Koordînasyonê KJKyî derheqê bira Komîteya Wezîran a Konseya Ewropa ya serê Rayberê Şarê Kurdî Abdullah Ocalanî de eşkerayîyêke daye. Eşkerayîye wina ya:

''Îmrali de sîstemê îşkenceyî est o û têkilîya Rayber Apoyî bi teberî ameya birnayeneç Dewleta tirke û îqtîdarê AKP-MHPyî yo faşîst mesuldarê nê sîstemî yê. Komîteya Wezîran a KE 17ê êlule de seba nîqaşkerdişê na rewşe kom bîye û 20ê êlula 2024î de zî eşkerayîya xo daye. Eşkerayîye de ame vatene ke Îmrali de binpaykerdiş est o. La rixmê ney zî Komîte pare kerd ke serrêke do rewşe bêra teqîbkerdene û êlula 2025î de birêke do bêra dayene.

Rayber Apoyî ra 43 mengî yo qetî xeberêke nêna girewtene û o 26 serrî yo bi giranî yeno tecrîdkerdene. Îmrali de şerê qirkerdişî yeno îdarekerdene. No tecrîd tesîrê pêro parçeyanê Kurdîstanî keno. Îqtîdarê AKP-MHPyî zî keno ke bi nê tecrîdî kurdan terorîze bikero, şaranê azadîgîran tehdît bikero û faşîzmê Hîtlerî vila bikero. Bira Komîteya Wezîran a KE zî rayîrê ney dana ke faşîzmê vera kurdan dewam bikero.

Rayberê ma afernayoxê şîarê 'Jin, Jiyan, Azadî' yo. No slogan-şîar vilakerdişê azadîya Rayberîye yo. Rayberê ma bi nê sloganî felsefeya cuya azade zî afernaye. Ewro cinîyê dinya dormeyê na felsefe de yenê pêser. 

Komîteya Wezîran a KE bi bira xo îşkenceyê dewleta tirke raşt pênase kan. Îmrali de binpaykerdişê heqan est o, îşkence û qirkerdiş est o. Na rewşe ciwan, cinî û şarê ma hêrs kena. No hêrs beno pîlêr. Nêno qebulkerdene ke Komîteya Wezîran çimanê xo raştîyan rê biqefilna. Ganî Komîteya Wezîran bira xo newe ra biercna û sîstemê Îmraliyî raşt pênase bikera.

Nêno qebulkerdene ke proses heta êlul 2025î bêro dergkerdene. Hendê dergkerdişê prosesî a raşte seba kerdişanê xiraban wextdayîşê dewleta tirke yo. Ma bira Komîteya Wezîran qîm nêvînenê. Bi na bire sîstemê îşkenceyî yê vera Rayberê ma nêno dîyene û destûr dîyeno ke dewleta tirke nê sîstemî rê dewam bikera. 

Ma Komîteya Wezîran ra wazenê ke derheqê babete de bi xurtî dewleta tirke, selahîyetdaranê îqtîdarê AKP-MHPyî hişyar bikera. Dewleta tirke bi cezayanê dîsîplînî yê viraşteyan Îmrali de rejîmêkê qirkerdişî ana ca. Bi nê sîstemê xo 'heqê hêvîye' zî werte ra wedarnena. Dewleta tirke huqûqî zî qetil kena. Wa bizanîyo ke Rayber Apo hêvîya kurdan o û têkoşînê seba azadîya ey do dewam bikero. Coka Komîteya Wezîran a Konseya Ewropa (KE) seba qedînayîşê dişmenîya Îmraliyî ganî cade têbigêra. Ganî nê îşkenceyî sey nêkera la asteng bikera.

Şarê Kurdîstanî û dostê înan, dezgehê azadîgîr û demokratîkî, rêxistinê sosyalîst û şorişgêrî ganî seba azadîya Rayber Apoyî kampanyayan bikerê. No têkoşîn ganî nêvindero. Ma venga Komîteya Wezîran danê ke nê têkoşînî fam bikera û kişta raşte de vindera. Ma venga rayaumûmîye danê ke bi baldarî û mesuldarî têbigêra.''