Bi wesîleya Roşanê Qurbanî Amed de goristanî ameyî zîyaretkerdene. Qezaya Lîce ke bi rojano daristanê ci vêşeno de ame pêhesîyayene ke şewat resayo Goristanê Sîsê.

HDP, DBP, Meclîsê Mayanê Haştîye yû MEBYA-DERî ra heyetêk  bi wesîleya roşanî Amed de goristanî zîyaret kerdî. Goristanê Sîsê ke 5 serranê peyênan de xeylêk rey raştê hêrişî amebi, ame vînayene ke şewat resayo ci. Dar û nebatî goristanî vêşayî. Heyeto ke mudaxaleyê şewatî kerd, dima ra eşkerayîyêke daye. Eşkeray de ame vatene ke bi vêşnayîşê goristanan dişmenîya îqtîdarî ya vera kurdan reyna ameye dîyene. Parlamentere Remzîye Tosun vat dadîyanê ke waşt roşan de qicanê xo vînê reyna kezeba înan vêşa.

Şewato ke daristanê taxanê Derxust, Sisê û Cinezurî yê qezaya Licê ya Amedî de 3 rojî verê cu vejîya, seba ke îtfaîye mudaxale nêkerd bi tesîrê vayî vila bi û hema zî dewam keno. Hemwelatijan bi îmkananê xo mudaxale kerd  û girewbi binê kontrolî la dima ra newe ra dest pêkerd. Şewat de bi hezaran darî vêşayî û bi hezaran ganîyan cuya xo vînî kerde.