Eşkerayîya Hemserekîya Konseya Rayberdişî ya KCKyî derheqê alozîya Zînî Wertê de eşkerayîyêke daye. Eşkerayîya KCKyî wina ya:

''Sewqîyatê pêşmergeyanê PDKyî yê seba Qendîlî ra dima rayaumûmîye pê hîsgerîye têgêrîya. Seba ke na alozîye nêba şer vengdayîş ame kerdene. Nê vengdayîş û hîsgerîya şarê kurdî zaf biqîmet ê. No tewir nîşanê netewebîyayîşê demokratîkî yê kurdan o. 

Bi seyan hunermendanê kurdan seba ke mabênê hêzanê sîyasîyan ê kurdan de şer nêqewimîyo veng da. No vengdayîş seba ma zaf girîng o. Ganî ma zî goş bidê nê hunermendan û  roşnvîranê komelê ma. Seba nê vengdayîşî ma înan rê sipas kenê û ma vajê ke seba ke ma berpirsîyarîya xo bîyarê ca ma do pê hîsgerîye têbigêrê. Cayo ke pêşmergeyî şîyî ci seba ma zaf girîng o û coka ma xîret kenê ke goreyê hesretê şarê kurdî têbigêrê.

KNKyî zî venga PDK, YNK, PKK û hêzanê sîyasîyan da ke alozîye pê aqilê selîmî çareser bikerê û her hêz abigêro pozîsyonê xo yê verênî. Wexto ke ma pê nê vengdayîşî hesîyayî ma xîret kerd ke goreyê ci têbigêrê. Nîyetê ma çin o ke ma vera PDK, YNK yan zî hezêkê sîyasî yê kurdan şer bikerê. Waştişê şarê ma yê awanîya dîyalogan waştişê ma yo zî.

Rojnameger û xebatkaranê çapemenîya kurdan waşt ke ganî alozîye pê rayîrê dîyalogan çareser bibo. Waştişê ma zî no yo. Fikrê rojnamegeran û xebatkaranê medya û çapemenîye ya kurdan yewîya neteweyî ya ke na zî seba ma berpirsîyarîyêka tarîxî ya.

Vengdayîşê cinîyan ê kurdan ê seba alozîya Zînî Wertê, kampanyaya înan zaf girîng ê. Waştişê cinîyan û dadîyan ê kurdan seba ma pêroyînan fermanêk o. Cinîyanê kurdan veng da ke alozî pê yewîya neteweyîye, pê tewirê neteweyî çareser biba. Vengdayîşê cinîyan û hunermendanê kurdan heqdarî, têdûştî, edalet û wijdanê şarê kurdî temsîl kenê.

Hesasîyetê hunermend, roşnvîr, rojnameger, kesayet û dezgehan ê demokratîkan ê kurdan û ê cinîyanê kurdan o ke alozîya Zînî Wertê ra dima mojna, rayaumûmîyêka girînge ya kurdan afernaye. Wijdanê şarê kurdî ğê hesret û waştişanê înan geş bîyî. 

Seba ma zaf girîng o ke serebûtê Zînî Wertê û meseleya ke  mabênê hêzanê kurdan de vejîyaye, goreyê hesret û waştişanê rayaumûmîya kurdan çareser bibê. Coka dewamkerdişê na hîsgerîye seba çareserîya alozîya Zînî Wertê  do rolêkê pîlî bigêro. Eke na baldarîya rayaumûmîya kurdan dewam bikera ma pê bawer ê ke hêzê Zînî Wertê pêro do abigêrê rewş û cayanê xo yê verênan.

Nameyê Têgêrayîşê Azadîye yê Kurdan ma nê pêro vengdayîşî tim sey pawitişêk dîyî û goreyê ci têgêrayî. Ganî bêro zanayene ke ma verê nê vengdayîş, waşt û hesretanê kurdan de  pê berpirsîyarîye têbigêrê. Coka ma nê esasî ser o hunermend, rojanmeger, KNK, dezgehanê demokratîkan, kesayetanê û cinîyanê çar parçeyanê Kurdîstanî rê seba kede û xîretê înan zaf sipas kenê. 

Ma pê bawer ê ke na berpirsîyarî û başdarîya rayaumûmîya kurdan seba çareserîya tewirê neteweyî ya meseleyanê mabênê hêzanê kurdan, seba afernayîşê yewîya neteweyîye do rolêkê pîlî kay bikerê.''