Federastonê Komeleya Huqûqî û Paştdayîşî yê MEDî yê Keyeyanê Tepişteyan û Hukmwerdeyan (MED TUHAD-FED) semedê gefê vîrusê Korona yê serê zîndanan  kampanyayêke daye destpêkerdene. Keyeyanê tepişteyan waştişnameyê kampanya Wezaretê Edaletî û Komîsyonê Heqanê Merdiman ê Meclîsê Tirkî ra erşawit.  Waştişname de yeno waştene ke ganî tebdîrî bêrê girewtene û pêro tepişteyî bêrê veradayene.

Waştişname de ame vatene ke tepişteyê ke 60î ra pîlêr ê, tepişteyê nêweşî û dadîyê ke domananê xo reyde tepişte yê, tepişteyê diganî ganî bieşkê ke keye de cezaya xo temam bikerê.

Keyeyan bi çarçewa xebata MED TUHAD-FEDî de muracatê Merkezê Îrtîbatî yê Serekkomarîye (CÎMER) kerd.

Muracat de ame vatene ke Zîndanê Amedî de hacetê pakî nênê dayene, werdê tepişteyan pak nîyê, awa germine nêna dayene û tepişteyê nêweşê kronîkî nênê weşkerdene. Muracat de ame vatene: ''Ma wazenê tepişteyê Zîndanê Amedî, heta ke gefê vîrusê Korona derbaz bibo bêrê veradayene.''

Ronda Bata ke waya Rojhat Bat a û 3 serran ra nata Zîndanê Amedî de manena keyeyanê tepişteyan ra waşt ke ê zî waştişnameyan bidê.