Keyeyê ke cenazayê domananê înan Goristanê Sisê de ameybî definkerdene roşanê Qurbanî ra dima vizêr reyna şîyî goristan. Keyeyan goristan kerd pakî û kerrayê ke şikîyayî, newe kerdî. Îdarekarê MEBYA-DERî, HDP, DBP û xeylêk kesê bînî zî goristan de amade bîyî. Înan keyeyan reyde goristan zîyaret kerd û goristan kerd pakî. Keyeyan kerrayan ser o nameyê domananê xo nuştî.

Munevvere Pasîna 61 serre ya ke lajê aye Yilmaz Azad Pasîn serra 1999î de şehîd bi, nêrazîbîyayîşê xo mojna û vat: ''Esteyan ra çi wazenê? Ez homayî ra wazena ke êyê ke goristanê domanê ma rijnayî û kerrayê domanê ma şiknayî wa zerrîya înan zî wina bivêşa. Ma dewaya haştîye kenê. La ê hêriş kenê û şer wazenê.''

Rabîa Tekîna ke kênaya ci Mizgîne Tekîn serra 1992î de şer de şehîd bî, vat: ''Verî wexto ke ma ameyêne serê goranê domananê xo keyfê ma ameyêne. Nika ma qehirîyenê. Dewlete verê cû zî gorê domananê ma rijnayî nika zî rijnena. Çi heqê înan esto ke wina kenê? Domanê ma bêwayîr nîyê.''

Dima ke pakîya keyeyan qedîyaye Hemserekê MEBYA-DERî Şeyhmus Karadagî verê goristanê de wina qisey kerd: ''Ma rijnayîşê gora û goristanan qebul nêkenê. Ê çen hêrişê ci bikerê, bivêşnê û xera bikerê zî ma do reyna virazê.''