî de mesuldarê yewînî DYA û NATO yê. Naye ra ganî pêro hêzî derheqê weşîye û asayîşê Rayber Apoyî de gamêke bierzê.
Avûkatan û keyeyê Rayber Apoyî şewatî ra dima seba pêvînayîşî muracat kerd la muracatê înan nêame cewabkerdene. Rayber Apo rayberê şarê kurdî û sere de şarê Rojhelatê Mîyanênî rayberê têkoşînê azadîye û demokrasîyê pêro şaranê dinya û hêzanê demokrasîyî yo zî.
Şarê ma û dostê ma xebera şewatê Îmarliyî ra dima vejîyayî meydanan. Heta ke derheqê weşî û asayîşê Rayber Apoyî de xeberêke nêra girewtene ganî no xoverdayîş dewam bikero. Serra 2020î ganî biba serra şiknayîşê tecrîdî, çinkerdişê faşîzmî, demokratîkbîyayîşê Tirkîya û Rojhelatê Mîyanênî û ganî biba serra ke Rayber Apo û şarê kurdî azadîya xo bivisnê destî.''
