Komîteya Şaran û Bawerîyan a KCKyî bi wesîleya Roşanê Qurbanî mesajêko nuştekî weşana. Mesaj wina yo:

''Roşanê Qurbanî yê şaranê misilmanan fîraz bi. Ma hêvîdar ê ke Roşanê Qurbanî seba Rojhelatê Mîyanênî, alemê Îslamî wa bo wesîleya haştî, aramî, edalet û weşîe. Bi hêvîya ke roşan bo wesîleya xurtkerdişê dostanî û wayûbiratîya şaran, pîlkerdişê barkerdişî û bihêzkerdişê têkoşînê azadî û demokrasî.

Roşanê Qurbanan roja qedexekerdişê qurbankerdişê merdiman o. Rixmê ney zî her roje cogarafyaya misilmanan de bi desan merdimî kişîyenê. Mesuldarê serekî yê kişîyayîşê nê merdiman polîtîkayê hukmatanê faşîstan û netewe-dewletan ê. Têna sîyaset û hîşmendîya sentezê tirk-îslamî zî her roje benê sebebê kişîyayîşê bi desan merdiman. Polîtîkayê kolonyalîstî yê hîşmendîya Îslamî yê îqtîdarê tirkî Rojhelatê Mîyanênî de bîyî sebebê rijnayîşê gonî, xizanî û talanî. Oyo ke wayîrê hîşmendîya sentezê tirk-îslamî yo minafiq o. Dewleta tirke dînî şuxilnena. Dewlete kultur û ziwanê kurdkî qedexe kena û cuya kurdan a bi kurdayetîye sey sûcî nîşan kena. Bi nê hawayî Homa înkar kena. Îqtîdarê AKP-MHPyî pê vateyanê dînîyan, pê teorîyan û xurafeyan xîret kena ke şarê kurdî bixapîno. Rejîmo faşîst ê AKP-MHPyî hêrişê seydayanê kurdan kerd, ê destbend kerdî û tewr peyên zî nêmê înan tepiştî.

Misilmanê ercîyayeyî yê Kurdîstanî û Tirkîya;

Ma pê bawer ê ke têkoşînê vera polîtîkayanê rejîmê AKP-MHPyî qasê îbadetî xêr o. Wezîfeyo serek yê misilmananê Kurdîstanî û Tirkîya yo ke nêbê hemparê rejîmê AKP-MHPyî. Ma venga kurdan û tirkanê misilmanan danê ke meşorê camîyan û xutbeyanê Dîyanetî. Kurdî wa îbadetê xo bi kurdkî bikerê. No tewirêko Muhammedwarî yo. Înkarkerdişê kurdkî vera ayetanê Homayî yo. Ma wazenê îfade bikerê ke tewir û nêzdîbîyayîşê paştdayîşî yê seba AKP-MHPyî vera Îslamî yo.

Kurdîstanijê ercîyayeyî;

Nê roşanî de zî ganî şehîdgehan zîyaret bikerê û duaya xêre bikerê. Ma bi girîngî îfade kenê ke xêrê xo bidê kesayet û dezgehanê kurdîstanijan ê hewcedaran. Ma pê bawer ê ke hetkarîya ke dîyena dezgehan û kesanê faşîstan hetê Homayî ra nêna qebulkerdene.

Nameyê Têgêrayîşê Azadîye yê Kurdîstanî ser o pê nê hîs û fikran ma Roşanê Qurbanan ê misilmananê Kurdîstanî fîraz kenê. Ma venga şaran danê ke vera dewleta tirke ya înkarkere û qirkere bi rêxistinî têkoşîn bikerê. Bi wesîleya nê roşanî ma şehîdanê têkoşînê azadîye,, şehîdanê 14ê Temmuze û şehîdanê 'Wextê Azadîye' yad kenê, perwerîya xo ya bi înan reyna anê ziwan. Ma roşanê seydan û malayanê Kurdîstanî yê ke hetê dewleta tirke ra tepişîyayî û roşanê keyeyanê şehîdan fîraz kenê.''