Hemserekîya Konseya Rayberdişî ya KCKyî bi wesîleya serrgêra Qirkedişê Roboskî eşkerayîyêka nuştekîye da û nê vatî:

8 serrî cuwa ver artêşa tirke bi bombayanê teyarayan xeylêkê înan domanî 34 ciwanê kurdan qetil kerdî. Meyîtê ciwananê ke bi qatiran ameyî kiriştene mumkun nîyo ke bêrê vîrrakerdene. Ma nê şehîdanê xo yê ke hetê hêzanê teberê merdimîye û dişmenê kurdan ra ameyî qetilkerdene bi hurmetî yad kenê. Ma sozê xo yê Kurdîstano azad o ke do sinoranê ci de kesêk nêmiro newe kenê. Domanê şarê ma welatê xo de hetê  hêzanê îşxakereran ra seserrî yo ke yenê qetilkerdene.  Doman, cinî, ciwan û pîrê ma yê ke vizêr Dêrsim, Zîlan, Koçgîrî, Pîran, Dara Henî, Amed û Agîrî de ameyî qetilkerdene ewro zî Rojawan de yenê  bombardûmankerdene. Têna yew sûcê înan esto ke wazenê welatê xo de bi nasnameyê xo azad biciwîyê. Senî ke şaîîro pîl Ahmed Arîf vano têna sûce înan oyo ke ê pasaport ra hes nêkenê.

Talîmatê Qirkerdişê Roboskî Erdogan bi xo da. Erdoganî ra persenê vanê mîyanê 40-50 kesna de beno ke yew PKKyij bibo. Ma se bikerê. Erdogan vano hemeyan bikeşê. Înan ke bi qatiran bar kiriştêne se ney hezar doman û ciwan bîyênî zî Erdogan reyna talîmatê kiştişî dayêne. Vera kurdan bi nê  zîhnîyetê qirkerdişî  şer yeno rayraberdene. Seba nê hêzanê qirkerdoxan qiymetê kurdan çîn o.  No zîhnîyet talîmatê kiştişê yew mîlyon kurdan zî dano.  Xora talîmatê Qirkerdişê Armenîyan zî bi eynî zîhnîyetî ame dayene.  Roboskî hêrişê ke qirkerdişî bi. Heme hêrişê dewleta tirke yê vera kurdan bi waştişê qirkerdişî benê.

Dewleta tirke zî qebûl kerd ke teyarayanê tirkî hêriş kerd. La seba ke talîmatê hêrişî cayo tewr berzî ra ameyo dayene, qetilkarê ke eşkarayê înan ra kesêk nêame hukmkerdene. Roboskî de têna înan ke qeymeqam protesto kerd nê ameyî hukmkerdene. Sûcdarî nênê cazakerdene. Bi naye mesajê kiştişê kurdan serbesto yeno dayene. Seserrî yo vera kurdan na polîtîkaya qirkerdişî yena caardene.Seba 33 kurdanê ke Qirkerdişê Qelqelî de ameyî qetilkerdene generalêk yeno hukmkerdene û naye rê vanê Sendromê Genaral Muglaliyî. Bi naye yeno vatene ke eke şima leşkeranê payeberzan hukm bikerê  çew do kurdan nêkişo. Coka sûcdarî nika nênê hukmkerdene ke wa kurdî bi rehetî bêrê qetilkerdene. Dewaya JITEMî de hewteyêk cuwa ver heme sûcdarê ke ameyêne hukmkerdene ameyî veradayene. Bi naye leşker û polîsan ra ame vatene ke şima serbestê eşkenê kurdan bikeşê. Xora nê semedî ra leşker û polîsî ne exleq nê qanûn nas kenê bi talîmatê Erdoganî hêrişê kurdan kenê.

Nê raştîye ramojnenê ke ne qetilkarê Roboskî ne zî ê Cizîre Nisêbîn û Sûrî yenê hukmkerdene. Hesabê nê qirkerdişan têna bi girdkerdişê têkoşînê azadîye û demokrasî eşkeno bêro persayene. Eke Kurdîstan azad bo heme qirkerdoxî do qehr bibê û cezaya tewr pîle bigerê. Qirkerdişê Roboskî do nêro vîrrakerdene. Qirkerdişê ke wextê xoverdayîşê xoîdarekerdişî de ameyî kerdene do nêrê vîrrakerdene. Înanê ke bi vatişê cinî zî bo, doman zî bo çiyo ke hewce keno bikerê talîmat da û cinî û domanî qetil kerdî ê zî do nêrê vîrrakerdene. Qesasê heme qirkerdişan do bêro girewtene. Hesabê Dayîka Taybete, Cemîleyan û domanê ke Şehba de ameyî qetilkerdene do bêro persayene. Ma do têkoşînê Kurdîstanê Azadî gird bikerê. Ma do Kurdîstan Azad bikerê û Tirkîyaya Demokratîke û Rojhilatê MÎyanêno Demokratîkî awan bikerê û qetilkaran ra hesab bipersê.‘‘