Komîteya Şaran û Bawerîyan a KCKyî bi wesîleya Roşanê Remezanî eşkerayîyêka nuştekîye daye û nê vatî:

''Ma sey têgêrayîşî Roşanê Remazanî yê Alemê Îslamî bimbarek kenê û hêvî kenê ke roşan komelê Rojhelatê Mîyanênî  û alemê îslamî rê edalet, seyyewbînîye azadîye bîyaro, mabênê şaran û bawerîyan de haştîye û wayûbiratîye bikero hakîm û bibo wesîleya înşayê cuyeya demokratîke.

Ma sey şarê Rojhelatê Mîyanênî nê roşan zî binê şerê giranî, pêkewtiş û têkoşînê komelkî de bimbarek kenê. Şarê muslumanî cografyayanê cîya cîyayan de tengayî ancenê. Sere de Gazze, Sûrîye, Rojawan, Başûr warê gerîlayan xeylê waranê Rojhaletê Mîyanênî de komelê muslumanan  aşma Remazanî binê qirkerdişan, zulum, zext, vêşanîye û neçarîye de û bi têkoşînê komelkî ravîyarnaye.

Gazze de rixmê aşma Remazanî hêrişan dewam kerd. Sûrîye de elewîyî raştê qirkerdişî ameyî. Rojawan de îbadetê rojeyî Awbendê Tişrînî de bi xoverdayîşê biheyebetî yê şarî yê vera hêrişan ravîyert. Warê gerîlayan  rixmo ke adirbirnayîş îlan kerdo bi seyan reyî bi tanq, top, droneyan û teyarayanê şerî dîya bombayan ver. Têkoşîno ke muslumanan Aşma Bimbareke ya Remazanî de vera hêrişan dayo hendê îbadetê înan bimbarek o. Muslumanê ke her ca de xover danê, ma roşanê înan bimbarek kenê û veng danê ke paştî bidê têkoşînê demokrasîyî ke serkêşîya şarê kurdî de yeno rayraberdene.

Kurdîstanijê welatperwerî yê erjîyayeyî:

Ma Rojhelatê Mîyanênî de prosesê newî yo ke do bêro averberdene, rê şahîdê kenê. Têkoşîno gird ê kurdan de yo ke 8ê adare de dest pêkerd û Newroze de resa tîtik xeylê mesajê muhîmî ameyî dayene. Nê prosesî de îmkanê înşakerdişê Komelê Ehleqî û Polîtîkî her wextî ra zafêr o. Nê prosesî de sey her kesî wezîfe û berpirsîyara şima seyda, alîmanê dînî û rayberanê bawerî est a. Ma şima ra pawenê şima semedê demokrasî, edalet û azadîye têkoşîn bikerê.

Ma reyna roşanê şarê xo yê welatperwerî û dostan bimbarek kenê û hêvî kenê ke nîyetê înan bêrê ca. Roşan de gerek ma dahîna zaf wayîrê şehîdan xo bivejê. Şehîdgehî gerek bi girseyî bêrê zîyaretkerdene, paştî bidiyo keyeyanê şehîdan û tepişteyan. Ma zî sey têgêrayîşî bi vesîleya nê roşanî şehîdanê xo bi hurmet û mînetî yad kenê û vanê ke ma do têkoşînê xurtêr bikerê û dewaya heqdar a kurdan ser bifinê.

Ma veng danê şarê kurdî ke wa yewîya xo xurt bikero, paştdayîş û hetkarîya xo aver bêro. Ma veng danê komeleyanê Rojhelatê Mîyanênî, hetanê muslunanê demokratîkan wa bi zanayîşê netewa demokratîke xo rêxistin bikerê û yewîya şaranê demokratîkan ê Rojhelatê Mîyanênî aver bêrê. Ma reyna hêvî kenê ke no roşan bibo wesîleya edalet,wayûbiratîye û azadîye. Sere de şarê kurdî ma roşanê heme şaranê muslumanan û şaranê Rojhelatê Mîyanînî bimbarek kenê.''