Hemserekîya Konseya Rayberdişî ya KCKyî bi eşkerayîyêke tewirê Amedî yê vera şefê faşîstî yê Erdogano ke 23ê teşrîna verêne de şaristan de mîtîng kerdbi, fîraz kerd. Eşkerayîye wina ya:

''Şefo faşîst Tayyîp Erdogan 23ê teşrîna verêne ya 2022yî de şi Amed û waşt ke tede mîtîngêk bikero. La şarê Amedî tewirêko ke tarîx û tradîsyonê ci ra yeno mojna û tewrê mîtîngî nêbi. Şarê Amedî bi nê tewirî wayîrê rûmet û welatperwerîya xo vejîya û dersêko tarîxî da şefê faşîstî. Ma nê tewirê ci ra semed şarê Amedî zerrî ra fîraz kenê û selam kenê.

Şefo faşîst Erdogan wayîrê hişmendî û karakterêkê winasên o ke estbîyayîşê kurdan rê gef waneno. Ey na raştîye bi fekê xo zî îtîraf kerd. Îtîfaqê AKP-MHPyî seba ke kurdan qir bikero bîyo îqtîdar. No îtîfaqo faşîst her roje hêrişê estbîyayîş û erjanê kurdan keno û xîret keno ke nînan çin bikero. Şarê kurdî na raştîye zî hol zaneno. Şarê kurdî vera hêrişanê qirkeran ê AKP-MHPyî xoverdayîşêkê pîlî keno. Bêguman xoverdayîşê tewr pîlî zî şarê Amedî keno ke wayîrê hişmendîyêka welatperwer o. Coka nê tewirê Amedî parçeyêkê têkoşînê tradîsyonê xoverdayîşî û têkoşînê şarê Kurdîstanî yê vera faşîzmê AKP-MHPyî yo.

Şefê faşîstî qiseykerdişê xo yê Amedî de karakterê xo yê dişmenîya vera kurdan reyna eşkera kerd, şarê kurdî rê, sîyasetmedaran û terefgîranê HDPyî rê heqaret kerd. No tewirê ey a raşte tengîya ci mojneno. Seba ke tewirê şarê Amedî tewirê şarê Kurdîstanî yo û şefo faşîst manaya xi hol zaneno. Tersê ney her wextî ra zafêr zerrîya ey recifneno. La ters faydeyê çîyêkî nêkeno. Şarê Amedî do qetî nêterso, apey gamêke nêerzo û têkoşîn û armancanê xo ra fek vera medo.

Faşîzmê AKP-MHPyî û Erdogan her roje kurdan qetil kenê, pê çekanê kîmyewîyan ewladanê nê şerî qir kenê, esteyan zereyê tewreyan de danê, Rayber Apoyî tecrîd kenê, kurdan erzenê zîndanî, zîndanan de qetil kenê, Rojawanî û Başûrî îşxal kenê, hêrişê multecîyanê Mexmûrî kenê, Şingal de qirkerdiş kenê; şarê Amedî vera nînan tewirê xo mojna û eşkera kerd ke Amed û Kurdîstan de cayê înan çin o. Dîyar o şefê faşîstî Amed de na raştîye hol fam kerde. Bêguan şarê kurdî do hesabê nê heqaretan biperso.

Têna şefê faşîstî ra nê heman wextî de sextekaran ra zî şarê kurdî do hesab biperso ke dişmenîya xo ya vera kurdan nimnenê. Tay kesayetê kurdî yê sextekar û ajanê ke qederê xo bi ê şefê faşîstî kerdbi yew, kewtê mîyanê tersêkê pîlî û xîret kenê ke na raştîye binimnê. La şarê Amedî zî şarê kurdî zî her çî vînenê û baş zanenê ke kam çita yo.

Têna şarê kurdî nê ganî Tirkîya de her kes vera sîyaset û mezgê dişmenê kurdan ê Erdoganî tewirê xo bimojno. Mumkîn nîyo ke dişmenê kurdan do bibê dişmenê tirkan û Tirkîya. Erdogan têna dişmenê kurdan nîyo dişmenê pêro şaranê Tirkîya, kedkaran, cinîyan, xoza û merdimîye yo. Dişmenîya vera kurdan û şerê vera kurdan ra erj, ameyoxê Tirkîya û rûmetê şaranê Tirkîya zî yenê çinkerdene. Mîyanê Tirkîya de bi nîjadperestî û neteweperestîye teber de zî bi mezhebperestî û dişmenîye komelê Tirkîya visto binê tehlukeyanê pîlan. Şarê Tirkîya ney heq nêkenê û mekhumê nê mezgî û sîyasetî nîyê. Ganî îtîfaqê AKP-MHPyî û Erdoganî ra bixelisê. No mumkîn o û armancêko normal o. Seba caardişê ney zî ganî her kes hîna zaf têkoşîn bikero. 

Coka ma şarê Amedî tewirê ci yê manadar û rûmetênî ra semed reyna zerrîya fîraz kenê û selam kenê. Girîng o ke şarê Vakurê Kurdîstanî bi temamî nê tewirê rûmetênî yê şarê Amedî xo rê bikerê mîsal û vera faşîzmî wayîrê tewirêkê zelal û qerardarî bibo. Hînî AKP-MHP û şefê ci yo faşîst Erdogan key bêrê Kurdîstanî ganî meydananê vengan rê qisey bikerê. Ganî şarê Kurdîstanî dormeyê xeta têkoşînî de yewî û xoverdayîşê xo pîlêr bikerê û faşîzmê AKP-MHPyî birijnê.''