Kongreya 20. ya KNKyî ewro nêmroje bi beşdarîya sîyasetmedar, roşnvîr, akademîsyen û hunermendan ê kurdan û çar parçeyanê Kurdîstanî ra bi beşdarîya temsîlkaranê rêxistin, partî û dezgehan dest pêkerde. Çarçewa tedbîrê vîrusê Korona de kongre bi online yena kerdene.

Kongre de hêverî mesajê partîyan û temsîlkaranê şar û bawerîyan ameyî wendene.

Hemserekîya Konseya Rayberdişî ya KCKyî zî kongre rê mesajêk erşawit.

Mesajê KCKyî wina yo:

''Seba ke kurdî nîzamê neweyî yê dinya de canêgêrê hêzê kolonyalîst û qirkerî seferberîye kenê. PDK zî heyf ke paştî dano hêrişanê peyênanê ke koordîneya DYA de bi destê dewleta tirke yenê kerdene.

No tewirê PDKyî kurdan keno qels û keno ke kurdî maruzê hêrişan bibê. PDK paştî dano hêzanê dişmenî û seba naye paweno ke do bibo bihêzê. La  mîsalê tarîxê kurdan mojnenê ke no xafletêko pîl o.

Pêro hêrişê dewleta tirke yê vera Mexmûr, Şingal û Başûr, Vakur, Rojhelatê Kurdîstanî bi koordîneya DYA û paştdayîşê PDKyî yenê kerdene. Kurdî tehlukeyêkê pîlî reyde têrî yê. Eke kurdî tewirêkê neteweyî nêmojnê do nêeşkê xo nê qirkerdişan ra bipawê.

Şarê kurdî her wextî ra zêdêr hewceyê yewîya neteweyî yo. La heyf ke vera yewîya kurdan de astengîyî estê. Zanîyeno ke PDK nêno xebatanê yewîya neteweyîye. Xora PDK pê pêro hêzê xo keno ke Têgêrayîşê Azadîye yê Kurdan bin bikewo. Eke PDK tewrê xebatanê yewîya neteweyîye nêbo ma eşkenê yewîya kurdan awan bikerê? Ganî ma pabeyê PDKyî vinderê? Ganî kurdî bi lezî xo rêxistin bikerê û teda bikerê ke PDK bêro xeta yewîya neteweyîye ser. Eke PDK wina nêkera ma do bê PDK yewîya neteweyîye awan bikerê. Na babete de rolêko pîl keweno milê KNKyî.

Şarê kurdî wa bibo yew û pîya vera peymana Bexdad û Hewlêrî ya seba Şinaglî nêrazîbîyayîşê xo bimojno. Ganî Şingal têna meverdê. Ma eşnawit ke Şingalî ra dima seba Mexmûrî zî plano winasên do bêro kerdene. Eke ma verê nê planan nêgêrê her ca de seba tasfîyeya kurdan xîretî do dest pêbikerê. Ma pê hêvîdar ê ke şima do na kongreya xo de seba wayîrvejîyayîşê Şingalî, azadkerdişê herêman ê îşxalkerdeyan ê Rojawanî tay biran bigêrê.

Azadîya Rayber Apoyî seba ma wezîfeyêko welatperwer o. Ma pawenê ke şima na kongre de azadîya Rayber Apoyî bikerê rojdemê verênî û seba naye biran bigêrê.

Ma pê Hemleya 'Tecrîd, Faşîzm, Îşxalî rê Bes o; Wext Wextê Azadîye yo' wazenê têkoşînê azadîye yê Kurdîstanî ser bivisnê. Ma pê bawer ê ke şima (KNK) do pê xebatanê xo yê dîplomasîyan seba yewîya neteweyîye rolêkê pîlî bîyarê ca û seba pawitişê destkewteyanê kurdan têkoşînê ma rê bi hawayêkê giranî paştî bidê. Eke ma mesuldarî û wezîfeyanê xo yê tarîxîyan bîyarê ca serkewtiş do bibo ê ma. Nê esasî ser o ma zerrî û canî ra şima rê selam kenê û xebatanê şima de serkewtiş wazenê.''

Nêmroje ra dima Hemserekê KNKyî Ehmed Karamusî raporê xebetanê emserre yê KNKyî wend û derheqê pêvînayîşanê înan ê dîplomatîkan de zanayîşî dayî. Kongreya 20. ya KNKyî pê nîqaşan û fikranê delegeyan dewam kena.