Hemserekîya Konseya Rayberdişî ya KCKyî bi eşkerayîyêke seba ke Komîteya Wezîran a Konseya Ewropa (KE) derheqê tecrîdê vera Rayberê Şarê Kurdî Abdullah Ocalanî de wext dayo Tirkîya nêrazîbîyayîşê xo mojna.

Eşkerayîye wina ya:

''20ê êlula 2024î de Komîteya Wezîran a KE derheqê bira qanûnê Heqê Hêvîye de tewirê xo çapemenîye rê eşkera kerd. Komîte canêardişê heqê hêvî yê dewleta tirke sey binpaykerdişê heqan ercnabî û waştbi ke Tirkîya na babete de gamêke bierza. Coka KE serrêke wext dabî Tirkîya. La dewleta tirke seba ke Rayber Apo nê qanûnî ra fayde nêkero nêwazena bire bîyara ca. Rixmo ke tewirê îqtîdarê AKP-MHPyî yê faşîstî wina yo, ancî Komîteya Wezîran wext dayo Tirkîya ke na bire nêna qebulkerdene.  Rayber Apo nêeşkeno 'heqê hêvîye' ra îstîfade bikero û Îmrali de sîstemê îşkence û qirkerdişî est o. 

Rayber Apo 26 serrî yo binê nê sîstemî de tepişîyeno, 4 serran o vera ey tecrîdêko mutleq yeno caardene. Nê halî de ancî Tirkîya rê wextdayîş meşrûkerdiş û tolerekerdişê tecrîdî yo.Herinda ke Komîteya Wezîran cade bi dewleta tirke game bida eştene ancî wext dayo ci û ney zî na netîce arde ca.

Dewleta tirke heta ewroyî qirkerdişê kurdan bi destekê Amerîka, Ewropa ûsn. ard ca. Komployo Mîyanneteweyî zî bi destekê nê hêzan ame kerdene. Nika zî îqtîdarê AKP-MHPyî bi destekê Ewropa, Îsraîl, Amerîka û NAToyî qirkerdişê kurdan keno. Dezgehanê Ewropa zî heta nika vera ney mesuldarîyê xo nêardî ca û tewirêk nêmojna. Derheqê kurdan û Rayber Apoyî de binpaykerdişê heqan û sûcî tim bi têgêrayîşê pasîfî pêşwazî bîyî. Mehkemeya Heqanê Merdiman a Ewropa (MHME) zî bire dabî ke Rayber Apo bi hawayêkê edîlî ganî bêro muhakemekerdene la na bire zî nêameye caardene. CPTyî zî tim wext da Tirkîya û kerdişê Tirkîya meşrû kerdî. Nika zî Komîteya Wezîran a KE heman tewirî mojnena. La ganî Komîte cade têbigêrayêne. Coka tewirê Komîteya Wezîran qîm nêkeno û binpaykerdişanê heqan ê dewleta tirke meşrû keno.

Dewleta tirke ya qirkere û îqtîdarê AKP-MHPyî yo faşîst wazenê ke bi destekê teberî, bi tecrîdê mutleqî îşxalê Kurdîstanî û hêrişanê vera gerîlayan rê dewam bikerê û qirkerdişê kurdan bîyarê ca. Ganî her kes vera sûcanê dewleta tirke û îqtîdarê AKP-MHPyî mesuldarîya xo bîyaro ca. Sere de Konseya Ewropa pêro dezgehê Ewropa û selahîyetdarî bi mesuldarî têbigêrê.

Sere de huqûqnasî ma venga pêro pawitoxanê heqanê merdiman û dezgehanê huqûqî danê ke nêzdîbîyayîşê bi Rayber Apoyî sûcê vera merdimatîye yê, hêrişê vera erjanê merdimatîye yê coka vera nînan tewir bigêrê.

Dewleta tirke heta nika pêro birê dezgehanê mîyanneteweyîyan binbay kerdî. Bira binpaykerdişî ya Komîteya Wezîran zî ancî mojna ke têkoşînê ma yê vera dewleta tirke çendek raşt o. Girîng o ke têkoşînê seba azadîya Rayber Apoyî dewam bikero. Ma sere de şarê Kurdîstanî pêro şaran, cinîyan, ciwanan, şorişgêran, demokratîkan û azadîgîran danê ke vera hêrişanê îşxalî, tecrîdî û qirkerdişî têkoşînê azadîye yê globalî xurtêr bikerê.''