Hemserekîya Konseya Rayberdişî ya KCKyî bi wesîleya serrgêra 40. ya Xoverdayîşê Rojeyê Mergî yê Pîlî yê 14ê Temmuze eşkerayîyêka nuştekîye daye.

Eşkerayîye wina ya:

''Ma serrgêra 40. ya Xoverdayîşê Rojeyê Mergî yê Pîlî yê 14ê Temmuze fîraz kenê, şexsê şehîdanê 14ê Temmuze Tîrmehê Hayrî Dûrmûş, Kemal Pîr, Alî Çîçek û Akîf Yilmazî de şehîdanê şoriş û demokrasî bi rêzdarî, minetî yad kenê û ancî soz danê ke têkoşînê înan û ser bivisnê.

Xoverdayîşê Rojeyê Mergî yê Pîlî yê 14ê Temmuze çalakîyêka pîl û tarîxî ya ke vera Darbeya 12ê Êlule ameya kerdene, faşîzm çin kerdo û hêzîya azadîye ya şaran ser vista. Dewleta îşxalkere seba tasfîyeya têkoşînê azadîye yê şarê kurdî, seba qirkerdişê kurdan û çinkerdişê demokrat û azadîgîranê Tirkîya 12ê êlula 1980î de darbeyêka leşkerî ya faşîste kerde. Bi rayîrê Darbeya 12ê Êlule teber de têkoşînê şarî bi teda û şîdetî fatisna û bi nê hawayî waşt ke têkoşînê azadîye yê kurdan zî biqedîna. Bi nê armancî şorişgêranê tepişteyan rê teslîmîyet û fekverdayîş ame ferzkerdene. Seba ke tepişteyan teslîmîyet qebul nêkerdi teda vera înan zêdîyaye û îşkence dest pêkerd.

Seba ke şarê kurdî hêvîya xo bi şorişgêranê Kurdîstanî ardbî û pê înan bawer kerdêne Îdareyê Cuntaya 12ê Êlule zî waşt ke bi teslîmgirewtişê tepişteyan hêvîya şarî bişikno û bi nê hawayî dest pê teda û îşkenceyî kerd.

Zîndanê Amedî de zî teda û îşkenceyî zêdîyayî. Îdareyê cuntaya faşîste û qirkere Zîndanê Amedî de bi hawayêkê sîstematîkî îşkence kerd ke yew mîsalê nê îşkenceyî tarîx de tay o. Zîndanê Amedî de her metod û rayîrê îşkence bi giranî ame kerdene û Zîndanê Amedî bîyo kelaya zulmî.

Verî Mazlûm Doganî bi rayîrê çalakîya xo vera nê sîstemê îşkenceyî xo ver da. Mazlûm Doganî vat ke teslîmîyet îxanet o, xoverdayîş ciwîyayîş o û ê do teslîmê sîstemê îşkenceyî nêbê. Nê vate û çalakîya Doganî bi giranî tesîrê tepişteyan kerd. Ferhat Kûrtay, Necmî Oner, Eşref Anyik û Mahmût Zengîn ê ke sey Çaran şinasîyenê, teslîmîyet bi temamî red kerd û serê rêçê Mazlûm Doganî de şîyî. Çalakîya Rojeyê Mergî yê Pîlî zî rayîrê xoverdayîşî yê Mazlûm Dogan û Çaran de bîye gamêke.

Xoverdayoxanê 14ê Temmuze zanayêne ke înan rê teslîmîyet yeno ferzkerdene coka înan bira çalakîya xo ya tarîxî û pîle daye. Bêguman no tewirê Xoverdayoxanê 14ê Temmuze nîşeneya mesuldarîya tarîxî û perwerîya înan a pîle ya bi şarî ya. Hişmendî, perwerî û mesuldarîya înan ra nêbîyêne mumkîn nêbîyêne ke gamêka winayêne biameyêne eştene. Coka Xoverdayîşê 14ê Temmuze bi çalakîyêka pîle û xeylêk qewimîyayîşê pîlî afernayî.

Taybetmendîya tewr eşkera ya Xoverdayîşê 14ê Temmuze na ya ke hedefê ci serkewtiş bi, heta serkewtişî nêvinderto. Xoverdayîşê 14ê Temmuze serkewtişê serewedaritişê Mazlûm Dogan û Çaran ê vera teslîmîyetî yo. Înan Zîndanê Amedî kelaya zulmî ra vurna kerd kelaya xoverdayîşî, rejîmê 12ê Êlule çin kerd û hêvîya çinkerdişî ya dişmenî qedînaye. Coka Çalakîya 14ê Temmuze seba netîceyanê xo yê îdeolojîk û sîyasîyan hemleyêka zaf pîl a.

Her wextî ra zêdêr ganî ewro Xoverdayîşê 14ê Temmuze bêro famkerdene. Zaf girîng o ke kesayetê nê çalakîkeran bişinasîyê, tewir, hîs, sereberzî, estetîzm û heskerdişê înan bêrê famkerdene. Înan o çax dîyar kerd ke deyndarê şarî yê. A raşte ê afernayoxê erjanê pîlan ê ewroyînan ê. Ma deyndarê înan ê.

PKKyî xeta 14ê Temmuze ser o têkoşînê azadîye aferna û ewro zî serê bingeyê xeta 14ê Temmuze de vera îşxal û kolonyalîzmî têkoşîn keno. Coka xeta PKKyî xeta 14ê Temmuze ya. Bêguman oyo ke na xete tewr zaf fam kerda û goreyê ci têgêrayo Rayber Apo yo. Xoverdayîşê 14ê Temmuze seba Rayber Apoyî bi paştdayîşêko pîl. Coka Rayber Apoyî na çalakîye ra hêzêko pîl girewt. Rayber Apoyî zî bi perwerîya na xete gerîlayî afernayî û Hemleya 15ê Tebaxe daye destpêkerdene. Erj û destkewteyê Têkoşînê Azadîye xeta Xoverdayîşê 14ê Temmuze de ameyî afernayene.

Faşîzmê AKP-MHPyî zî dewamê Cuntaya 12ê Êlule yo. Senî ke Cuntaya 12ê Êlule armanc kerdêne ke têkoşînê azadîye tasfîte bikera faşîzmê AKP-MHPyî zî bi heman armancî têgêreno û hêrişê kurdan û têgêrayîşê azadîye keno. Faşîzmê AKP-MHPyî pê kerdişanê xo eşkera keno ke cunta ra wetêr o. Faşîzmê AKP-MHPyî her roje şorişgêran erzeno zîndanan, sîstemê teda awan keno, şerê taybetî ano ca, vera gerîlayan çeka kîmyewîye şuxilneno, Rojawan de demografî vurneno, şaran qir keno, gefanê îşxalî waneno.

Faşîzmê AKP-MHPyî zîndanan de kerdişanê Cuntaya 12ê Êlule ano ca, tepişteyanê nêweşan vera nêdano, tepişteyanê ke 30 serrî yo zîndan de yê û înfazê înan ameyo, vera nêdano, her roje zîndanan ra cenazayan vejeno. Bêguman zîndanî vera Faşîzmê AKP-MHPyî bi ruhê 14ê Temmuze xo ver danê. Faşîzm do nêeşko îradeyê tepişteyan bişikno û ser bikewo. Şensê faşîzmî çin o ke vera xeta 14ê Temmuze ser bikewo.

Vera artêşa tirke ya îşxalkere û faşîzmê AKP-MHPyî gerîlayî zî bi ruhê 14ê Temmuze xo ver danê û sere de Zap, Avaşîn û Metîna de her ca de derban danê piro. Gerîlayî xeta 14ê Temmuze ser o awan bîyê û tim na xete ser o şinê û ê do qetî na xete ser o artêşa îşxalkere bin bivisnê. Senî xo Xoverdayîşê 14ê Temmuze Cuntaya 12ê Êlule çin kerde ewro zî gerîlayî bi heman ruhî xo ver danê û do faşîzmê AKP-MHPyî çin bikerê. Ma nê gerîlayan selam kenê, selam û heskerdişanê xo pêşkêşê pêro fermandar û şerwanan kenê.

Eşkera yo ke vera şarê kurdî û gerîlayanê azadîye faşîzmê AKP-MHPyî ameyo noqtaya rijîyayîşî. Serê xeta 14ê Temmuze de bi geşkerdişê têkoşînî do faşîzmê AKP-MHPyî birijo, Kurdîstan azad bibo, Tirkîya û Rojhelato Mîyanên demokratîk bibê. Nê esasî ser o ma venga her kesî danê ke Xoverdayîşê 14ê Temmuze zêdeyêr fam bikero, hetê gerîlayan de ca bigêro û têkoşînî geş bikero. Serkewtiş ê şaran, cinîyan û têkoşeranê azadîye bibo ke bi ruhê 14ê Temmuze xo ver danê.''