Komîteya Têkilîyanê Teberî ya KCKyî derheqê sûcanê şerî yê dewleta tirke de eşkerayîyêke daye. Eşkerayîye wina ya:

''Şarê ma yê Kampa Şehîd Rûstem Cûdîyî ya Mexmûrî yo ke polîtîlayê dewleta tirke red kerdbî, vera îxanetê PDKyî de weriştbi we û cuya azade de israr keno her roje beno hedefê hêrişanê dewleta tirke. Nê hêrişî verê çimanê dewleta Iraqî de yenê kerdene. Şarê Mexmûrî vera terorê DAÎŞî şarê Başûr û Iraqî reyde têkoşîn kerdbi û şarêko xoverdayox o. Heta PDKyî û Mesûd Barzanîyî zî wextêk nê şarî rê sipas kerdbi. La dewleta tirke gerîlayê azadîye xo rê kerdê bahane Dewleta Iraqî soz dabi ke na kampe bipawa. Xora pawitiş û asayîşê kampe ra dewleta Iraqî û Neteweyanê Yewbîyayeyan ra mesuldar ê.

Pêvînayîşanê dewleta tirke ya îşxalkere û hukmatê Iraqî ra dima peymanêke ameye îmzakerdene. Na peymane ra dima hêrişê vera Mexmûrî zî zêdîyayî. Nê hêrişan de şarê ma şehîd bi. Eke droneyê çekdarî yê dewleta tirke asmênê Kerkûkî ser de pirodîyenê la Mexmûrî ser o bi rehetî gêrenê no mojneno ke hukmatê Iraqî cîyakerîye keno. 

Dewleta Iraqî eke nêwaza biba hemkara sûcanê şerî wa cade na peymane betal bikera. Na peymane û eşkerayîyê Wezîrê Pawitişî yê Iraqî meşrûkerdişê îşxal û îlhaqî ra ber nênê manayêka bîne. Wezîrê Pawitişî herinda ke vera hêrişanê îşxalî şarî bipawo artêşa tirke ya îşxalkere paweno. 

Peymane û îtîfaqê bi Tirkîya şer û rijîyayîşî do xo reyde bîyarê. Rojanê tewr zehmetan ê Iraqî de merkezê DAÎŞî de Tirkîya sersefîrîya xo akerde verdabî û hetkarîyêke zî nêdabî Iraqî. Erdogan û Tirkîya do senî biba dostê Iraqî? Ma venga dewlet û hukmatê Iraqî danê ke vera sûcanê şerî yê Tirkîya wurzê we û peymana bi paştgîrê DAÎŞî Erdoganî îmza kerda cade betal bikerê. Wa Neteweyê Yewbîyayeyî û UNAMI goreyê sozanê xo têbigêrê û şarê Mexmûrî bipawê.''