Hemserekîya Konseya Rayberdişî ya KCKyî derheqê rojdemî de eşkerayîyêke weşanaye û nê pare kerdî:

''Covid-19 pêro dinya de vila bi. Îqtîdarê AKP-MHPyî seba ke xo sey serkewte bimojno û îqtîdarê xo dewam bikero di mengan vat ke ma de vîrus çin o û kerd ke vîrus vila bibo. Vîrus Tirkîya de lez vila beno. Bi taybetî şaristananê Kurdîstanî de jan zaf ganan gêno. Ma keyeyan û merdimanê kesanê kurdan, tirkan, çerkesan, lazan, ereban û xirîstîyanan rê serweşîye wazenê.Jan bi hawayêkê xirabî tesîrê şarê Kurdîstanî û şarê kurdî yê metropolan keno. Coka zaf girîng o ke ma Kurdîstan de û metropolanê Tirkîya de paştî bidê yewbînan. Semedo ke îqtîdarê AKP-MHPyî tewirê xo yê cîyatîye yê vera kurdan ra fek vera nêdano paştdayîşê kurdan ê seba yewbînan hîna girîng o. Nê hetî ra ma Kampanyaya Keyeyê Wayûbirayî zaf girîng vînenê.

Ewropa de zî Covid-19 tesîrê kurdan kerd. Zaf welatperweran dinyaya xo bedilnaye. Ma keyeyan û şarê xo rê serweşîye wazenê. Şarê ma yê sûryanan Ewropa de kedêka pîle daye têkoşînê ma yê azadîye. Ma keyeyanê qurbanan û komelê sûryanan rê zî serweşîye wazenê. Şarê ma yo ke Ewropa de yo hînî komelêko demokratîk o. Ma bawer kenê ke ê nê wextê janî de pê paştdayîşî meselayanê xo safî kenê. Şarê ma yê Ewropa paştî dano şarê ma yê Kurdîstanî zî. Wextê vîrusê Korona de zî pê Kampanyaya Keyeyê Wayûbirayî berpirsîyarîyanê xo ano ca. Ma seba nê tewirê înan şarê xo yê Ewropa fîraz kenê.

Ganî pêro şarê ma bizano ke paştdayîş û rêxistinîye di binge yê ke têkoşîn bihêz kenê. Paştdayîşo bihêz pê rêxistinîya bihêze beno. Têkoşîno bihêz zî pê rêxistinîya bihêze beno. Coka ganî şarê ma nê prosesî de her cade rêxistinîya xo bihêz bikero. rosesê vîrusê Korona mojna ke awankerdişê meclîsan, komunan û peydakerdişê hewcedarîyanê merdiman senî girîng ê. Coka ganî her cade komun û meclîsî bêrê awankerdene û cuya komelkî bêra awankerdene. Bi nê hawayî şarê ma do bieşko wextanê winasênan de hewcedarîyanê xo peyda bikerê. Xora şarê ma Rojawan de, Ewropa de, Mexmûr de dî ke komelo birêxistin çend girîng o. Ma venga pêro şarê xo danê ke her cade rêxistinîye û paştdayîş bihêz bikero; sere de dewleta tirke ya asîmîlekare vera pêro zehmetîyan têkoşîn berz bikero.''