Hemserekîya Konseya Rayberdişî ya KCKyî bi eşkerayîyêka nuştekîye bale ante rewşa Kampa Mexmûrî ser.

Eşkerayîya KCKyî wina ya:

"Na 25 serrî yo  ke dewleta tirke ya îşxalkere dewî vêşnabî, şarê ma Botanî verê xo da Mexmûrî û uca de multecî yê. Nika Mexmûr de 15 hezar merdimî sey multecî ciwîyenê. Şarê Mexmûrî bi nasname, ziwan û kulturê xo cuyêka newîye awan kerde û heta ke dewaya kurdan çareser nêba nêwazenê abigêrê Tirkîya. La dewleta tirke vera Mexmûrî hêrişanê xo yê hewayî dewam kena.

Kampa Multecîyan a Mexmûrî binê berpirsîyarîya Neteweyanê Yewbîyayeyan de ya û sînorê federasyonê Başûrê Kurdîstanî de ya. Wexto ke DAÎŞ hêrişê Hewlêrî kerd reya verêne şarê Mexmûrî mudaxele kerd. Serebûtêk ra ke eleqayê şarê Mexmûrî bi ey çin o îdareyê Herêma Kurdîstanî dormeyê Mexmûrî girewt. Mexmûr de nêweşî, wendekarî û karkerî nêeşkenê kampe ra bivejîyê. Şarê Mexmûrî na rewşe resnaye Neteweyanê Yewbîyayeyan, Îdareyê Herêma Kurdîstanî, dewleta Iraqî û dezgehan. Ma verê cû zî waşt bi ke no dormegirewtiş bêro wedaritene. La bi mengan tecrîd û dormegirewtişê Mexmûrî dewam keno.

Ganî îdareyê kurdan hetkarî bido na kampe. Dewleta tirke her tim Iraq, Neteweyanê Yewbîyayeyan û îdareyê kurdan ser o teda kena û xîret kena ke na teda kampe de zî vila bika. Yeno eşkerakerdene ke teyareyê înan asmênê Mexmûrî ser o gêrenê. Şarê Mexmûrî parçeyêkê Kurdîstanî yo. Pêro kurdî pawenê ke tecrîd û dormegirewtişê serê Mexmûr bêro wedaritene.

Eke îdareyê Herêma Kurdîstanî nê dormegirewtiş wedara ma pêro do kêfweş bibê. Seba ke şarê Mexmûrî zêde astengîyan nêanco ma waştişê wedaritişê nê dormegirewtişî dibare kenê. Ma hêvîdarê ke îdareyê hukmatê herêma Kurdîstanî do waştiş bîyaro ca."