Hemserekîya Konseya Rayberdişî ya KCKyî derheqê Qirkerdişê Parisî de eşkerayîyêke daye. Eşkerayîye wina ya:

''Qirkerdişê Parisî yê 23yê kanûna 2022yî de Endama Konseya Rayberdişî ya KCKyî embaze Evîne (Emîne Kara) û di hemwelatîyê ma yê welatperwerî Mîr Perwer û Abdurrahman Kizil şehîd bîyî. Şexsê înan de ma pêro şehîdanê şorişî û demokrasî bi rêzdarî yad kenê û soz danê ke do ser bikewê.

Embaza ma Evîne 1998 de tewra têgêrayîşê azadîye bîye û ê çaxî ra nata seba azadîya şarê Kurdîstanî têkoşîn kerd. Vera dişmenê kolonyalîst û qirkerî aye xeylêk cayan de têkoşîn kerd û serkêşîya têkoşînê cinîyan kerde. Aye averşîyayîşê xeta cinîyan a azade de û afernayîşê hişmendîya cinîyan de kedêka pîle daye. Aye artêşbîyayîşê cinîyan rê zî kede daye û wezîfeyê girîngî ardî ca.

Averşîyayîşê Şorişê Rojawanî de zî ked û destekê pîlî yê embaze Evîne est ê. Aye şerê vera DAÎŞî de cagirewt. Aye têna kurdan rê merdimarîye rê xizmetêko pîl kerd. Vera barbarî û kanwazîya DAÎŞî xeta cinîyan ê azadan mojnaye. Bêguman embaze Evîne hişmendî, hêz û waştiişê xo yê têkoşînî xeta Rayber Apoyî ra girewt. Embaze Evîne şerê vera DAÎŞî de birîndar bîye û seba tedawî derbazê Ewropa bîye. Ewropa de hem tedawî bîyêne hem zî têkoşînê xo rê dewam kerdêne. Aye heta şehadetê xo têkoşîn kerd. Şar û cinîyanê Kurdîstanî a nêzdî ra şinasnayêne cola şehadetê ci ra dima wayîrê têkoşînê aye vejîyayî. Şarê kurdî herikîya Parisî û wayîrê hêrsê şehîdan vejîya. No tewir zaf manadar bi.

Eşkera yo ke nê hêrişî de hedefo esas embaze Evîn bi. Dewleta tirke ya îşxalkere û îqtîdarê AKP-MHPyî yê faşîstî bi tasfîyeya têkoşînê azadîye yê Kurdîstanî û bi hêrişê vera serkêşanê têkoşînê azadîye xîret kerd ke DAÎŞî bixelisnê û xeta DAÎŞî ancî serwer bikerê. Eşkera yo ke AKP-MHP wayîrê heman hişmendîya DAÎŞî yo, paştdayîşî ra zêdeyêr destpêkî ra nata DAÎŞî îdare keno û no zî hetê her kesî ra zanîyeno. Seba ke embaze Evîne zî vera DAÎŞî şer kerd û çinkerdişê DAÎŞî de bi rolêkî werişte we AKP-MHPyî û MÎTî hêrişê ci kerd û a şehîd kerde. Şarê kurdî û dostê înan seba ke na raştîye zanenê bi hîsêkê xurtî yê wayîrvejîyayîşî têgêrayî. Heyf ke nêzdbîyayîşê dewleta Fransa û meqamê înan eşkerakerdişê raştîye ra dûrî yê. Nêzdîbîyayîşê Fransa heyf ke qirkerdişî normalîze keno û nê hêrişî seke şexsî yo mojneno. Fransa heman tewir Qirkerdişê Parisî yê 9ê Çeleyê 2013î de zî mojnabi û Fransa rixmo ke zanayêne no qirkerdiş hetê MÎT û dewleta tirke ra ameyo kerdene raştîyî eşkera nêkerdbî. Eke no nêzdîbîyayîş hema zî dewam keno no yo zî a mana ke Fransa paştî dana polîtîkayanê qirkerdişê kurdan. Rewşêka winayêne de ke dewleta tirke hêrişê kesêka ke vera DAÎŞî şer kerdo, kerda, tewirêko winayên nêno manayêka bîne.

Dewlete û hukmatê Fransa ganî nê wird qirkerdişanê Parisî bi hawayêkê raştî biercnê û raştîyan bivisnê verê çiman. Sey Qirkerdişê 9ê Çeleyî no qirkerdiş zî bi planî ameyo kerdene. Peyê nê qirkerdişî de qetî îqtîdarê AKP-MHPyî yo faşîst, hêzê îstîxbaratî yê cîyayî est ê ke dewleta tirke û MÎTî ra paştî gênê. Nêno qebulkerdene ke na rewşe nêra dîyene û nêra eşkerakerdene. Ma reyna venga dewlet û hukmatê Fransa danê ke seba eşkerakerdişê raştîyan nêzdbîyayîşêkê raştî bimojnê. No qirkerdiş hetê îqtîdarê AKP-MHPyî yê faşîstî ra ameyo kerdene ke paştgîr û îdarekarê DAÎŞî yo. Ganî na raştîye bi her hawayî bêra îfadekerdene û eşkerakerdene.

Şarê kurdî û dostanê înan vera nê qirkerdişî bi xurtî nêrazîbîyayîşê xo mojna û tewirêko raşt mojna. Labelê ganî nê çalakîyî dûrê şîdetî bê û rayîr nêro dayene provakasyonan. Ganî şar û dostê ma bi hesasîyetêkê pîlî serê bingeyê demokratîkî de nêrazîbîyayîşê xo bimojnê.''