Hemserekîya Konseya Rayberdişî ya KCKyî derheqê 3 cinîyanê şorişgêran ê kurdan ê ke 9ê çeleyê 2013î de Paris de ameyî qetilkerdene de eşkerayîyêka nuştekîye daye. 

Eşkerayîya KCKyî wina ya:

"7 serrî verê cû 3 cinîyê şoşgêrî bi fermanê Erdoganî û MÎTî ameyî qetilkerdene. Ma nê şehîdanê azadîye bi rêzdarî yad kenê. Ma do teqez Şorişê Kurdîstanî  bi keda Sara (Sakîne Cansiz), Rojbîne (Fîdane Dogan) û Ronahî (Leyla Şaylemez) awan bikerê. Ma do Sêvê Demîr, Pakîze Nayir û Fatma Uyar ê ke xoverdayîşê xoîdarekerdişî de Silopî şehîd bîyî bi rêzdarî yad kenê. Xoverdayîşê înan bîyî kilîdê têkoşînê azadîye yê ma.

Qirkerdişê Parisî hêrsê ma yê şorişgêrî zêde kerd. Ma soz dabi ke ma do qesasê înan bigêrê û ma sozê xo ard ca. 2 îdarekarê payeberzî yê MÎTî bi operasyonê Qesasê Şorişgêrî yê Sakîne Cansiz ameyî destvistene. Îxanetêk û sucêk do bê caza nêmano.

No qirkerdiş paytextê Fransa Paris de ame kerdene. Coka Fransa binê berpirsîyarîye de ya. No qirkerdiş tarîxê Fransa de serebûtê Dreyfusî yo diyîn o. Ma venga roşnvîran, cinîyan û demokratanê Fransa danê ke nê qirkerdişî roşnî bikê.

Sara, Ronahî Rojbîne, Sêvê, Pakîze û Fatma şehîd bîyî la hesretê înan ê azadîye, têkoşînî û xoverdayîşî her ke şono beno pîl. Efsaneyî nênê kiştene. Embaze Sara zîndanan de îşkenceyan de, têkoşînê gerîlayan de, rêxistinbîyayîşê cinîyan de bîye sembola azadîye. Qirkerdişê aye kerd ke a biba efsaneyêke.

Tewirê embaze Sara û kesayeta ci ya bihêze kesayeta cografyaya Kurdîstanî û şarê kurdan a. Kesayeta Sara kesayeta Dêrsimî ya. Şarê ma yo ke şexsê embaze Sara û pêro şehîdan de werişt payan ser ewro hînî seba pêro dinya bîye hêvîya cuya azade û demokratîke.

Ma embazanê xo Rûbar, Xelîl û Murad ê ke serra 2017î de Qendîl de şehîd bîyî bi rêzdarî yad kenê û ma sozê xo dibare kenê ke ma do xeyalê înan ê Kurdîstanê Azadî bîyarê ca. Keda înan a seba şarê ma do qet nêra vîrkerdene. 

Ma sere de embazan Sara û Rûbar rê soz danê pêro şehîdan ke Rojhelatê Mîyanênî de no adirê azadîye do her tim bêro geşkerdene, pêro xirabîyî bêrê çinkerdene û Rojhelato Mîyanên do bêro resnayene Dewirê Medenîyetan ê Demokratîkan."