Hemserekîya Konseya Rayberdişî ya KCKyî bi wesîleya serrgêra Fermanê 3yê Tebaxa 2014î eşkerayîyêke weşanaye. Eşkerayîye wina ya:

''9 serrî verî Şingal de DAÎŞî vera komelê êzidîyan qirkerdişêko pîl kerd. Nê qirkerdişî de bi hezaran êzidîyan dinyaya xo bedilnaye, ê ameyî esîrkerdene û înan dejê pîlî antî. Ma reyna qurbananê nê qirkerdişî bi rêzî yad kenê. Ma cerganê DAÎŞî bi nefretêkê pîlî şermezar kenê. Verê tarîxî de ma reyna soz danê ke heta peynî do hetê şarê Şingalî û komelê êzidîyan de bibê û qirkerê ke nê dejî ardî sereyê êzidîyan nînan ra hesabê tarîxî bipersê. Hişmendîya tarî ya cerganê faşîstan ê DAÎŞî raştîya înan eşkera kerde.

Komelê êzidîyan zaf reyî raştê qirkerdiş û fermanan ame. Pêro merdimatîye verê nê komelî de berpirsîyar a.  Ganî merdimatîye şert û mercanê winayênan awan bikera ke êzidîyî hînî nêrê qirkerdene û bieşê bi bawerî û kulturê xo biciwîyê. 

Hol zanîyeno ke dewleta Iraqî û PDKyî vera hêrişanê DAÎŞî de se kerd nê kerd. Gerîlayan ra nêbîyêne Şingal de qirkerdişêko hîna pîl do biameyêne kerdene. Gerîlayan û hêzanê Rojawanî yê Rayber Apoyî verê nê qirkerdişî girewt. Êyê ke ewro şarê êzidîyan rê serdestîye ferz kenê û wazenê xoserîya Şingalî birijnê şermêka pîle kenê. Peymana Şingalî ya 9ê Teşrîna Verêne ya ke hetê hukmatê Iraqî, PDK û hêzanê serdestan ra ameya îmzakerdene peymana şermî ya. PDKyo ke Şingal mîyanê qirkerdişî de verdayo na peymane ferzê şarî keno. Ganî her kes vera na peymane tewirê xo bimojno. Ganî her kes yew peymana ke îradeyê Şingalî û xoserîya Şingalî qebul kena, biwazo.

Îdareyo demokratîk û waştişê xopawitişî yê şarê Şingalî meşrû yê. Ganî dewleta Iraqî ferzkerdişê PDK û dewleta tirke ra fek vera bida, îradeyê Şingalî teqîb bikera û meseleyan bi rayîrê dîyalog û qiseykerdişî çareser bikera. Ganî sere de NY hêzê mîyanneteweyî paştî bidê waştişanê şarê Şingalî. PDK wazeno Şingal binê serdestîya ci de bibo, êzidîyî zî xizmetê ci bikerê. Dewleta tirke ya ke dişmena kurdan a, wazena qirkerdişê kurdan temam bikera. Dewleta tirke wazena ke Başûr û Şingal de tesîrê xo bizêdîna û bi nê hawayî Iraqî ser o hegemonyaya xo awan bikera.

Dewlet û rêxistinê mîyanneteweyî verê şarê Şingalî de wayîrê mesuldarîyan ê. Şarê Şingalî tarîx de zaf reyî raştê qirkerdiş û hêrişan ame. Seba îdareyêkê demokratîkî û hêzanê pawitişî  ganî her kes paştî bido Şingalî. Xeylêk welatan jenosîdê êzidîyan qebul kerd. No tewir zaf ercîyaye yo. Ganî ê paştî bidê xopawitiş, xoserî, heqanê kulturel û bawerîyan ê êzidîyan zî. Şarê Şingalî wazeno mîyanê yewîya Iraqî de biciwîyo, îradeyê xo yê demokratîkî esas bigêro û bişinasîyo. Teyna bi qebulkerdişê nînan ma eşkenê şarê Şingalî qirkerdişan ra bipawê.''