Hemserekîya Konseya Rayberdişî ya KCKyî derheqê hêrişanê îşxalî yê dewleta tirke de eşkerayîyêke daye.

Eşkerayîye wina ya:

''Dewleta tirke ya kolonyalîste şewa 19ê teşrîna peyêne vera Başûr, Rojawan, Rojhelat û Herêmanê Pawitişî yê Medya hêrişê hewayî yê giranî kerdî. Nê hêrişan de bi desa cayî ameyî hedefkerdene, xeylêk merdimî şehîd û birîndar bîyî. Ma nê hêrişan şermezar kenê, keyeyanê şehîdan rê serweşîye û birîndaran rê zî şîfaya xeyrîne wazenê. Nê hêrişê AKP-MHPyî do nêresê armancê xo, tewirê şarê kurdî do nêşiknê û verê xoverdayîşê şarê ma de bin bikewê.

AKP-MHP dişmenê kurdan o û tek armancê ci zî qirkerdişê kurdan o. Hêrişê 19ê teşrîna peyêne zî îsbatê ney ê. Nê hêrişan mojna ke îradeyê cuya hempare yê kurdan û şaran binê tehlukeyî de yo. Êyê ke rixmê hêrişan heta nika hetê AKP-MHPyî de bîyî û nê hêrişî meşrû kerdêne hînî hetê şarê ma ra nêrê qebulkerdene.

AKP-MHP têna parçeyêkî nê hêrişê çar parçeyanê Kurdîstanî keno û bi temamî kurdan keno hedef.  AKP-MHP seba ke kurdan qir bikero hêrişanê kîmyewîyan ra heta teyarayanê şerî pêro metodanê vera merdimatîye şuxilneno. Şarê kurdî ganî vera nê hêrişan xo ver bido, her ca de vejîyo meydanan û tewirê xo bimojno. Kurdî vera nê hêrişan de bêveng nêmanê, keyeyê xo de romenişê û  bêvengî û destekê hêzanê hegemonîkan protesto bikerê.

Seke ma verî zî dabi zanayene ke seba hêrişanê vera kurdan û îşxalê Rojawanî yeno waştene ke zemînêk bêro awankerdene. Coka qetî yo ke hêrişê Taksîmî MÎT, îqtîdar û Soyluyî kerdo. Xora nê hêrişî ra dima îqtîdarê faşîstî Rojawan kerdbi hedef. Nê hêrişê 19ê teşrîna peyêne bi nê armanc û nîyetî ameyî kerdene. Îqtîdarê AKP-MHPyî seba ke îqtîdar de bimano pêro rayîr û metodê gemarinî keno. Wa her kes na raştî û planê AKP-MHPyî bivîno û fam bikero. Sey şarê kurdî şarê Tirkîya, hêzê demokrasî û averwazî vera nê plananê tarî û gemarinan ê AKP-MHPyî vejîyê û tewirî bimojnê. Hêrişê vera kurdan faydeyê şaranê Tirkîya, azadîye û demokrasî nêkenê. Eqsê ci yenê manaya hêrişê vera şaran, azadîye û demokrasî. Coka wa her kes vera nê hêrişan tewirê xo bimojno û paştî bido kurdan.

Dewleta tirke pê destek û destûrê hêzanê hegemonîkan nê hêrişan kena. Sere de Amerîka û Rûsya hêzê hegemonîkî bi nê hawayî mojnenê ke ê hemkarê qirkerdişê kurdan ê. Şarê ma ney hol zaneno û goreyê ney têgêreno. La ganî pêro terefgîrê demokrasî û azadîye zî vera nê hêzan tewir bigêrê û vera înan vejîyê.

Hêrişê AKP-MHPyê faşîstî vera îradeyê cuya hempare ya şaran û haştîya herême yê. AKP-MHP bi nê hêrişan armanc keno ke bireso sînoranê mîsak-i mîllî û herême de hegemonyaya xo rono. Îqtîdar mudaxeleyê welatanê herême zî keno, nînan daxîlê qirkerdişê kurdan keno û bi nê hawayî îradeyê înan zî gêno binê îpotekî. Welatê herême bizanê ke heta ke wina têbigêrê do bibê kuklayê dewleta tirke. Coka têna kurdî nê ganî ê zî vera hêrişanê dewleta tirke vejîyê û mebê hemkarê nê hêrişan.

Ma reyna nê hêrişanê qirkeran şermezar kenê û venga her kesî danê ke vera nê hêrişan tewirê xo bimojno û têkoşînî berz bikerê. Şarê ma wa çar parçeyanê Kurdîstanî de û teberê welatî de wurzo payan ser û meydanan de tewirê xo bimojnê. Hêrişê AKP-MHPyî ancax bi nêrazîbîyayîşê pîlî û têkoşînê topyekûnî yenê vindarnayene.''