Komîteya Bawerîye û Şaran a KCKyî derheqê aşma Remezanî de eşkerayîyêke daye û nê pare kerdî:

''Aşma Remezanî ke semedê muslumanan aşmêke bimbarek a dest pê kena. Bi na wesîle muslumanî bi roje û dûayan verê xo danê raştîye, edalet, wayûbiratîye û parekerdişî. Ma hevî kenê ke dûayê înan bêrê qebûlkerdene.  Rîyê vîrusê Korona ra emser cayanê cîyayan û atmosferêko bînî de ma kewenê aşma Remezanî. Ma veng danê ke heme kesê ke îmkanê înan estê wa werê xo nêçaran de pare bikerê. Ganî fermanê ehleqî yê  'kama/o ke gama ke cîranê ci vêşan bo mird rabikewo ma ra nîyo' nêro vîrakerdene.

Merdimîye rîyê çimvêşanîye sîstemê kapîtalîzîmî yo ke xoza talan kerdo ra rojanê tengan ra ravêrena. Metînanê bimbarekan de yeno vatene ke rîyê  serdestanê zalîman ra nê musîbetî yenê ciwîyayene. Ehleqê komelkî  ra qerfîyayîş berê heme xirabîye akeno. Ganî alîmî waîzan de vera zalimanê ke xozaya ma talan kerda û cuya ma ser û bin kerdo hîna bicesaret tewir bigêrê.

Kurdîstan de pîya bi janê Korona bi hêrişê dewleta tirke kewena aşma bimbareke. Ma do bi xoverdayîşî nê herişan pûç vejê. Xora ganî her hetî ra hetkarî û xoverdayîş bêro kerdene. Muslumanê kurdîstanijî ganî fitir û zekatê xo bidê dezgeh û kesanê welatperweran. Heme dînî û îtîqatî paştdayîşê dewleta tirke sey guneyî û vera ci xoverdayîşî sey xeyrî hesibnayo.

Proseso ke ma  sey şarî tira ravêrenê sey vecîbeyanê dînîyan wezîfeyanê ma yê neteweyîyan zî bimbarek kenê. Heqêkê dînê  Îslamî zî no yo ke ma bi ziwan, nasname û kulturê xo Kurdîstan de azad biciwîyê.  Dewleta tirke ya kolonyalîste vera nê heqê ma şer dayo destpêkerdene.  Nê hêrişê qirkerdişî de dînê Îslamî zî şuxulnena. Wazenê ke kurdîye bi qirkerdişî biqedînê. Meyîtê gerîlayêkî dadîya ci rê pê posta şawit. Bi nê nimûneyê peyênî ma reyna dî ke ê hêrişê vera kurdan de senî bêehleqîye kenê.

Bitaybetî ma veng danê alîm û seydayan, tarîkat û cemaatanê Başûrê Kurdîstanî ganî ê fîtneyê dişmenî pûç vejî. Semedê xebata yewîya neteweyîye karo tewr zaf keweno înan. Reyna Rojawan de zî ganî alîmê dînî semedê îslamê demokratîkî hîna zaf têkoşîn bikerê. Wa na aşma rojeyî bimbarek bo û biba wesîleya yewîye û azadîya şarê kurdî.''