KCKyî mesajê xo yê nuştekî de vato ‘Ma 10 embazê xo yê ke 24ê êlula 1996î de zîndanê Amedî de bi qelasanê mêxinan ameybî qetil kerdene, bi rêzgirewtiş û minetî yad kenî û ma soz danî înan ke ma do Kurdistano Azad, Tirkîyaya Demokratîke û Rojhelato Mîyanêno Demokratîk awan bikerî.’

KCKyî îzehetê xo de dayo vîr ke 22 serrî verê bi qelasê mêxin û zopeyê asinênan qetlîyam amebî viraştene û wina dewam kerdo: “Zîhnîyetê ê wextî ewro hetê îqtîdarê faşîstî yê AKP û MHPyî ra yeno temsîl kerdene.”

KCKyî mesajê xo de wina vato:

“24ê êlula 1996î de wexto ke hepsîyî vejîyayênê pêvînayîşî, gardîyan û leşkeran bi qelasanê mêxinan û zopeyanê asinênan hêrişê hepsîyan kerdbî û 10 hepsîyî ameybî qetil kerdene û bi desan hepsîyî zî birîndar kerdbî. Nê hepsîyan ra tayê ci seqet mendî, tayê ci zî nêweşîyê giranî cuyayî. Serra 1996î eynî wext de serra ke vera hepsîyan de hêrişî zêde bîyî ya. Qetlîyamê 1996î nîşan dayo ke hêzê faşîstî eşkenî zîndanan de se bikerî. Na gama sifteyîne ya qetlîyamanê zîndanî ya.

Yê ke qetlîyamê 24ê êlula 1996î û 19ê kanûna 2000î pê ardî, nêameyî ceza kerdene. Tam çepê ci de yê ke nê qetlîyamî kerdî, ameyî xelate kerdene. Polîtîkayê 1980 û serranê 90î ewro hetê îqtîdarê faşîstî yê AKP û MHPyî ra yenî domnayene.

Hêrişê ke Îmrali de vera Rayberê Şarê Kurdî de yenî kerdene, karakterê îqtîdarê faşîstî yê AKP û MHPyî nîşan danî. Nê hêrişî eynî wextî de vera kurd û hetanê demokratan ser o yenî domnayene. Heme zîndanî bîyî cayê zulmî û Tirkîya bi xo bîya zîndanêko akerde. Çîyê ke zîndanan de benî, ewro heme cayê Kurdîstan û Tirkîya de benî.

Zîhnîyetê 24ê êlule ewro hetê îqtîdarê faşîstî yê AKP û MHPyî ra yeno temsîl kerdene. Yê ke o wext waştêne têkoşînê azadî û demokrasî yê kurd û şaranê Tirkîya bipelçiqnî, ewro zî eynî çîyan kenî. Labelê vera ê hêrişan de ti kes teslîm nêbîyo û xoverdayîşî bîyî erjê şarî. Kesê ke ewro zîndanan de xover danî zî moral û hêz danî kurd û hetanê demokratîkan.

Ma qet keyeyê şehîdan û embazanê xo yê ke hêrişê 24ê êlule de seqet mendî xo vîra nêkerdî. Ma înan têkoşînê xo de danî cuyayene û têkoşînê ma berz beno. Xeyalê înan ewro hîna nizdî yî. Ma do bi îrade û bawerîya nê embazan zorê faşîzmê AKP û MHPyî bîşêrî û Kurdistano Azad awan bikerî.”