Hemserekîya Konseya Rayberdişî ya KCKyî derheqê teqayîşê madenî yê qezaya Amasra ya Bartinî de eşkerayîyêke daye. Eşkerayîye wina ya:

''Teqayîşê madenê komirî yê Bartin-Amasra ra dima xeylêk karkeran dinyaya xo bedilnaya û xeylêk karkerî zî birîndar bîyê. Nê serebûtî ma bi xorinî dejnayî. Ma karkeranê ke wefat kerd rê rehme wazenê û keyeyanê înan rê serweşîye wazenê; birîndaran rê zî şîfaya xeyrîne wazenê.

Tirkîya de hem keda karker û kedkaran yena werdene hem zî ê terkê mergî benê. Raşt nîyo ke mergê karkeran pê qezayê karî û peygoşîye bêrê qalkerdene. Karker û kedkarî seba sîstemê sermaye û kolonyalîzmî qestî ra terkê mergî benê. Îqtîdarê AKP-MHPyî sîstemo ke keda karkeran weno û karkeran terkê mergî keno paweno, bi xo beno no sîstem. Her roje Tirkîya de karker û kedkarî netîceya polîtîkayanê nê îqtîdarî de mirenê, yenê qetilkerdene. Sebebê mergê karkeran polîtîkayê AKP-MHPyî yê.

Îqtîdarê AKP-MHPyî hetê karker, kedkar, cinî û bindestan nê hetê sermayedar, serdest û kolonyalîstan de yo. Seke ê bînan Îqtîdarê AKP-MHPyî yo faşîst mesuldarê mergê karkeranê Bartinî yo. No serebût zî yew qirkerdiş o û qirker zî îqtîdarê AKP-MHPyî yo.

Seke her qirkerdişî ra dima qewimîyayo reyna kurmayê qirker û dizdî yê AKP-MHPyî şîyê cayê serebûtî, zurî ra bermayî û înan kerd ke sûcê xo binimnê. Ma pê bawer ê ke sere de şarê Bartinî pêro komelê Tirkîya pê nê rîyê sexteyî yê AKP-MHPyî hesîyayo û do hesabê nê qirkerdişî biperso.

Îqtîdarê AKP-MHPyî yo faşîst têna ê karker û kedkaran nê dişmenê pêro bindestan, kurdan, elewîyan, feqîran û cinîyan o. AKP-MHPyî pê nê polîtîkayanê dişmenîye Tirkîya vurnaya sîstemê dizdîye û mezbexane.

Serebûtê Bartinî rîyê AKP-MHPyî yo qirker û kolonyalîst eşkera kerdo û mojna ke heta ke no îqtîdar nêşoro sîstemê dizdîye û kolonyalîzm zî nêrijîyeno. Heta ke ê îqtîdar de bibê mergê karkeran do nêqedê. Ganî şarê Tirkîya, cinî, ciwan, kedkar û karkerê Tirkîya nê îqtîdarî ra cade bixelisê. Rayîrê ney zî no yo ke ganî pêro kesê ke ziwan, kultur, bawerî û nasnameyê ci qedexe yê, azadîya înan ameya xespkerdene pîya têkoşîn bikerê. Wextê ci ameyo ke îqtîdarê AKP-MHPyî ra bêro xelisnayene. Bi nê hawayî wayîrê kesanê ke wefat kerd, do bêro vejîyayene û Tirkîya de sîstemo demokratîk do bêro awankerdene.

Ma nameyê têgêrayîşê azadîye yê Kurdîstanî û şarê kurdî ser keyeyanê karkeranê ke wefat kerd rê serweşîye wazenê. Şarê kurdî nê dejan zerrî ra hîs keno, pare keno û destekê xo pêşkêşê şarê Bartinî keno.''