Hemserekîya Konseya Rayberdişî ya KCKyî derheqê hêrişanê peyênan de eşkerayîyêke daye. Eşkerayîye wina ya:

''Pê destê ajan û xayînan dewleta tirke ya kolonyalîste 28ê tebaxe de welatperweranê Başûrî û Endamê Konseya Rayberdişî ya Tevgera Azadî Sûheyl Xûrşîd Ezîz qetil kerd. Ma nê hêrişî şermezar kenê û hêrişkeran rê lanet kenê. Sere de keyeyê ey rê, ma komelê Tevgera Azadî û pêro şarê Kurdîstanî rê serweşîye wazenê. Şexsê Sûheyl Xûrşîd Ezîzî de ma şehîdanê şoriş û demokrasî bi rêzdarî yad kenê; soz danê ke wayîrê vîrameyîşê şehîdanê xo vejîyê.

Têkoşînê Azadîye yê Kurdîstanî prosesêkê krîtîk û tarîxîyî de yo. Şarê Kurdîstanî 100 serran ra zêdeyêr o vera kolonyalîzmî têkoşînêkê bêemanî keno û pê bedelanê pîlan destkewteyê girîngî vistî destî. Dewleta tirke ya qirkere wazena çar parçeyanê Kurdîstanî de têkoşînê azadîye bixeniqna, destkewteyan çin bikera û reyna kurdan rê kolonyalîzmî ferz bikera. Dewleta tirke seba nê armancî hêrişê xo zêdînayî, nê hêrişî Rojawan, Şingal, Mexmûr û Vakurî ra heta her cayî yenê kerdene. Dewleta îşxalkere pê nê hêrişan karakterê xo eşkera kena.

Hêrişê vera  embazê welatperwerî Sûheyl Xûrşîd Ezîzî parçeyêkê qirkerdişê vera kurdan o. Embaz Sûheyl Xûrşîd Ezîzo ke bi nameyê Mamosta Şemalî şinasîyeno, merdimêko welatperwer û têkoşêr bi. Ey emrê xo da azadîya Kurdîstanî, rayîrê şehîdan de şi, peyê xo de mîrasêkê pîlî têkoşînî verda û şehîd bi. Bêguman şarê Kurdîstanî do wayîrê mîrasê ey vejîyo. Mamosta Şemal heman wextî de roşnvîrêko kurd bi, o cografya û tarîxê Kurdîstanî ser o zaf xebitîya. Qetilkerdişê roşnvîrêkê winasênî cayê xemgînîye yo. La şehadet seba Têkoşînê Azadîye vînîbîyayîş nê çimeyê hêzî yo.

Dewleta tirke hêrişê hewayî vera herêma Soranî zêdînayî ke no bêsebeb nîyo. Dewleta tirke seba ke xeta welatperwerîye tasfîye bikera û xeta îxanet û ajanîye Soran de serwer bikera hêriş kena. Netewebîyayîşê kurdan û averşîyayîşê Têkoşînê Azadîye de herêma Soranî wayîra cayêkê taybetî ya. Herêma Soranî de hişmendî û welatperwerî awan bîye, ameya pawitene û resaye nê wextî. Na taybetmendîya herêma Soranî seba Kurdîstanî û şarê kurdî zaf girîng ê. Dewleta tirke nê tewirê herêma Soranî xo rê sey astengîyêke vînena û wazena pê hêrişan na xeta herêma Soranî çin bikera. Sere de şarê ma yê Soranî ganî temamîya şarê Kurdîstanî na raştîye bizano û vera hêrişan tewirêkê xurtî bimojno. Roşnvîr, nuştox û hunermendê kurdî zî ganî na raştîye bivînê, komelî zane bikerê û seba pûçkerdişê nê plananê dişmenî bi erk û mesuldarîya xo wurzê payan ser. Hêzê sîyasî yê Kurdîstanî, vera nê hêrişanê serê Soranî xeta welatperwerîye de xo biresnê pê, vera hemkarî, ajanî û îxanetî tewirêkê xurtî bimojnê.

Dewleta tirke ya qirkere têna hêrişê şerwananê azadîye nê hêrişê welatperweran zî kena û wazena pê nê hêrişanê vera welatperweran îradeyê şarî bişikna, verê têkoşînî bigêra. Ganî şarê ma bizano ke dişmen wayîrê armancêkê winasênî yo û bi na hişmendîye têbigêro û seba pûçkerdişê nê hêrişan her ca de xo bipawo. Seke dîyeno dişmen her ca de hêrişan keno. Ver anê hêrşan ganî şarê ma her ca de xo bipawo û vera hêrişan pawitişê xo biaferno. Ma têna xo nêpawê, her ca de ajan û xayînan tesbît bikerê, ceza bikerê.

Îdîayê ke vanê 'dewleta tirke têna hêrişê PKKyî kena, rîyê PKKyî ra hêriş kena' zûrêka pîl a. Qirkerdişê Sûheyl Xûrşîd Ezîzî û Abû Zêyd Ebdullah Ubeydî reyna mojna ke nê îdîayî zûr ê. Hemkarê dewleta tirke û êyê ke xayînîye kenê wazenê atmosferêkê winasênî biafernê. La eşkera yo ke no xîret bêfayde yo. Dewleta qirkere dişmenê kurdan a û hêrişê her keso ke seba azadîya Kurdîstanî têkoşîn keno, kena. PKk seba pawitiş û azadîya Kurdîstanî têkoşîn keno coka hêrişê PKKyî yeno kerdene. Dişmen zaneno ke heta ke PKK est bo do nêeşko kurdan qir bikero. Coka hêrişê PKK û gerîlayan keno.

Vizêr dewleta tirke hêrişê Behrava ya Xanesorî ya Şingalî û Kampa Mexmûrî kerd. Kampa Mexmûrî de embaz Ebû Zeyd Enbdullah Ubeyd ame qetilkerdene. Embaz Ubeyd sey Mamosta Şemalî welatperwerêko pîl û merdimêko têkoşer bi. Ma nê hêrişî şermezar kenê û embaz Ubeydî bi rêzdarî yad kenê. Sere de keyeyê ey rê, ma şarê Mexmûrî û Kurdîstanî rê serweşîye wazenê. Nê hêrişî kiştoxî û karakterê dewleta tirke reyna eşkera kerd Sere de şarê Mexmûrî û Şingalî ganî pêro şarê Kurdîstanî vera nê hêrişan hêrs û tewirê xo bimojno.

Girîng o ke Hukmatê Iraqî û Hukmatê Herêmî yê Başûrê Krudîstanî vera nê hêrişan tewirê xo bimojnê. Merdimê ke ameyî qetilkerdene hemwelatîyê Başûrî û Iraqî yê. Dewleta tirke çend reyî tîya de qirkerdiş kerd. La ne hukmatê Başûr ne zî hukmatê Iraqî nêrazîbîyayîşêko cidî nêmojna. Wexto ke qirkerdişê Perexî de şarî nêrazîbîyayîşêko pîl vera dewleta tirke mojnabi hukmatî û hêzanê sîyasîyan bi şenikî nêrazîbîyayîşê xo mojna. Eke wayîrê nêrazîbîyayîşê şarê Iraqî û Başûrê Kurdîstanî biameyêne vejîyayene nê hêrişî do nêameyêne kerdene. Coka nê hêrişan de mesuldarîya Iraq û Başûrî zî est a. Înan bêtewirîya xo reyde şirîkîya dewleta tirke kerde. Mesuldarîya înan a ke vera hêrişanê dewleta tirke tewirê xo bimojnê.

Bêguman şarê Kurdîstanî do wayîrê şehîdan û têkoşînê şehîdan vejîyo û nê hêrişan pûç bikero. Nameyê Têgêrayîşê Azadîye yê Kurdan ser o, şexsê Sûheyl Xûrşîd Ezîz û Ebû Zêyd Ebdullah Ubêydî de ma reyna şehîdanê demokrasî û şorişî yad kenê û soz danê ke têkoşînê înan ser bivisnê.''