Koordînasyonê KJKyî bi eşkerayîyêke serrgêra 28. ya şehadetê ci de Bêrîtane (Gulnaze Karataş) yad kerde. 

Eşkerayîya KJKyî wina ya:  

''Mîrazê xeta azadîye yê cinîyan xoverdayîş o. Têkoşînê cinîyan o ke rayberîya Serek Apoyî de dest pêkerd û Sakîne Cansiz dewam kerd, tim bi pîlêr. 

Menga teşrîna verêne menga şehîdan a. Sere de Gulnaze Karataş ma şexsê embazanê ma Azîme, Berware, Rewşene, Gurbetellî Ersoz, Meryeme Çolak, Çîçeke Gabar, Zinarîne Dêrik, Arîne Mîrkan, Gulnaz Ege, Çerkeze Hêlîn, Canda Turk, Andrea Wolf, Lêgerîne Arjantîn, Hevrîne Xelef, Rojîn Gevda de pêro şehîdanê menga teşrîna verêne bi rêzdarî yad kenê.

Embaze Bêrîtane bi hawayêkê eşkerayî tewirê ma yê vera bêbêxtî, xeta ma ya azadîya cinîyan, krîterê azadîye yê xeta ma mojnayî. A serkêş û fermandara ma ya. 

25ê teşrîna verêne ya 1992î de Bêrîtane Xakûrkê ke vera hemkaranê dişmenê kurdan heta guleyê xo yê peyênî şer kerd û rixmo ke pêşmergeyanê PDKyî tira waşt teslîm biba xo sey Besêyanê Terteleyê Dêrsimî kendalêkî ra eşt war û bi hawayêkê çêrî şehîd bîye. Embaze Bêrîtane bi israrî hîşmendîya azadîya cinîyan ê Têgêrayîşê ma fam kerd, ercna, bi înat û israrî pratîze kerd û bi nê hawayî bîye çimeyê îlham û hêzê ma. Embaze Bêrîtane felsefeya azadîya cinîyan a Rayber Apoyî bi zixmî cuya xo de temsîl kerde.

Tewirê embaze Bêrîtane yê vera hemkar û bêbextan bingeyê xeta ma ya azadîya cinîyan o.Ewro zî seba cinîyan ê kurdan wezîfe yo ke vera xeta hemkar û bêbextan xo ver bidê. PDK ewro zî bi peymana Şingalî heman rolê bêbextîye ano ca.

Vera naye cinîyê kurdî xoverdayîşê azadîye yê Bêrîtane ser o Kurdîstan û Rojhelatê Mîyanênî de têkoşînê xo kenê berzêr.

Gerîlayê YJA-Starî Cengê Heftanînî de temsîlîya bêhempa ya tarîxê cinîyan kenê. Gerîlayê ma ruhê embaze Bêrîtane bi ezametî temsîl kenê û tarîx nusenê. Gerîlayê YJA-Starî çar mengan ra nata bi fedakarî û çêrî azadîye afernenê.

Ma bi wesîleya ke menga teşrîna verêne menga şehîdan ê cinîyan a, gerîlayanê YJA-Starî rê bi rûmet û minetî selaman kenê. Sere de embaze Esmer û Nûcane ma pêro şehîdanê Heftanînî ni mînet û rêzdarî yad kenê.

Bi na wesîle ma reyna Rayber Apoyî rê ke kolekerdişê cinîyan, tabu û zîncîrî parçe bi parçe kerdî, selam kenê û mînetê xo ci rê pêşkêş kenê. Ma soz danê ke ma do bibê layîqê ey.

Ma embaza xo ya şehîde Bêrîtane, cinîyan ê şehîdan ê menga teşrîna verêne bi rêzdarî yad kenê. Ma venga cinîyanê Kurdîstan, Rojhelatê Mîyanênî û Dinya danê ke dormeyê hemleya ma ya 'Vera qirkerdişî azadîya cinîyan û komelî bipawê' de yewîya xo bîyarê ca, têkoşîn û xoverdayîşê hemparî pîlêr bikerê.''