Hemserekîya Konseya Rayberdişî ya KCKyî bi eşkerayîyêke veng da kurdan ke wa her ca de vera hêrişanê kîmyewîyan ê dewleta tirke wirzê payan ser.

Eşkerayîya KCKyî wina ya: ''Ewropa de sere de DusseldorF, Stockholm, Marsilya û xeylêk bajaranê bînan de kurdan û dostanê înan bi çalakîyanê protestoyî yê girdan vera hêrişê kîmyewîyî yê dewleta tirke yê vera gerîlayan nêrazîbîyayîşê xo mojna. Sere de Amerîka û Almanya de dewletê Ewropa pê bêvengîya xo paştî danê sûcanê şerî yê faşîzmê AKP-MHPyî. Enternasyonalîstan û dostan vera nê hêrsê xo mojna. Pê çalkîyanê biheybetan moral dîya gerîlayan û şarê kurdî. Semedê nê tewirê bimanayî ma êyê ke tewrê nê çalakîyan bîyî selam û pîroz kenê. Nê çalakîyê Ewropa zaf muhîm ê. Ganî nê çalakîyê bêrê xurtêrkerdene û heta ke verê hêrişanê kîmyewîyan bêro girwtene dewam bikerê.

Vera hêrişanê kîmîyewîyan ê dewleta tirke ya qirkere sere de Silopî Kurdîstan û Tirkîya de zî şarê ma û dostan çalakîyî kerdî.  Çalakîyê Silopî û Îstanbulî zaf muhîm bê. Rojawan, Şingal, Mexmûr û Başûrê Kurdîstanî de zî pê çalakîyan vera hêrişanê kîmyewîyan nêrazîbîyayîş ame mojnayene û dewleta tirke ya qirkere ameye protestokerdene. Gerîlayî semedê Kurdîstan û şarê ci ganê xo feda kenê. Coka ganî roja winayêne de heme welatperwerî paştî bidê gerîlayan. Şarê kurdî yo welatperwer rixmê bedelanê girdan tim paştî dano têkoşînê azadîye û vera hêrişanê qirkerdişî yê dewleta tirke xo paweno. Seba ke heme şertan de xeta azadîye de israr keno ma şarê welatperwerî yê Kurdîstanî zerrî ra pîroz kenê veng danê ke wa nê têkoşînê serkewtişî bi ruhê seferberîyê  xurtêr bikero.

Dewleta tirke ya qirkere têna ewro nê verî zî vera kurdan çekê kîmyewîyî şuxulnayî.  Ganî vera sûcanê merdimîye yê dewleta tirke ke qet çew bêveng memano. Kam ke vera nê hêrişan bêveng bimano hemkarê nê sûcî yo. Wa no zaf hol bêro famkerdene. Bêvengmendiş qebulkerdiş o, şîrikbîyayîş o. Dewleta tirke pê paşta NATO û dewletena Ewropa nê hêrişan kena. Îdareyê Başûrê Kurdîstanî zî vera sûcanê şerî yê dewleta tirke bêveng o. PDK xora şîrikê nê şerê leyminî yo. Parlamentoyê Kurdîstanî ke xeylêk partîyî tede ca genê heta ewro hema vera hêrişan tewirê xo nêmojnayo. Şarê kurdî nê qebul nêkeno.  Dewleta tirke wazenê kurdan çîn bikero vera gerîlayanê azadîye çekanê kîmyewîyan şuxulnena. Êyê ke vera nê nêvejîyênî senî eleqeya înan bi kurdîtîye bena? Senî eşkenê xo rê vajê îdareyê kurdan? Başûrê Kurdîstanî wextê Helepçe de çekê kîmyewîyî dîyî la ewro îradeyê Başûrî vera nê hêrişan bêveng o. Hêzê sîyasîyî yê Başûrî vera sûcanê şerî yê dewleta tirke bêveng ê. Çîyo winayên nîno qebulkerdene.

Ganî demokrat û welatperwerî, roşnvîr, hunermend û nuştoxê Başûrê vera nê hêrişan tewir bigêrê. Hêrişê kîmyewîyî hema her roje dewamkenê. Ganî kurdî her ca de wirzê payan ser heta rijnayîşê îtîfaqê AKP-MHPyî mevindê. Wa her kes vera sûcanê şerî yê dewleta tirke vengê xo berz bikero.''