Hemserekîya Konseya Rayberdişî ya KCK’yî  derheqê qedînayîşê grevê vêşanîye û rojeyê mergî yê ke bi vengdyayîşê Rayberê Şarê Kurdî Abdullah Ocalanî qedîyayî, de eşkerayîyêk daye.

Ma Heme Çalakgeran Pîroz Kenê, Şehîdan Bi Rêzdarî Yad Kenê

KCK’yî sere de şexsê Leyla Guvene de heme çalakgerê grevê vêşanîye û rojeyê mergî pîroz kerdî, şehîdê hemleye bi rêzdarî yad kerdî û va: ’’Hemrayê ma Ûgûr Şakar, Zulkuf Gezen, Ayten Behçete, Medya Çinare, Zehra Saglame, Yonca Akici, Sîraç Yuksek û Mahsûm Pamay do sey fedaîyanê rayberan mucadeleyê me da ca bigêrê. Rûhê înan o fedaî do tecrîdî temamî de bişikno, faşîzmî birijno û Kurdîstan azad bikero.’’

Ma Dayîkanê Laçigsipîyan Bi Hurmet Silam Kenê

KCK’yî bale ante xoverdayîşê dayîkanê laçigsipîyan ser û va: ’’Dayîkê ma yê ke bi laçiganê xo yê sipîyan vernîyê xoverdayîşî de ca genê û Rayber Apoyî rê giredayîya xo ramojnenê, ma nê hemeyan bi hürmet û heskerdiş silam kenê û ma soz danê ke ma do waştişê înan bica bîyarê û  Kurdîstan azad bikerê.’’

Heta Rijnayîşê Faşîzmî Do Xoverdayîş Dewam Bikero

KCK’yî semedê xurtkerdişê xoverdayîşî veng da û wina va: ’’ Sîyaseto demokratik û bi muzakereyan demokratîkerdişê Tirkîya û azadkerdişê Kurdîstanî ke Rayber Apoyî pêvînayîş de girewtî dest, tena bi rijnayîşê faşîzmî yenê bicaardene. Heta ke vernîya polîtîkaya qirkerdişî nêro girewtene waştişê Rayber Apoyî nênê bicaardene.Semedê naye zî mucadeleyê, ‘ Ma do tecrîd bişiknê, faşîzmî birijnê û Kurdîstanî azad bikerê’ yo ke merheleya ci ya verêne ser kewt, ganî bêro girdkerdene. Ame ramojnayene ke ma bi tecrîdî nêciwîyene û derbeyêko gird dîya politikaya dewamkerdişê tecrîdî ro. Nika wext, wextê xurtkerdişê mucadeleyê azadkerdişê Rayber Apo û Kurdîstanî û rijnayîşê faşîzmî yo.’’