Konseya Rayberdişî ya Kongreya Neteweyî ya Kurdîstanî (KNK) derheqê hêrişanê kîmyewîyan ê artêşa tirke ya îşxalkere de eşkerayîyêke daye.

KNKyî eşkerayîye de vist vîrî ke artêşa tirke di serrî yo vera gerîlayan bi hawayêkê bêmabênî çekanê kîmyewîyan şuxilnena, şeş menganê peyênan de zî 2467 reyî çekê kîmyewîyî şuxilnayê û nê hêrişanê kîmyewîyan de tewr tay 100 gerîlayî şehîd bîyê.

Konseya Rayberdişî ya KNKyî pare kerd ke hêrişanê peyênan de 17 gerîlayî bi nê çekan şehîd bîyê û vat: ''Şarê kurdî û dostê înan kenê ke her ca de derheqê nê hêrişanê kîmyewîyan de vengê xo bidê eşnawitene. La bi taybetî Konseya Ewropa, Neteweyê Yewbîyayeyî û OPCW verê nê hêrişan de bêveng manenê. Dewleta tirke zî xêrê na bêvengîye ra hêrişanê xo zêdînena.

Dewleta tirke Kurdîstan de sûcanê şerî kena. Erdogan û hukmatê ci, artêşa tirke û MÎT sûcdarê şerî yê. Çîyê ke Kurdîstan de qewimîyenê normal nîyê û dewleta tirke verê çimanê dinya de nînan kena. Vera nê hêrişan ganî şarê kurdî û dostê înan her ca de wurzê we û vengê xo berz bikerê. Na rewşe rewşêka îstîsnayî ya û şarê kurdî ganî ney qebul nêkero. Sey KNKyî na rewşe rojdemê ma de ya û ma do pê pêro hêzê xo na rewşe teqîb bikerê.

Ma venga pêro şarê Kurdîstanî danê ke vajo roje roja xoverdayîşî ya, wayîrê gerîlayan vejîyo. Wa her ker vejîyo meydanan û bi ruhê Kobanê verê nê hêrişan bigêro. Ganî dostê kurdan û dinya hetê şarê kurdî de vinderê.''