Hemsereka Pêroyî ya Komeleya Heqanê Merdiman (ÎHD) Erene Keskîn tecrîdkerdişê Rayberê Şarê Kurdî Abdullah Ocalanî ercna. Keskîne ard ziwan ke Îmarali de caardişê taybetî yenê xebitnayene û vat roja ke Ocalan ame berdene bi Îmrali de tecrîd dest pêkerd.

Keskîne vat: "Wexto ke Birêz Ocalan netîceyê komployê mîyanneteweyî de Tirkîya rê amebi teslîmkerdene ez avûkata ci bîya. Ez prosesê Îmrali nêzdîye ra taqîb kena. Îmrali de tecrîdêko giran esto. Zîndanê Îmrali de tecrîd bi tepiştişê Ocalanî dest pêkerd. Tecrîd û îzalasyon metodê Îmrali yê. No tecrîd  beno semedê alozîya komelkî û komel zî yeno tecrîdkerdene."

"Cezaya dîsîplînî yena manaya zîndanê zereyê zîndanî. Seke bi formalîte bi cezaya dîsîplînî wazenê Ocalan keye û avûkatanê xo reyde pêvînayîşan nêko. Dewlete wazena ke seba tecrîdî bahane bivîna û naye ra cezaya dîsîplînî kena meşrû. Nê cezayê dîsîplînî tewirê sîyasî yê û huqûq de cayê ci çin ê. Ganî dewlete na bêhuqûqîye ra fek vera bida û berê Îmraliyî keye û avûkatan ra abika."

"Destpoêkê komare ra nata dewlete wazena mesela kurdî bi şerî çareser bika. Tirkîya de semedo verên ê krîzê eknomîyî şer o. Mesela kurdî bi şerî nêna çarekerdene û no dej keno xorîn. Tirkîya de prosesê haştîye ameyêne kerdene. Nê prosesî de aramîye estbî û her kes nefes girewtêne. Coka haştîye ra zerar nêreseno, şer ra zerar reseno. Ganî ma her tim polîtîkaya haştîye bipawê û haştîye awan bikê."

Hemsereka Pêroyî ya ÎHDyî Erene Keskîn vera CPTyî nêrazîbîyayîşê xo mojna û vat: "Zîyaretê Îmraliyî de CPTyî kêmasîyêka pîle kerde. Raporê CPTyî nêresayî rayaumûmîye. Ganî dezgehê cigêrayîşê zîndanan û CPT heyetan bierşawê Îmrali û zîndananê bînan ê Tirkîya."