Komîteya Şaran û Bawerîyan a KCKyî bi wesîleya Aşma Remezanî eşkerayîye daye. Eşkerayîye ra qismêk wina yo:

''Ma kewtê Aşme Remezanî ke semedê alemê muslumanan bimbarek a. Ma hêvî kenê ke Aşma Bimbareke ya Remezanî heme alemê muslumanan rê haştîye û hûzûr bîyaro. Rojeyê Remezanî yo bimbarek wa komelê musluman rê edalet û haştîye bîyaro.

Seydayê ke rayberê bawerî yê şarî yê ganî cayê şarê xoverdayoxî de ca bigîrê. Bi wesîleya rojeyî ma wazenê bifînê vîrî seydayan û şarê kurdî ke eke xoverdayîşê xo û îbadetê xo bikerê yew xeyrê ci dahîna beno zaf. Şaro ke binê îmha û înkarî de yo, îdareyê ci ameyo xespkerdene, bi tecrîdî rî bi rîyo xeyrê ci yo tewr gird xoverdayîş o.

Dewlete bi înkarkerdiş ziwan û kulturê kurdan ayetanê Hûmayî zî înkar kena. Camîyanê tirkan de semedê qirkerdişê kurdan fetva yena dayene. Ma veng danê seydayan ê kurdan ke wa herinda camîyan de warê xoverdayîşî yê şarî de, merkezanê pawitişê şarî, verê şaredarîyan de nimaj bidê kerdene.

Reyna wa şarê ma fitir û zekatê xo herinda dezgehanê tirkan de bido şarê Rojawan û Sûrîye ke erdê xo ra bîyo. Xeyro tewr gird yê Aşma Remezanî paştdayîş o, kesê ke muhtacê înan rê destê xo yê hetkarî dergkerdiş o. Coka şaro ke rîyê şerî ra erdê xo ra bîyo,tengayî anceno ganî înan rê hetkarî bêro kerdene.

Tewiro tewr eheleqî yê rojeyê Remezanê bimbarekî, têkoşîno hempar ê vera îşxal, qeyûm, tecrîd û îşkenceyî yo. Coka ma pawenê ke şarê muslumanî yê Tirkîya û Rojhelatê Mîyanênî rolê xo yê tarîxî bîyarî ca û vera zalim û neheqî cepheyê demokrasî de waranê têkoşînê hemparî de cayê xo bigîrê. Ma hêvî kenê roje, dûa û  nîyetê înan bêro qebulkerdene.''