Komîteya Têkilîyanê Teberî ya KCKyî derheqê şerê taybetî de ke Partîya Demokrate ya Kurdîstanî (PDK) bingeyê vurnayîşê raştîyan ser o keno, eşkerayîyêke daye. 

Eşkerayîya KCKyî wina ya:

''Partîya Demokrate ya Kurdîstanî dest pê pêlêkê hîrayî yê vurnayîşê raştîyan kerd. PDK seba ke pêro sûcanê neteweyî û sîyasîyan ê vera Kurdîstanî binimno dest erzeno her tewr provakasyon û vurnayîşê raştîyan. Serebûtê kişîyayîşê Serzêrê (ke HPGyî no tesdîq nêkerd) ra bigêre heta xeber û raporanê bêbingeyînan ê derheqê têgêrayîşê ma de PDK xîret keno ke seba planê gemarinî yê ameyoxî yew binge awan bikero.

Na xebera peyêna ke qaşo înan komêka pabesteya têgêrayîşê ma destbend kerda, qet raşt nîya û zûr a.  Na xebere bi hetkarîya dezgehê ajanîye MÎTî  virazîyaye û armancê înan meşrûkerdişê hêrişê vera têgêrayîşê ma yo. Rayaumûmîya Kurdîstanî baş zanena ke wextê tengasîye de û wextê hêrişanê DAÎŞî de kamî Başûr pawit û kamî şar war verda û remayo.

Ma sey Têgêrayîşê Azadîwaştoxê Şarê Kurdîstanî pawitişê estbîyayîş, azadî, aramî û asayîşê şarê Kurdîstanî sey wezîfeyê xo yê exlaqî û neteweyî vînenê. Bi seyan embazanê ma yê gerîlayan seba pawitişê Başûrî Şingalî ra bigêre heta Hewlêrî ganê xo feda kerdî û fermanarê ma yê sey Zekî Şengalî, Egîd Civyan û Têkoşer Gever nê rayîrî de şehîd bîyî.

Gerîlayan caardişê asayîş û aramîya herêma Kurdîstanî de rolê rayberîye ardî ca û qet asayîşê şar û welatê xo nêvistî binê tehlukeyan. Çunke nê oxirî de bi seyan şehîdî dayî. Ganî bêro zanayene ke hêzê ke asayîşê herêma Kurdîstanî visnenê binê tehlukeyî PDK û dewleta tirk ê. Netîceya planê hemparî yê îşxalî yê wird hêzan de her orje koy û deştanê Kurdîstanî ser o bomba, top û fuzeyî varenê. Hetê bînî ra PDK zî sey îqtîdarê Erdoganî şar tepişneo, remneno, erzeno zîndanan; rojnameger, mamosta, aktîvîst û muxalîfan rê teda keno û asayîş û aramîya hemwelatîyan çin keno.''