Hemserekîya Konseya Rayberdişî ya KCKyî bi wesîleya rojbîyayîşê 71. yê Rayberê Şarê Kurdî Abdullah Ocalanî eşkerayîyêka nuştekîye daye. 

Eşkerayîya KCKyî wina ya:

''Rayber Apo dadîyêke ra ame dinya. No dadîrabîyayîş heman wextî de ganîbîyayîşê tecrubeyê kultur û tarîxêkê hîrayî û xorînî yo. Oyo ke Rayber Apoyî pîl keno zor û zehmetîya têkoşînê ey o. Têkoşînê Azadîye yê Kurdîstanî têkoşîno tewr zehmet ê azadîye yo. Na cografya de têkoşînê vera dişmenanê demokrasî û azadîye Rayberê nê têkoşînî keno pîl, kerd pîl. Rayber Apo xora hînî têna rayberê şarê kurdî nê, rayberê demokrasî û azadîye yê Rojhelatê Mîyanênî û pêro merdimîye yo.

Rayber Apoyî cuya xo bi temamî dîyarîya azadîya şarê kurdî kerde. Rayberîya têkoşînê azadîye yê şarê kurdî her hetî ra berê averşîyayîş û xurtbîyayîşî akerdî. Pê xorînbîyayîşê xo yê îdeolojîkî û teorîkî, paradîgmaya cuya demokratîke û azade ya Rojhelatê Mîyanênî û merdimîye afernaye.

Musayîşê cuya Rayber Apoyî musayîşê qanûnê têkoşînê demokrasî û azadîye yê şarê kurdî yo. Dadîrabîyayîşê Rayber Apoyî yeno manaya newera ganîbîyayîşê şarê kurdî.

Dadîrabîyayîşê Rayber Apoyî yeno manaya newera bîyayîşê cinîyan o. Rayber Apoyî seba hûrmetê erdê xo, seba hûrmetê cinîya ke ci ra bîyo, seba hûrmeyê Dayîka Uveyşe xet û îdeolojîya azadîya cinîyan awan kerde. Coka her kesî ra zêdêr cinîyî rojbîyayîşê Rayber Apoyî fîraz kenê.

Ma rojbîyayîşê 71. yê Rayber Apoyî fîraz kenê. Girîngîya ey bi vejîyayîşê vîrusê Korona hîna zêdêr ame famkerdene. Rayber Apoyî ardbi ziwan ke felaketê sey vîrusê Korona do biqewimîyê, naye ra zî ganî kapîtalîzm, endustrîyalîzm û modernîte ra fek bêro veradayene. Rayber Apoyî heman wextî de îfade kerdbi ke zanyarê ke xizimkarê kapîtalîzmî yê felaketanê winasênan anê sereyê merdimîye.

Rojbîyayîşê ey ê 71. de seba ke bîyarê vîrê xo ke Rayber Apo seba kurdan, cinîyan, şaran û merdimîye yeno çi mana, seba azadîya rayberêkê winasênî ganî têkoşîn bêro pîlkerdene. Coka ma venga cinîyan, ciwanan, şaranê Tirkîya, merdimîye, antîkapîtalîstan û komelpawitoxanê demokratan danê ke seba azadîya Rayber Apoyî têkoşîn pîl bikerê, nê esasî ser o têkoşînê azadîye û demokrasîyî yê merdimîye aver berê.

Bi na wesîle sey sembolê tewirê ekolojîkî yê Rayber Apoyî ganî ma 4ê nîsane de leyanê daran ronê û vera kapîtalîzmî tewirê xo bimojnê.''